Isaias 54 - Marahay na Bareta Biblia

An Pagkamoot nin Kagurangnan sa Israel

¹ Jerusalem, kaidto siring ka sa babaeng mayo nin aki, alagad pwede ka nang mag-awit ngunyan asin magkurahaw sa kaogmahan. Huli ta magkakaigwa ka na nin dakul na kaakian ki sa babaeng igwa nin agom!

² Padakulaa an tolda na saimong pinag-eerokan; sugponi an mga lubid asin pakosoga an mga taldok kaiyan!

³ Huli ta papadakulaon mo an saimong daga sa gabos na direksyon; makukua giraray kan saimong namamanwaan an daga na sinakop kan ibang nasyon. Mapapano nin tawo an mga syudad na mayo nin nag-eerok ngunyan.

⁴ Dai ka matakot—dai ka na masosopgan giraray; dai ka na mawawaraan nin onra. Malilingawan mo nang dai ka nagin maimbod sa agom kan ika hoben pa. Malilingawan mo an makuring kapongawan bilang sarong balo.

⁵ An saimong Kaglalang magigin siring sa agom mo— Kagurangnan nin mga hukbo an saiyang ngaran. Ililigtas ka kan banal na Dios nin Israel— siya an kagsakop kan bilog na kinaban.

⁶ Israel, nakakaarog ka sa sarong hoben na agom, na binayaan kan saiyang agom asin nagmomondo nin makuri. Alagad inaapod ka giraray nin Kagurangnan na nagsasabi:

⁷ “Sa kadikit na panahon binayaan taka; sa dakulang pagkamoot kukuahon taka.

⁸ Sa kaanggotan tinalikodan taka sa kadikit na panahon, alagad ipapahiling ko saimo an sakong pagkamoot sagkod pa man.” Iyan an sinasabi nin Kagurangnan na nagliligtas saimo.

⁹ “Kan panahon ni Noe ako nanuga na dai na nanggad magkakaigwa nin baha sa daga. Ngunyan nanunuga ako na dai na nanggad ako maaanggot saimo; dai ko na ika papadusahan.

¹⁰ Pwedeng magkaroronot an kabukidan saka kabubuldan, alagad an sakong pagkamoot saimo dai magkakaigwa nin kataposan; an sakong panuga na katoninongan ootobon ko sagkod lamang.” Iyan an sinasabi nin Kagurangnan na namomoot saimo.

An Jerusalem sa Maabot na Panahon

¹¹ Nagsasabi an Kagurangnan, “O Jerusalem, nagtitios, makaheherak, asin mayong karangahan na syudad, papupusogon ko giraray an saimong mga pundasyon asin mahalagang bato an sakong gagamiton.

¹² Mga rubi an gagamiton ko sa pagpatindog kan saimong mga tore, mga karbungko kan saimong mga trangkahan, mahalagang mga bato kan kudal na nakapalibot saimo.

¹³ “Ako mismo an matukdo sa saimong mga namamanwaan, asin an matao nin kauswagan saka katoninongan.

¹⁴ Papakosogon ka kan hustisya asin katanosan. Magigin ligtas ka sa nang-aapi asin sa takot.

¹⁵ Kun may magsalakay saimo iyan bakong kabotan ko; madadaog an siisay man na makikilaban saimo.

¹⁶ “Ako an naglalalang kan panday, na nagmamakot nin kalayo dangan minagibo nin mga armas. Ako man an naglalalang kan soldados, na naggagamit kan mga armas nganing manggadan.

¹⁷ Alagad mayo nin armas na makakakulog saimo; magkakaigwa ka nin kasimbagan sa gabos na mag-akusar saimo. Susurogon ko an sakong mga sorogoon asin tatawan ko sinda nin kapangganahan.” An Kagurangnan an nagtaram.