Jeremias 36 - Marahay na Bareta Biblia

An Kasuratan Binasa ni Baruc sa Laog kan Templo

¹ Kan ikaapat na taon kan paghahade sa Juda ni Jehoiakim, na aking lalaki ni Josias, nagtaram sako an Kagurangnan,

² “Kumua ka nin suratan asin isurat mo an gabos na sinabi ko saimo manongod sa Israel, sa Juda saka sa gabos na nasyon. Isurat mo an gabos na itinaram ko saimo magpoon kan enot takang kaolayon, kan si Josias iyo an hade, sagkod ngunyan na aldaw,

³ tanganing kun madangog kan mga taga Juda an gabos na karatan na boot kong darahon sainda, tibaad magbakle sinda sa mga maraot nindang gawe. Dangan papatawadon ko sinda kan mga karatan asin kasalan ninda.”

⁴ Kaya inapod ko si Baruc na aking lalaki ni Nerias asin sinabi ko saiya an gabos na itinaram sako nin Kagurangnan; ini gabos isinurat ni Baruc.

⁵ Dangan sinabihan ko si Baruc, “Dai na ako pinapalaog sa Templo.

⁶ Alagad boot kong dumuman ka sa masunod na pag-ayuno kan mga tawo. Basahon mo nin makosog an kasuratan, tanganing madangog ninda an gabos na itinaram sako nin Kagurangnan, na ipinasurat ko man saimo. Magtindog ka sa lugar na madadangog ka kan gabos, sagkod kan mga taga Juda na maarabot hale sa saindang mga banwa.

⁷ Tibaad mamibi sinda sa Kagurangnan asin talikodan ninda an maraot nindang pamumuhay huli ta pinatakot nin Kagurangnan an saiyang banwaan kan saiyang nakakatakot na kaanggotan asin kabangisan.”

⁸ Kaya binasa ni Baruc an tataramon nin Kagurangnan sa laog kan Templo siring kan pagboot ko saiya.

⁹ Kan ikasiyam na bulan kan ikalimang taon kan paghahade ni Jehoiakim sa Juda, nag-ayuno an mga tawo tanganing mawilihan sinda nin Kagurangnan. Nag-ayuno an gabos na nag-eerok sa Jerusalem asin an gabos na nag-arabot hale sa mga banwa nin Juda.

¹⁰ Dangan binasa ni Baruc an gabos na ipinasurat ko saiya, mantang naghihinanyog an gabos na tawo. Ginibo niya ini sa laog kan Templo, sa kwarto ni Gemarias na aking lalaki ni Safan, na sekretaryo. An kwarto niya nasa itaas na patyo na harani sa palaog kan Bagong Trangkahan kan Templo.

An Kasuratan Binasa sa mga Opisyal

¹¹ Nadangog ni Micaias, na aking lalaki ni Gemarias saka makoapo ni Safan, an mga tataramon nin Kagurangnan, na binasa ni Baruc hale sa kasuratan.

¹² Nagduman siya sa palasyo, sa kwarto kan sekretaryo, na pinagtiponan kan gabos na opisyal tanganing mag-orolay. Yaon duman si Elisama na sekretaryo, si Delaias na aking lalaki ni Semaias, si Elnatan na aking lalaki ni Acbor, si Gemarias na aking lalaki ni Safan, si Zedekias na aking lalaki ni Hananias, asin an iba pang mga opisyal.

¹³ Inosip sainda ni Micaias an gabos na nadangog niyang binasa ni Baruc sa mga tawo.

¹⁴ Kaya sinugo kan mga opisyal si Jehudi (na aking lalaki ni Netanias, na makoapo ni Selemias, asin apo sa tuhod ni Cusi) tanganing magsabi ki Baruc na darahon sainda an kasuratan na binasa niya sa mga tawo. Dinara sainda ni Baruc an kasuratan.

¹⁵ Sinabihan ninda si Baruc, “Tumukaw ka saka basahon mo an kasuratan.” Nagkuyog sainda si Baruc.

¹⁶ Pakabasa niya, takot na naghirilingan sinda asin nagsabi ki Baruc, “Kaipuhan ibareta nyamo ini sa hade.”

¹⁷ Naghapot sinda saiya, “Tarami kami, paano mo isinurat an gabos na iyan? Idinikta iyan saimo ni Jeremias?”

¹⁸ Nagsimbag si Baruc, “An lambang tataramon kaiyan idinikta sako ni Jeremias, asin isinurat ko sa suratan na ini.”

¹⁹ Tinaraman ninda siya, “Magtago kamo ni Jeremias. Dai nindo ipagpaisi maski kiisay man kun haen kamo.”

Sinulo kan Hade an Kasuratan

²⁰ An kasuratan ibinugtak kan mga opisyal sa kwarto ni Elisama na sekretaryo, saka nagduman sinda sa patyo kan hade asin inosip saiya an gabos.

²¹ Dangan sinugo kan hade si Jehudi na kuahon an kasuratan. Kinua niya an kasuratan sa kwarto ni Elisama saka binasa sa hade asin sa gabos na opisyal na nagtitirindog sa palibot kan hade.

²² Tiglipot kaidto asin an hade nagtutukaw sa palasyo niyang para sa tiglipot, na atubang sa kalayo.

²³ Pakabasa ni Jehudi nin tolo o apat na raya, pinutol kan hade an kabtang na idto sa paagi nin sarong kutsilyo asin itinapok sa kalayo. Siring kaiyan an ginibo niya sagkod na nasulo an bilog na kasuratan.

²⁴ Alagad dai lamang natakot o nagpahiling nin anoman na tanda nin pagmondo an hade, ni an siisay man sa mga opisyal niya.

²⁵ Maski nakimaherak sa hade si Elnatan, si Delaias, asin si Gemarias na dai pagsuloon an kasuratan, dai sinda dinangog kan hade.

²⁶ Dangan pinagbotan kan hade si Prinsipe Jerameel, si Seraias na aking lalaki ni Azriel saka si Selemias na aking lalaki ni Abdeel, na dakopon ako saka si Baruc na sakong sekretaryo. Alagad itinago kami nin Kagurangnan.

Nagsurat giraray si Jeremias

²⁷ Pakatapos na suloon ni Hadeng Jehoiakim an kasuratan na ipinasurat ko ki Baruc, tinaraman ako nin Kagurangnan

²⁸ na magkua giraray nin suratan saka isurat an gabos na nasa enot na kasuratan.

²⁹ Pinagbotan ako nin Kagurangnan na taraman an hade nin siring, “Sinulo mo an kasuratan, asin hinapot mo si Jeremias kun tadaw ta sinurat niya na maabot an hade nin Babilonia, raraoton an dagang ini, asin gagadanon an mga tawo saka hayop.

³⁰ Kaya ngunyan, ako, an Kagurangnan, nagsasabi saimo, Hadeng Jehoiakim, na mayo nin siisay man sa mga kapagarakian mo na maghahade sa kahadean ni David. Itatapok sa luwas an saimong bangkay asin tanganing mabalad kun aldaw saka maambonan kun banggi.

³¹ Papadusahan taka, an saimong mga kapagarakian, asin an saimong mga opisyal huli kan mga kasalan na ginibo nindo gabos. Dai mo pinahalagahan an sakong patanid, siring man an mga taga Jerusalem saka mga taga Juda, kaya dadarahon ko saindo gabos an kasakitan na ipinapatakot ko.”

³² Dangan nagkua ako nin ibang suratan saka itinao ko sa sakong sekretaryo na si Baruc, dangan isinurat niya an gabos na sinabi ko saiya. Isinurat niya an gabos na nasa enot na kasuratan asin an parehong mga mensahe na idinikta ko saiya.