Mga Talinhaga 28 - Marahay na Bareta Biblia

¹ Nagdudulag an tampalasan maski mayong naglalamag, alagad an matanos maisog arog sa leon.

² Kun nagkakasala an sarong nasyon, nagkakaigwa ini nin dakul na kagsakop. Alagad magdadanay na pusog an sarong nasyon kun igwa iyan nin mga madonong asin may pakasabot na mga lider.

³ An nag-aapi sa dukha garo makosog na doros na nagraraot sa mga tinanom.

⁴ An tampalasan inoomaw kan mga tawong nagpapabaya kan katogonan, alagad laban sainda an mga tawong nagkukuyog kaiyan.

⁵ Dai nasasabotan kan mga maraot an kahulogan kan hustisya, alagad nasasabotan ini nin marahay kan mga tawong nagsasamba sa Kagurangnan.

⁶ Mas marahay an dukha na naglalakaw sa katanosan, ki sa tawong mayaman na biko an pamumuhay.

⁷ Madonong an nagkukuyog kan katogonan, alagad an nakikipagkatood sa mga maraot kasosopgan kan saiyang ama.

⁸ Kun magyaman ka huli sa pagpatubo asin pagbentahe sa iba, an saimong kayamanan mapapaduman sa sarong tawo na maheherakon sa dukha.

⁹ Makauuyam maski an pamibi kan tawong habong maghinanyog sa katogonan.

¹⁰ An magdagka sa matanos na maggibo nin maraot mahuhulog sa sadiri niyang kalot. Alagad an mga mayong kasalan magmamana nin mga marahay na bagay.

¹¹ Naghohona an mayaman na siya madonong, alagad mamimidbidan an tunay niyang pagkatawo kan dukhang may pakasabot.

¹² Kun marahay na tawo an nagkakapot nin kapangyarihan, nag-oogma an lambang saro, alagad kun an maraot iyo an namamayo, nagtatago an gabos.

¹³ An nagtatago kan saiyang mga kasalan dai nag-uuswag, alagad an nagkukumpisal saka nagbabaya kaiyan maheherakan nin Dios.

¹⁴ Paladan an tawong danay na may pagkatakot sa Kagurangnan, alagad mapapahamak an matagas an payo.

¹⁵ Arog sa nag-uungal na leon o sa nagugutom na oso an hade na maringis sa mga dukha.

¹⁶ Magigin makuri an pamayo na mayo nin toltol na kaisipan. An naoongis sa pandadaya maghahaloy sa pamamahala.

¹⁷ Pabayaan nindong maglagalag sagkod na magadan an tawong nagkasala nin panggadan; dai nindo siya pagtabangan.

¹⁸ An naglalakaw sa katanosan makakaligtas, alagad matutumba an may bikong pamumuhay.

¹⁹ An mahigos na paraoma magkakaigwa nin dakul na kakanon, alagad an nagsasayang sana nin oras magdadanay sa kadukhaan.

²⁰ An onestong tawo mag-aako nin dakul na bendisyon, alagad an naghihidali sa pagyaman papadusahan.

²¹ Bakong marahay an igwa nin pinapalaen; alagad sa halaga sana nin sarong tinapay minagibo nin maraot an tawo.

²² Sa paghihidali kan kuripot na siya yumaman, dai niya naaaraman na maabot saiya an kadukhaan.

²³ Mas dakul an nagpapasalamat sa tawong nagsasagwe, ki sa tawong nag-oomaw maski bakong maninigo.

²⁴ An naghahabon sa saiyang magurang asin minasabing bako iyan kasalan nakakaarog man sana sa sarong parahabon.

²⁵ An paslo iyo an nagigin dahelan nin iriwal, alagad an nananarig sa Kagurangnan magigin mauswag an buhay.

²⁶ An nananarig sa sadiring kaisipan sarong lolong; alagad makakaligtas an naglalakaw sa dalan nin kadonongan.

²⁷ An nagtatao sa mga dukha dai magkukulang, alagad an nagbibinuta sa saindang kamugtakan mamaldisyonon.

²⁸ Minatago an mga tawo kun an kapangyarihan nasa kamot kan mga maraot, alagad pagbagsak ninda, maghahade giraray an mga matanos na tawo.