Isaias 37 - Marahay na Bareta Biblia

Nagpahatol ki Isaias an Hade

¹ Kan madangog ini ni Hadeng Ezekias, ginisi niya an saiyang gubing sa kamondoan, nagsulot siya nin sako, asin nagduman sa Templo nin Kagurangnan.

² Dangan sinugo niya ki Propeta Isaias, na aking lalaki ni Amoz, si Eliakim na namamahala kan palasyo, si Sebna na sekretaryo, asin an mga gurang na padi; gabos sinda nakasulot nin sako.

³ Iyo ini an ipinapataram niya ki Propeta Isaias: “An aldaw na ini aldaw nin kahaditan, kapadusahan asin kasosopgan; dapat nang mamundag an aki alagad dai siya ikinakaluwas kan ina huli ta mayo na ini nin kosog.

⁴ Tibaad nadangog nin Kagurangnan na saimong Dios an gabos na tataramon kan opisyal na sinugo kan emperador nin Asiria tanganing pag-olog-ologon an Dios na buhay; padusahan niya logod an nagtaram. Kaya ipamibi mo kaming kadikit na natatada.”

⁵ Pakadangog ni Isaias kan mensahe ni Hadeng Ezekias,

⁶ itinao niya saiya an simbag na ini: “An Kagurangnan nagsasabi na dai ka matakot huli kan mga tataramon kan mga taga Asiria na dai kamo ililigtas nin Kagurangnan.

⁷ Gigibohon nin Kagurangnan na makadangog an emperador nin Asiria nin sarong huringhuding na makakapabalik saiya sa sadiri niyang daga, asin duman siya ipapagadan nin Kagurangnan.”

Nagpatakot Giraray an mga taga Asiria

⁸ Naaraman kan opisyal na taga Asiria na nasa Lakis an emperador asin linalabanan an haraning syudad nin Libna; kaya nagduman siya tanganing makihumapot saiya.

⁹ Nakaabot sa emperador nin Asiria an bareta na sasalakayon siya ni Hadeng Tirhaka nin Etiopia. Kaya nagpadara siya nin sarong surat ki Hadeng Ezekias

¹⁰ nin Juda tanganing sabihan ining, “An Dios na sinasarigan mo nagsabi saimo na dai ka mahuhulog sa kamot ko, alagad dai ka magpadaya saiya.

¹¹ Nadangog mo kun ano an ginibo kan emperador nin Asiria sa gabos na banwaan; rinumpag niya an mga banwaan. Sa paghona mo daw makakaligtas ka?

¹² Rinaot kan sakong mga ginikanan an mga syudad nin Gozan, Haran, saka Rezep, dangan ginaradan ninda an mga taga Eden na nag-erok sa Tel-asar; mayo ni saro sa saindang dios an nagligtas sa sainda.

¹³ Haen na an mga hade kan mga syudad nin Hamat, Arpad, Sefarvaim, Hena, asin Ivva?”

¹⁴ An surat inako ni Hadeng Ezekias sa mga sugo dangan binasa. Pakatapos naglaog siya sa Templo, biniklad idto sa atubangan nin Kagurangnan,

¹⁵ asin namibi,

¹⁶ “O Kagurangnan nin mga hukbo, Dios nin Israel, na nagtutukaw sa trono sa itaas kan mga kerubin, ika sana an Dios kan gabos na kahadean sa daga. Ika an naglalang kan langit asin kan daga.

¹⁷ Hinanyoga ako, O Kagurangnan. Hilinga an nangyayari samo. Dangoga an mga tataramon ni Senakerib, na nagsugo sa pagtuyatuya saimo, an Dios na buhay.

¹⁸ Totoong gayo, O Kagurangnan, na rinaot kan mga emperador nin Asiria, an mga nasyon asin an saindang mga daga.

¹⁹ Sinurulo ninda an mga dios kan mga nasyon na iyan na bako man talagang mga dios, kundi mga kahoy saka gapo na ginibo nin tawo.

²⁰ Kaya ngunyan, O Kagurangnan na samong Dios, ligtasan kami sa emperador nin Asiria, tanganing maaraman kan gabos na kahadean sa kinaban na ika nanggad sana an Kagurangnan.”

An Mensahe ni Isaias sa Hade

²¹ Dangan nagpadara si Isaias nin sarong mensahe ki Hadeng Ezekias bilang simbag sa pamibi kan hade,

²² na an Kagurangnan nagsabing, “Pinagngingisihan ka, Senakerib, kan syudad nin Jerusalem, asin pinag-oolog-olog.

²³ Sa paghona mo, siisay an saimong pinagtutuyatuya asin pinag-oolog-olog? Dai mo ako iginalang, an banal na Dios nin Israel.

²⁴ Sa paagi kan saimong mga sorogoon tinuyatuya mo ako, dangan nagsabi ka na huli kan kadakul mong karwahe nasakop mo an halangkaw na kabukidan nin Lebanon. Naghambog ka na pinalod mo duman an pinakahalangkaw na mga sedro dangan an pinakamarahay na mga sipres, asin na naabot mo an pinakapusod kan kadlagan.

²⁵ Naghambog ka na nagkalot ka nin mga bubon asin nag-inom nin tubig sa dayuhan na mga daga, patin na an Salog nin Nilo nagmara kan timaktimakan ini kan saimong mga soldados.

²⁶ “Dai mo nabaretaan na ako an nagplano kan gabos na iyan kaidto? An gabos na plano ko kaidtong panahon pinapangyari ko ngunyan. Tinawan taka nin kapangyarihan tanganing gabaon an pinapusog na mga syudad.

²⁷ Mayong naginibo an mga nag-erok duman; natakot sinda asin namongnan. Nakaagid sinda sa mga tinanom sa oma o mga doot na nagtatalubo sa atop na naaalang kun minahuyop an mainit na doros hale sa sirangan.

²⁸ “Alagad aram ko an gabos manongod saimo, kun ano an ginigibo mo asin kun saen ka nagduduman. Aram ko an saimong kaanggotan sa sako.

²⁹ Huli kan kaanggotan mong iyan tumang sako asin kan kapaabaw-abawan mong nakaabot sa sakong pandangog, bubugtakan taka nin salongasing saka renda dangan ibabalik taka sa hinalean mo.”

³⁰ Dangan sinabihan ni Isaias si Hadeng Ezekias, “Iyo ini an magigin tanda para saimo: Sa taon na ini asin sa masunod, magkakakan kamo kan trigo na dai nindo itinanom kundi nagsadiring magtalubo, alagad sa ikatolong taon, matanom na kamo nin trigo asin maani kaiyan, dangan matanom kamo nin nga ubas asin makakan kan bunga kaiyan.

³¹ An mga magkakatarada sa Juda mag-uuswag siring sa mga tinanom na nakagamot nin hararom sa daga dangan namunga.

³² Magkakaigwa man nin mga tawong matatada sa Jerusalem asin sa Bukid nin Sion, huli ta iyan an boot mangyari kan Kagurangnan nin mga hukbo.

³³ “Iyo ini an sinabi kan Kagurangnan dapit sa emperador nin Asiria: ‘Dai siya makakalaog sa syudad na ini, ni makakapalayog nin bosog tumang digdi. Mayong soldados na may kalasag na makakarani sa syudad, ni makakatugdok nin sakatan sa palibot kaini.

³⁴ Mabalik an emperador nin Asiria sa saiyang hinalean na dai nakakalaog sa syudad na ini. Ako, an Kagurangnan, an nagtaram.

³⁵ Susurogon ko an syudad na ini, huli na sana kan sakong onra asin huli kan mga ginibo ko ki David na sakong sorogoon.’”

³⁶ Sarong anghel nin Kagurangnan an nagduman sa kampo kan mga taga Asiria asin ginadan an syento otsenta y singko mil na soldados. Pagkaaga, nahiling sindang nahuhutad, gabos gadan!

³⁷ Dangan nagsibog si Senakerib na emperador nin Asiria asin nagbalik sa Nineve.

³⁸ Sarong aldaw, kan nagsasamba siya sa templo kan saiyang dios na si Nisrok, ginadan siya kan duwa niyang aking lalaki na si Adrammelek asin Sarezer, dangan nagdulag an mga ini sa daga nin Ararat. Si Esarhadon na saro pa niyang aking lalaki an nagsalihid saiya bilang emperador.