Isaias 32 - Marahay na Bareta Biblia

An Matanos na Hade

¹ Maabot an panahon na magkakaigwa nin hade na mamamayo sa katanosan, asin mga lider na mamamayo sa hustisya.

² An lambang saro sa sainda makakaagid sa sarong lugar na pailihan sa doros asin sa sarong lugar na matatagoan kun igwa nin bagyo. Makakaarog sinda sa mga salog na nagbubulos sa desyerto, siring sa lindong nin sarong dakulang gapo sa lugar na mayo nin anoman na masisirongan.

³ Magigin bukas an saindang mga mata asin talinga sa mga pangangaipo kan banwaan.

⁴ Magigin matinios na sinda, mahiro na may pakasabot, asin mataram kan boot nanggad nindang sabihon.

⁵ An sarong lolong dai na igagalang, asin an sarong maraot na tawo dai na aapodon na matanos.

⁶ An sarong lolong nagtataram nin kalolongan asin nag-iisip nin karatan; an sinasabi saka ginigibo niya anas pag-olog-olog sa Kagurangnan; dai niya pinapakakan an nagugutom o pinapainom an napapaha.

⁷ An sarong maraot na tawo naggigibo nin mga maraot na bagay; nagpaplano siyang raoton an mga dukha huli sa kaputikan, asin olangon sinda sa pagkamit kan saindang deretso.

⁸ Alagad an iginagalang na tawo minagibo nin matanos asin pusog na ipinakikilaban an mga bagay na matanos.

Paghukom saka Pagpakarhay

⁹ Kamong mga babaeng namumuhay na matiwasay asin mayo nin mga kahaditan, dangoga nindo an sinasabi ko.

¹⁰ Pwedeng nagkakaigwa na kamo nin kapanoan ngunyan, alagad sa siring kaining panahon sa sunod na taon, mawawaraan kamo nin paglaom huli ta mayo na kamong ubas na aanihon.

¹¹ Namuhay kamo nin matiwasay asin mayo nin mga kahaditan; alagad pagtakig kamo sa takot! Hubaa nindo an saindong mga gubing, asin pagsulot kamo nin sako.

¹² Tumboka nindo an saindong mga daghan sa kamondoan huli ta nagkararaot na an mga matubang na kaomahan asin mga ubasan,

¹³ dangan mga binit saka doot na an nagtatalubo sa daga kan sakong banwaan. Tangisan nindo an mga harong na dating maogma asin an syudad na dating pano nin buhay.

¹⁴ Maski an palasyo babayaan kan mga nag-eerok diyan asin an pangenot na syudad babayaan kan mga namamanwaan. An mga bulod saka an mga bantayan magigin mga erokan nin mga lalaw na hayop, sarong kaogmahan para sa mga lalaw na asno asin sarong pasabsaban para sa mga hayop.

¹⁵ Alagad ipapadara giraray nin Dios sato an saiyang espiritu. An kalangtadan magigin sarong matubang na daga, asin an kaomahan mamumunga nin dakul na ani.

¹⁶ Maghahade saen man sa daga an katanosan saka an hustisya,

¹⁷ asin an magigin bunga kan katanosan iyo an katoninongan, katiwasayan asin an paglaom sagkod lamang.

¹⁸ An banwaan nin Dios mag-eerok sa katoninongan asin katiwasayan sa saindang mga harong saka sa toninong na mga erokan. (

¹⁹ Alagad mahugpa an uran nin yelo sa mga kadlagan, asin magagaba an syudad.)

²⁰ An gabos magigin maogma huli sa dakul na tubig para sa saindang tinanom asin huli sa ligtas na pasabsaban saen man na lugar para sa mga asno saka mga baka.