Jeremias 1 - Marahay na Bareta Biblia

¹ An librong ini iyo an kasuratan kan mga itinaram ni Jeremias, na aking lalaki ni Hilkias, na saro sa mga padi kan banwa nin Anatot, sa daga nin Benjamin.

² Kinaolay siya nin Kagurangnan kan ikatreseng taon nin paghahade sa Juda ni Josias, na aking lalaki ni Ammon.

³ Kinaolay giraray siya nin Kagurangnan kan an hade iyo si Jehoiakim na aking lalaki ni Josias. Pakalihis kaidto, kadakul pang beses na kinaolay siya nin Kagurangnan sagkod kan pagkabihag kan mga taga Jerusalem. Nangyari ini kan ikalimang bulan kan ikaonseng taon kan paghahade ni Zedekias na aking lalaki ni Josias.

An Pag-apod kan Kagurangnan ki Jeremias

⁴ Tinaraman ako nin Kagurangnan,

⁵ “Pinili ko na ika bago taka hinaman sa tulak kan saimong ina, asin kinonsagra taka na bago ka namundag; pinili takang magin propeta nin mga nasyon.”

⁶ Nagsimbag ako, “Kagurangnan Dios, dai ako tataong magtaram; aki pa ako!”

⁷ Alagad tinaraman ako nin Kagurangnan, “Dai mo pagsabihon na aki ka pa, kundi magduman ka sa mga tawo na pinapadumanan ko saimo, dangan itaram mo sainda an gabos na pagboot ko.

⁸ Dai ka matakot sainda huli ta kaiba mo ako tanganing ingatan ka. Ako, an Kagurangnan, an nagtaram!”

⁹ Dangan inunat nin Kagurangnan an saiyang kamot, dinutaan an sakong ngoso, saka sinabihan ako, “Paghinanyog, itinatao ko saimo an mga tataramon na dapat mong itaram.

¹⁰ Itinatao ko saimo ngunyan an kapangyarihan sa mga nasyon saka sa mga kahadean, sa paggabot saka sa pagraot, sa paggaba saka sa paglaglag, asin sa pagtugdok patin sa pagtanom.”

Duwang Bisyon

¹¹ Hinapot ako nin Kagurangnan, “Jeremias, ano an nahihiling mo?” Nagsimbag ako, “Sarong sanga nin almendras.”

¹² “Tama ka”, an sabi nin Kagurangnan “asin nagbabantay ako huli ta boot kong magkatotoo an sakong mga tataramon.”

¹³ Tinaraman giraray ako nin Kagurangnan, “Ano pa an nahihiling mo?” an hapot niya. Nagsimbag ako, “Nahihiling ko sa amihan an sarong koron na nagkakalakaga an laog, saka madali nang malitwang paatubang digdi.”

¹⁴ Nagtaram siya sako, “Hale sa amihan, an karatan mabulos sa gabos na nag-eerok sa dagang ini,

¹⁵ huli ta aapodon ko an gabos na kahadean sa amihan na magdigdi. An mga hade ninda mabugtak kan saindang mga trono sa mga trangkahan nin Jerusalem saka sa palibot kan mga kudal kaini. Siring man an gigibohon ninda sa palibot kan gabos na syudad nin Juda.

¹⁶ Papadusahan ko an sakong banwaan huli ta nagkasala sinda; nagtalikod sinda sako, nagdolot nin mga sakripisyo sa mga dios-dios, dangan naggibo nin mga ladawan saka sinamba iyan.

¹⁷ Mag-andam ka, Jeremias; lakaw asin sabihan mo sinda kan gabos na ipinagboboot kong sabihon mo sainda. Dai ka ngunyan matakot sa sainda, huli ta kun matakot ka, gigibohon kong orog kang matakot kun nasa kaibahan ka na ninda.

^18-19 Jeremias, magdangog ka! An lambang saro sa dagang ini—an gabos na hade sa Juda, an mga opisyal, an mga padi, saka an mga tawo—magigin kalaban mo. Alagad tinatawan taka ngunyan nin kosog tanganing lumaban sainda; magigin arog ka sa sarong pinapusog na syudad, sarong lansang na harigi, asin sarong bronseng kudal. Dai ka ninda madadaog huli ta iibahan saka iingatan taka. Ako, an Kagurangnan, an nagtaram.”