Josue 22 - Marahay na Bareta Biblia

Pinapuli ni Josue an mga Tribu sa Sirangan

¹ Dangan inapod ni Josue an mga Israelitang gikan sa mga tribu ni Ruben, Gad, saka Manases sa sirangan

² asin sinabihan, “Nagibo na nindo an gabos na ipinagboot saindo ni Moises na sorogoon nin Kagurangnan asin kinuyog nindo an gabos kong pagboot.

³ Sagkod ngunyan dai nindo pinabayaan an kapwa nindo Israelita. Nagin maingat kamo sa pagkuyog kan pagboot nin Kagurangnan na saindong Dios.

⁴ Ngunyan, an kapwa nindo Israelita tinawan na nin katoninongan nin Kagurangnan na saindong Dios, siring sa saiyang panuga. Kaya magbalik na kamo sa dagang pinili nindo bilang kahirasan, an daga sa sirangan kan Jordan na itinao saindo ni Moises, na sorogoon nin Kagurangnan.

⁵ Kuyogon nanggad nindo an togon na itinao saindo ni Moises: kamotan nindo an Kagurangnan na saindong Dios, gibohon an saiyang kabotan, kuyogon an saiyang mga pagboot, magmaimbod saiya, asin paglingkodan siya sa bilog nindong puso saka kalag.”

^6-8 Bago sinda pinapuli ni Josue, benendisyonan niya sinda asin sinabihan, “Mayaman kamong mapuli, dara an dakul na hayop, plata, bulawan, bronse, lansang sagkod gubing. Hirasan nindo an saindong mga tugang kan mga bagay na nasamsam nindo sa saindong mga kaiwal!” Dangan nagpuli na sinda. Itinao ni Moises sa kabanga kan tribu ni Manases an daga sa sirangan kan Jordan, alagad itinao ni Josue sa kabanga pang tribu ni Manases an daga sa solnopan kan Jordan, sa kaibahan kan ibang mga tribu.

⁹ Kaya nagpuli an mga tribu ni Ruben, Gad, asin an kabangang tribu ni Manases. An ibang Israelita binayaan ninda sa Shilo, sa daga nin Canaan, asin nagbalik sinda sa sadiri nindang daga, sa daga nin Gilead na nagin kahirasan ninda siring sa ipinagboot nin Kagurangnan sa paagi ni Moises.

An Altar sa Tampi kan Jordan

¹⁰ Kan makaabot sa Gelilot na nasa parteng solnopan kan Salog nin Jordan an mga tribu ni Ruben, Gad, asin Manases sa sirangan, nagpatindog sinda nin sarong halangkaw saka dakulang altar sa tampi kan salog.

¹¹ Naosipan an ibang mga Israelita, “Dangoga nindo! An mga tribu ni Ruben, Gad, asin an kabangang tribu ni Manases nagturugdok nin altar sa Gelilot sa parte kan Jordan na sadiri ta.”

¹² Kan madangog ini kan mga Israelita, nagtiripon sinda gabos sa Shilo tanganing labanan an mga tribu sa sirangan.

¹³ Sinugo kan mga Israelita si Finehas, na aki ni Eleazar na padi, na magduman sa Gilead sa mga tribu ni Ruben, Gad, asin sa kabangang tribu ni Manases.

¹⁴ Nag-iba ki Finehas an sampolong lider, sarong lider hale sa lambang tribu sa solnopan. An lambang saro sainda iyo an pamayo nin pamilya sa saindang kamaganakan.

¹⁵ Nakaabot sinda sa Gilead, sa mga tribu ni Ruben, Gad, saka ni Manases sa sirangan.

¹⁶ Sa ngaran kan bilog na komunidad nin Kagurangnan, hinapot ninda an mga ini, “Anong katampalasanan ining ginibo nindo tumang sa Dios nin Israel? Kinalaban nindo an Kagurangnan sa pagpatindog kan altar na ini para sa saindong sadiri! Dai na kamo nagsusunod saiya!

¹⁷ Giromdoma nindo an satong kasalan sa Peor, kan padusahan nin Kagurangnan an saiyang banwaan sa paagi nin sarong peste. Sagkod ngunyan nagtitios kita huli kaidto. Ano, kulang pa nanggad an kasalan na idto?

¹⁸ Nagsasayuma na kamo ngunyan sa pagsunod saiya? Kun magtumang kamo sa Kagurangnan ngunyan, maaanggot siya sa bilog na Israel sa aga.

¹⁹ Ngunyan, kun an saindong daga bakong maninigo na pagsambahan saiya, bumalyo kamo sa daga nin Kagurangnan saen nakatugdok an saiyang Tabernakulo. Kumua kamo nin daga sa samong pagsadiri. Alagad dai kamo magtumang sa Kagurangnan asin dai man nindo kami paggibohon na matumang, huli sa pagpatindog nindo nin altar bilang dagdag sa altar nin Kagurangnan na satong Dios.

²⁰ Giromdoma nindo an pagsuhay ni Acan, na aki ni Zera, sa pagboot manongod sa mga bagay na dapat suloon; pinadusahan an bilog na Israel huli kaidto. Bako lamang si Acan an nagadan huli kan saiyang kasalan.”

²¹ An mga tawong hale sa mga tribu ni Ruben, Gad, asin ni Manases sa sirangan nagsimbag sa mga pamayo kan mga pamilya kan mga tribu sa solnopan:

²² “An Mapangyari iyo an Dios! Siya iyo an Kagurangnan! An Mapangyari iyo an Dios! Siya iyo an Kagurangnan! Aram niya kun tano ta ginibo mi ini, asin boot mi man na makaaram kamo. Kun kami nagtumang asin dai nagin maimbod sa Kagurangnan, gadana nindo kami!

²³ Kun kami nagsuhay sa Kagurangnan asin nagpatindog nin sadiri nyamong altar tanganing pagtutongan kan samong mga dolot o tanganing gamiton para sa mga dolot na pagkakan asin sa katoninongan, padusahan logod kami nin Kagurangnan.

²⁴ Ginibo mi ini huli ta nahahandal kami na sa maabot na aldaw masabi an saindong mga aki sa samong mga aki, ‘Ano an pakilabot nindo sa Kagurangnan, an Dios nin Israel?

²⁵ Ginibo niya an Jordan na kasagkoran mi asin nindo, na gikan ki Ruben asin ki Gad; dai kamo nin pakilabot sa Kagurangnan.’ Dangan pwedeng pugolon kan saindong mga aki an samong mga aki sa pagsamba sa Kagurangnan.

²⁶ Kaya nagpatindog kami nin altar, bakong para sa tinutong na atang ni para sa mga dolot,

²⁷ kundi bilang sarong tanda para samo asin para saindo, patin para sa kapagarakian na masunod sa sato, na talagang nagsasaramba kita sa Kagurangnan sa atubang kan banal niyang Tabernakulo, huli sa satong mga tinutong na atang, mga sakripisyo sagkod mga dolot para sa katoninongan. Ini an paagi tanganing dai masabi kan saindong mga aki na an samong mga aki dai nin pakilabot sa Kagurangnan.

²⁸ Napaghorophorop mi, na kun mangyari ini, an samong mga aki makakasabi, ‘Hilinga! An samong mga ginikanan nagtugdok nin altar na kaagid kan altar nin Kagurangnan. Bako iyan para sa mga tinutong na atang o para sa mga sakripisyo kundi bilang tanda para sa samo asin para sa saindo.’

²⁹ Dai nanggad kami matumang sa Kagurangnan o matalikod saiya ngunyan, huli sa pagpatindog nin altar para sa mga tinutong na atang, mga dolot na pagkakan o mga sakripisyo. Dai kami mapatindog nin ibang altar kundi an altar nin Kagurangnan na satong Dios na nasa atubangan kan Tabernakulo.”

³⁰ Nadangog ni Finehas asin kan sampolong mga lider na kairiba niya, na mga pamayo kan mga pamilya kan mga tribu sa solnopan, an sinabi kan mga tribu ni Ruben, Gad, saka ni Manases sa sirangan, asin nagkaorogma sinda.

³¹ Nagsabi sainda si Finehas, na aki ni Eleazar na padi, “Aram mi na ngunyan na kaiba nyato an Kagurangnan. Dai kamo nagtumang saiya, kaya ilinigtas nindo an mga Israelita sa padusa nin Kagurangnan.”

³² Dangan binayaan na ni Finehas sagkod kan mga lider an mga tribu ni Ruben saka ni Gad sa daga nin Gilead. Nagbalik sinda sa Canaan asin inosip ninda sa mga Israelita an gabos na nangyari duman sa Gilead.

³³ Nag-ogma an mga Israelita asin nag-omaw sinda sa Dios. Dai na ninda pinag-orolayan an pagsalakay tanganing tunawon an dagang pinag-erokan kan mga tribu ni Ruben saka ni Gad.

³⁴ Nagsabi an mga tawong gikan ki Ruben asin Gad, “Saksi an altar na ini para sa sato gabos na an Kagurangnan iyo an Dios.” Kaya an altar inapod nindang “Saksi.”