Jeremias 33 - Marahay na Bareta Biblia

Saro Pang Panuga nin Paglaom

¹ Nag-abot giraray sako an mensahe nin Kagurangnan kan ako bilanggo pa sa patyo.

² Tinaraman ako kan Kagurangnan, na naglalang kan daga saka nagporma kaiyan, asin nagbugtak kaiyan sa tamang lugar. Siya, na Kagurangnan an ngaran, nagtaram,

³ “Apoda ako, asin sisimbagon taka; ipapahayag ko saimo an dakula saka hilom na mga bagay na dai mo pa naaaraman.

⁴ Ako, an Kagurangnan, an Dios nin Israel, nagsasabi na magagaba an mga harong sa Jerusalem saka an palasyo sa Juda bilang bunga kan pagpalibot saka pagsalakay kan mga kaiwal.

⁵ An nagkapira sainda makikilaban sa mga taga Babilonia, na mapano kan mga harong nin mga bangkay kan mga tawong gagadanon ko huli kan sakong kaanggotan asin kabangisan. Tinalikodan ko an syudad na ini huli kan gabos na kasombikalan kan mga tawo digdi.

⁶ Alagad bobolongon ko an syudad na ini asin an mga tawo digdi. Itatao ko giraray sainda an marahay na hawak. Papahilingan ko sinda nin nagsusupay na katoninongan saka katiwasayan.

⁷ Papauswagon ko an Juda saka an Israel, asin papatindogon ko giraray sinda arog kan dati.

⁸ Lilinigan ko sinda kan mga kasalan na ginibo ninda tumang sako, saka papatawadon ko an saindang mga kasalan asin pagrebelde tumang sako.

⁹ An Jerusalem iyo an matao sako nin kaogmahan, kaomawan, asin kamurawayan; an lambang nasyon sa kinaban matatakot saka magtatakig kun madangog ninda an manongod sa marahay na mga bagay na gigibohon ko sa mga taga Jerusalem asin an manongod sa kauswagan na dadarahon ko sa syudad.”

¹⁰ Nagtaram an Kagurangnan, “Nagsasabi an mga tawo na an lugar na ini garo sarong desyerto, na mayo nin tawo o hayop na nag-eerok. Tama sinda; mamondo mananggad an mga banwa nin Juda saka an mga tinampo nin Jerusalem; mayo nin nag-eerok duman maski tawo o hayop. Alagad sa mga lugar na iyan madadangog mo giraray

¹¹ an mga tingog nin kaogmahan asin kagayagayahan saka an maogmang tingog kan mga bagong kasal. Madadangog mo na nag-aawit an mga tawo mantang dinadara ninda an saindang mga dolot nin pasasalamat sa sakong Templo; masabi sinda, ‘Magpasalamat sa Kagurangnan nin mga hukbo, huli ta siya marahayon asin an saiyang pagkamoot mayo nin kataposan.’ Gigibohon kong magin mauswag giraray an dagang ini arog kan dati. Ako, an Kagurangnan, an nagtaram.”

¹² Nagtaram an Kagurangnan nin mga hukbo, “Sa dagang ini, na garo desyerto saka mayo nin nag-eerok na tawo o hayop, magkakaigwa giraray nin mga pasabsaban na pagdadarahan kan mga pastor kan saindang mga karnero.

¹³ Sa mga banwa kan mabulod na daga, sa pamitisan kan mga bulod, sa parteng habagat kan Juda, sa daga nin Benjamin, sa mga baryo sa palibot nin Jerusalem, asin sa mga banwa nin Juda, an mga pastor magbibilang giraray kan saindang mga karnero. Ako, an Kagurangnan, an nagtaram.”

¹⁴ Nagtaram an Kagurangnan, “Maabot an panahon na ootobon ko an panuga na ginibo ko sa mga taga Israel asin mga taga Juda.

¹⁵ Sa panahon na iyan, pipilion ko bilang hade an sarong matanos na kapagarakian ni David. Gigibohon kan hade an tama saka matanos sa bilog na daga.

¹⁶ Sa mga aldaw man na iyan, ililigtas an Juda saka mamumuhay na matiwasay an Jerusalem. An syudad aapodon ‘An Kagurangnan Samong Kaligtasan.’

¹⁷ Ako, an Kagurangnan, nanunuga na danay na magkakaigwa nin kapagarakian ni David na maghahade sa Israel,

¹⁸ asin danay na magkakaigwa nin mga padi hale sa tribu ni Levi tanganing maglingkod sako saka magdolot nin mga tinutong na atang, nin mga dolot na pagkakan, saka nin mga sakripisyo.”

¹⁹ Tinaraman ako nin Kagurangnan,

²⁰ “Nakipagtipan ako sa aldaw saka sa banggi, tanganing magdatong sinda sa tama nindang panahon, asin an tipan na iyan dai nanggad mababago.

²¹ Sa siring na paagi, nakipagtipan ako sa sakong sorogoon na si David na danay siyang magkakaigwa nin kapagarakian na matukaw bilang hade, saka nakipagtipan ako sa mga padi na hale sa tribu ni Levi na danay sindang maglilingkod sako, asin an mga tipan na iyan dai nanggad mababago.

²² Papadakulon ko an mga kapagarakian ni David na sakong sorogoon saka an mga Levita arog sa dai mabilang na mga bitoon asin sa dai mabilang na baybay kan dagat.”

²³ Tinaraman ako nin Kagurangnan,

²⁴ “Dai mo namamasdan na nagsasabi an mga tawo na isinikwal ko an Israel saka Juda, an duwang pamilya na pinili ko? Kaya pinag-oolog-olog ninda an sakong banwaan asin dai na ninda ini ibinilang na sarong nasyon.

²⁵ Alagad ako, an Kagurangnan, nakipagtipan sa aldaw saka sa banggi, asin an ginibo ko an mga pagboot na sinusunod sa daga saka sa langit.

²⁶ Siring na ginibo ko nanggad ini, siring man papadanayon ko an sakong tipan sa mga kapagarakian ni Jacob asin ni David na sakong sorogoon. Pipilion ko an saro sa mga kapagarakian ni David tanganing paghadean an mga kapagarakian ni Abraham, Isaac, asin ni Jacob. Maheherakan ko an sakong banwaan saka papauswagon ko giraray sinda.”