Mga Talinhaga 9 - Marahay na Bareta Biblia

An Kadonongan saka an Kamangmangan

¹ Nagtugdok kan saiyang harong an kadonongan asin naggamit siya nin pitong harigi.

² Nagbuno siya nin hayop, nagtimpla nin arak, saka inandam an lamesa.

³ Sinugo niya an saiyang mga sorogoon na babae na magduman sa pinakahalangkaw na lugar kan banwa tanganing mag-apod nin siring:

⁴ “Magdigdi an siisay man na mangmang!” Dangan an lolong sinasabihan niya,

⁵ “Madya, kakana an sakong tinapay asin inoma an tinimpla kong arak.

⁶ Bayae an kamangmangan, asin mabubuhay ka. Sunoda an dalan nin pakaaram.”

⁷ An nagsasaway sa paratuyatuya, maani nin pagtuyatuya; an minasagwe sa maraot na tawo makakakua nin kulog nin hawak.

⁸ Dai mo pagsawayon an paratuyatuya huli ta maoongis siya saimo. Sagweon mo an tawong madonong, asin mamomoot siya saimo;

⁹ tukdoe an tawong matanos, asin madakula an saiyang pakanood.

¹⁰ An pagkatakot sa Kagurangnan iyo an kapinonan nin kadonongan; an pagmidbid sa an Banal minatao nin pakasabot.

¹¹ Huli sako, madakul an saimong mga aldaw asin mahalawig an saimong buhay.

¹² Kun igwa ka nin kadonongan, ika man sana an magkikinabang, alagad magtitios ka kun isikwal mo iyan.

¹³ An kalolongan nakakaarog sa sarong babae na maribok, mangmang saka mayo nin sopog.

¹⁴ Nagtutukaw siya sa pintoan kan harong niya, o sa sarong tukawan sa pinakahalangkaw na lugar sa banwa,

¹⁵ dangan nag-aapod sa mga nag-aaragi, na naghihidali sa saindang paglakaw:

¹⁶ “Pumadigdi an siisay man na mangmang!” An lolong sinasabihan niya,

¹⁷ “Mahamis an tubig na hinabonan saka masiram an hinabonan na tinapay.”

¹⁸ Alagad dai aram kan saiyang mga biktima na kagadanan an idtoon sa saiyang harong, na an saiyang mga nagin bisita yaon na ngunyan sa irarom, sa kinaban kan mga gadan.