Jeremias 39 - Marahay na Bareta Biblia

An Pagbagsak nin Jerusalem

¹ Kan ikasampolong bulan kan ikasiyam na taon kan paghahade ni Zedekias sa Juda, nag-abot si Hadeng Nebukadnezzar kaiba an bilog niyang hukbo asin sinalakay an Jerusalem.

² Kan ikasiyam na aldaw kan ikaapat na bulan kan ikaonseng taon kan paghahade ni Zedekias nalaog ninda an syudad. (

³ Kan nasakop an Jerusalem, nag-abot an gabos na halangkaw na opisyal kan hade nin Babilonia dangan nagtukaw sa Pagultanan na Trangkahan. Kaiba ninda si Nergalsarezer, Samgar-nebo, Sarsekim saka saro pang Nergal-sarezer.)

⁴ Kan mahiling ni Hadeng Zedekias asin kan gabos niyang soldados an nangyayari, naghingowa sindang makahale sa syudad pagkabanggi. Nag-agi sinda sa tatamnan kan hade, sa trangkahan sa pagultanan kan duwang kudal, asin nagpasiring sa Kapantayan nin Jerico.

⁵ Alagad linamag sinda kan hukbo nin Babilonia asin nadakop si Zedekias sa kapantayan na harani sa Jordan. Dinara ninda siya ki Hadeng Nebukadnezzar, na nasa syudad nin Ribla, sa teritoryo nin Hamat; duman itinao ni Nebukadnezzar an padusa saiya.

⁶ Sa Ribla, ipinagadan ni Nebukadnezzar an mga aking lalaki ni Zedekias, mantang naghihiling ini. Ipinagadan man niya an mga opisyal kan Juda.

⁷ Pakatapos kaiyan, ipinahulwat niya an mga mata ni Zedekias saka pinakadenahan tanganing darahon sa Babilonia.

⁸ Sinulo kan mga taga Babilonia an palasyo kan hade asin an mga harong kan mga tawo, dangan rinumpag ninda an mga kudal kan Jerusalem.

⁹ Pakatapos, dinara ni Nebuzaradan, an pinakahalangkaw na opisyal kan hukbo, an mga tawong natada sa syudad bilang mga bihag sa Babilonia, kaiba an mga nagdulag sa syudad tanganing magkampi saiya.

¹⁰ Iwinalat niya sa daga nin Juda an mga dukha na mayo nin rogaring, dangan tinawan sinda nin ubasan saka oma.

Binutasan si Jeremias

¹¹ Pinagbotan ni Hadeng Nebukadnezzar si Nebuzaradan, an pinakahalangkaw na opisyal kan hukbo,

¹² “Hanapa si Jeremias saka atamana siya. Dai mo siya pagkulogon, kundi sunodon mo an boot niya.”

^13-14 Kaya ipinakua ako ni Nebuzaradan sa patyo kan palasyo, kan mga halangkaw na opisyal na si Nebusazban saka si Nergal-sarezer, asin kan iba pang mga opisyal kan hade nin Babilonia. Ibinugtak ninda ako sa pangangataman ni Gedalias, na aking lalaki ni Ahikam saka makoapo ni Safan, tanganing matiwasay akong makapuli sa harong. Kaya nag-erok ako sa kaibahan kan mga tawo.

Paglaom Para ki Ebed-melec

¹⁵ Kan nabibilanggo pa ako sa patyo kan palasyo, tinaraman ako nin Kagurangnan

¹⁶ na sabihan si Ebed-melec na taga Etiopia, na an Kagurangnan nin mga hukbo, an Dios nin Israel, nagtaram nin siring, “Ootobon ko na an sakong mga itinaram laban sa syudad na ini. Karatan asin bakong karahayan an mangyayari sa aldaw na iyan sa atubangan nindo.

¹⁷ Alagad ako, an Kagurangnan, an mag-iingat saimo, kaya dai taka itatao sa mga tawong natatakotan mo.

¹⁸ Ililigtas taka; dai ka magagadan. Ililigtas ko an saimong buhay bilang regalo nin ralaban huli ta nanarig ka sako. Ako, an Kagurangnan, an nagtaram.”