Mga Bilang 36 - Marahay na Bareta Biblia

An Kahirasan kan mga Babaeng may Agom

¹ Nagduman ki Moises asin sa mga lider an mga pamayo kan mga pamilya sa kamaganakan ni Gilead, na aking lalaki ni Makir asin makoapo ni Manases, na aking lalaki ni Jose.

² Olay ninda, “Pinagbotan kamo nin Kagurangnan na hirason an daga sa banwaan nin Israel sa paagi nin pagripa. Pinagbotan man niya kamo na itao nindo an kahirasan kan samong kadugo na si Zelofehad sa saiyang mga aking babae.

³ Alagad kun magpaagom sinda sa mga lalaking kaayon sa ibang tribu, masasadirihan na kan mga tribung iyan an pagrogaring kan mga babae, kaya maiinaan an samong kahirasan.

⁴ Pag-abot kan taon nin katalingkasan, kun an ipinabakal na pagrogaring ibalik na sa dating kagrogaring, an pagsadiri kan mga aking babae ni Zelofehad permanenteng idudugang sa tribu kan mga lalaking nakaagom sainda asin mahahale sa samong tribu.”

⁵ Kaya itinao ni Moises sa mga Israelita an pagboot na hale sa Kagurangnan. Nagsabi si Moises, “Tama an sinabi kan tribu ni Manases,

⁶ kaya ipinagboboot nin Kagurangnan na pwedeng magpaagom an mga aking babae ni Zelofehad sa mga lalaking nagugustohan ninda, alagad sa mga lalaking katribu sana ninda.

⁷ An pagsadiri kan lambang Israelita dai pwedeng ibalyo sa ibang tribu; magdadanay iyan sa tribu kan saiyang ginikanan.

⁸ An lambang babae na nagkaigwa nin kahirasan sa sarong tribu nin Israel kaipuhan magpaagom sa sarong lalaki na kaayon kan saiyang tribu. Sa paaging iyan, an lambang Israelita magmamana kan pagsadiri kan saiyang mga ginikanan.

⁹ Kaya mayo nin kahirasan na makakabalyo sa ibang tribu. Danay na masasadirihan kan lambang tribu an pagsadiri kaiyan.”

^10-11 Kaya an pagboot nin Kagurangnan ki Moises kinuyog kan mga aking babae ni Zelofehad na iyo si Mala, Tirza, Hogla, Milca, asin Noe; nagpaagom sinda sa saindang mga primo.

¹² Nagpaagom sinda sa kaayon kan mga kamaganakan kan tribu ni Manases na aking lalaki ni Jose. Kaya nagdanay sa tribu kan saindang ama an saindang pagsadiri.

¹³ Iyo ini an mga togon asin pagsusundon na itinao nin Kagurangnan sa mga Israelita sa paagi ni Moises, sa kapatagan nin Moab sa ibong kan Salog nin Jordan hale sa Jerico.