Hukom 9 - Marahay na Bareta Biblia

Si Abimelec

¹ Si Abimelec, na aking lalaki ni Gideon, nagduman sa Shekem, sa mga kadugo kan saiyang ina. Sinabihan niya sinda

² na hapoton an kalalakihan sa Shekem, “Arin an marahay saindo: an maglingkod sa setentang mga aking lalaki ni Gideon o sa saro sana? Giromdomon nindo na si Abimelec saindong laman asin dugo.”

³ Kaya para saiya, kinaolay kan mga kadugo ni Abimelec an mga taga Shekem manongod kaini asin nag-oroyon an mga lalaki na magsunod ki Abimelec huli ta kadugo ninda siya.

⁴ Tinawan ninda siya nin setentang pedasong plata na hale sa templo ni Baal-berit, asin itinandan niya an kwartang ini sa mga mayong halagang tawo tanganing mag-iba saiya.

⁵ Nagduman siya sa harong kan saiyang ama sa Ofra asin sa ibabaw nin saro sanang gapo, ginadan niya an setenta niyang tugang na lalaki, na mga aki man ni Gideon. Alagad tuminago an pinakangohod na aking lalaki ni Gideon na si Jotam asin dai siya nagadan.

⁶ Pakatapos kaini, nagtiripon an gabos na kalalakihan kan Shekem asin Bet-millo dangan nagduruman sa sagradong kahoy na hamurawon sa Shekem asin duman ninda ginibong hade si Abimelec.

⁷ Kan madangog ini ni Jotam, nagduman siya asin nagtindog sa alitoktok kan Bukid nin Gerizim dangan nagkurahaw sa sainda, “Dangoga nindo ako, kamong mga taga Shekem, asin dangogon logod kamo nin Dios!

⁸ Kaidtong panahon, nagtiripon an mga kahoy tanganing magpili nin saindang magigin hade. Sinabihan ninda an kahoy na oliba, ‘Ika an maghade samo.’

⁹ Nagsimbag an oliba, ‘Maninigo daw na ontokon ko an paggibo nin sakong lana na ginagamit sa pag-omaw sa mga dios-dios asin tawo tangani sanang paghadean kamo?’

¹⁰ Dangan sinabihan ninda an higera, ‘Ika an maghade samo.’

¹¹ Alagad nagsimbag an higera, ‘Maninigo daw na ontokon ko an paggibo kan sakong mga mahamis na bunga tangani sanang paghadean kamo?’

¹² Dangan sinabihan ninda an balagon nin ubas, ‘Ika an maghade samo.’

¹³ Alagad nagsimbag an balagon nin ubas, ‘Maninigo daw na ontokon ko an paggibo nin sakong arak na nakakapaogma sa mga dios-dios asin tawo tangani sanang paghadean kamo?’

¹⁴ Kaya sinabihan kan kakahoyan an binit, ‘Ika an maghade samo.’

¹⁵ Nagsimbag an binit, ‘Kun talagang boot nindo akong gibohon na saindong hade, madya asin sirong kamo sa sakong limpoy. Kun habo kamo, maluwas sa sakong matonok na mga sanga an kalayo na matutong kan mga sedro nin Lebanon.’

¹⁶ “Kaya ngunyan,” padagos ni Jotam, “totoo daw asin tudok sa puso an ginibo nindong pagpili ki Abimelec bilang hade nindo? Iginalang daw nindo an ngaran ni Gideon asin an saiyang pamilya huli kan mga ginibo niya na maninigong igalang?

¹⁷ Giromdoma nindo na nakilaban an sakong ama para saindo. Itinaya niya an saiyang buhay tanganing iligtas kamo sa mga Midianita.

¹⁸ Alagad kinalaban nindo ngunyan an pamilya kan sakong ama; ginadan nindo an setenta niyang aking lalaki sa ibabaw nin saro sanang gapo, asin ginibo nindong hade nin Shekem si Abimelec na aking lalaki ni Gideon sa saiyang sorogoon na babae huli ta kadugo nindo siya.

¹⁹ Kun tunay asin tudok sa puso an ginibo nindo ngunyan ki Gideon asin sa saiyang pamilya, mag-ogma kamo sa kaibahan ni Abimelec dangan mag-ogma siya sa kaibahan nindo.

²⁰ Alagad kun bako, tutongon logod kan kalayo ni Abimelec an mga lalaki nin Shekem asin Bet-millo; asin tutongon logod si Abimelec kan kalayo kan mga lalaki nin Shekem asin Bet-millo.”

²¹ Dangan huli ta takot si Jotam sa tugang niyang si Abimelec, duminulag siya pasiring sa Beer asin duman na nag-erok.

²² Pinamayohan ni Abimelec an Israel sa laog nin tolong taon.

²³ Dangan ginibo nin Dios na magkaanggotan si Abimelec saka an kalalakihan sa Shekem, kaya nagrebelde sinda ki Abimelec.

²⁴ Nangyari ini tanganing si Abimelec asin an kalalakihan sa Shekem, na nagpakosog kan saiyang boot sa paggadan kan setentang aking lalaki ni Gideon, magbayad kan kasalan na saindang ginibo.

²⁵ An kalalakihan sa Shekem nagbugtak sa alitoktok kan mga bukid nin mga mahipa ki Abimelec, asin hinabonan ninda an gabos na nag-agi duman. Nakaabot ki Abimelec an bareta dapit sa gibong ini.

²⁶ Dangan uminabot sa Shekem si Gaal na aking lalaki ni Ebed kaiba an mga tugang niyang lalaki, asin nagsarig saiya an mga tawo duman.

²⁷ Nagduman sinda gabos sa saindang mga ubasan, nagguno nin ubas asin ginibo nindang arak dangan nagpyesta sinda. Nagduman sinda sa templo kan saindang dios-dios saen nagkarakan sinda asin nag-irinom, patin linibak ninda si Abimelec.

²⁸ Nagsabi si Gaal, “Anong klaseng mga lalaki kita digdi sa Shekem? Mas gusto ta pang maglingkod ki Abimelec? Tano, siisay man siya? Bakong naglingkod an aki ni Gideon asin an opisyal niyang si Zebul sa kalalakihan ni Hamor na ama ni Shekem? Kun siring, tano ta pinaglilingkodan ta si Abimelec?

²⁹ Kun ako an mamamayo kan mga tawong ini, papahaleon ko si Abimelec! Sasabihan ko siyang, ‘Pakosoga an saimong hukbo, magluwas ka asin makilaban.’”

³⁰ Naanggot si Zebul, na namamayo kan syudad, kan madangog niya an sinabi ni Gaal na aki ni Ebed.

³¹ Nagpadara siya nin mga sugo ki Abimelec sa Aruma tanganing sabihan na, “Nag-abot sa Shekem si Gaal asin an saiyang mga tugang, dangan pinaparibok ninda an syudad laban saimo.

³² Kaya sa banggi kamo maglakaw dangan magtago sa kaomahan.

³³ Pagkaaga, pagsirang kan aldaw, amay kamong magbangon asin bigla nindong salakayon an syudad. Dangan kun lumaban si Gaal asin an mga kairiba niya, kamo na an bahala sainda!”

³⁴ Kaya sa banggi naghiro si Abimelec asin an gabos niyang tawohan; nagtarago sinda sa luwas kan syudad nin Shekem sa apat na grupo.

³⁵ Pagkaaga, kan mahiling ni Abimelec asin kan mga tawohan niya si Gaal na luminuwas asin tuminindog sa may trangkahan kan syudad, bigla sindang nagruluwas sa saindang pinagtatagoan.

³⁶ Nahiling sinda ni Gaal asin nagsabi ki Zebul, “Hilinga! May mga lalaking naglulugsot hale sa bukid.” “Bako,” an simbag ni Zebul. “Mga anino sana iyan kan kabukidan.”

³⁷ Nagsabi giraray si Gaal, “Hilinga! Igwang mga lalaking naglulugsot hale sa alitoktok kan bukid asin an sarong grupo nagpapasiring digdi hale sa direksyon kan hamurawon na kahoy nin mga parahula!”

³⁸ Dangan sinabihan siya ni Zebul, “Haen na ngunyan an hambog mo kan magsabi kang, ‘Tano ta maglilingkod kita ki Abimelec.’ An mga kalalakihan na iyan iyo an saimong pinaglibak. Ngunyan, luwas na asin labanan mo sinda.”

³⁹ Kaya pinangenotan ni Gaal an kalalakihan kan Shekem asin linabanan ninda si Abimelec,

⁴⁰ alagad nadaog si Gaal kaya nagdulag siya; linamag siya ni Abimelec. Dakul an nagkarulugadan, maski duman sa trangkahan kan syudad.

⁴¹ Nag-erok si Abimelec sa Aruma, asin pinahale ni Zebul sa Shekem si Gaal sagkod an mga tugang niyang lalaki, tanganing dai na mag-erok duman.

⁴² Sunod na aldaw, naaraman ni Abimelec na maduman sa saindang mga oma an mga taga Shekem,

⁴³ kaya ipinag-iba niya an saiyang mga tawohan, pinagtolong grupo, dangan nagtago sa mga oma tanganing maghalat. Kan mahiling niyang nagruluwas an mga tawo sa syudad, nagluwas siya sa saiyang pinagtatagoan tanganing gadanon sinda.

⁴⁴ Mantang hidaling nagdalagan an grupo ni Abimelec pasiring sa trangkahan kan syudad tanganing bantayan idto, an duwang grupo naman an nagsalakay kan mga tawo sa kaomahan asin ginaradan ninda.

⁴⁵ An ralaban nagpadagos sagkod sa hapon. Nasakop ni Abimelec an syudad, ginadan an mga tawo duman, ginaba an syudad dangan tinahoban nin asin an daga.

⁴⁶ Kan an nangyari madangog kan gabos na tawo sa tore kan Shekem, nagtarago sinda sa bantayan kan templo ni Baal-berit.

⁴⁷ Igwang nakapagsabi ki Abimelec na duman sinda nagtiripon,

⁴⁸ kaya nagtukad siya sa Bukid nin Zalmon kaiba an saiyang mga tawohan. Kuminua siya nin patok, nagputol nin sanga nin kahoy asin pinasan. Dangan sinabihan niya an saiyang mga tawohan na maghidali asin arogon an ginibo niya.

⁴⁹ Kaya an lambang saro nagputol nin sanga nin kahoy dangan nagsunod ki Abimelec asin tinarambak ninda an mga sanga sa may bantayan. Sinulo ninda an bantayan kaiba an mga tawo na yaon duman. Nagkagaradan an gabos na tawo sa tore nin Shekem—may sangribong kalalakihan saka kababaehan.

⁵⁰ Pakatapos kaini, nagduman si Abimelec sa syudad nin Tebez, pinalibotan, asin sinakop.

⁵¹ Igwa duman nin sarong pusog na tore asin duman nagralaog an gabos na kalalakihan saka kababaehan kaiba an saindang mga lider. Sinerahan ninda nin marahay an tore asin nagsarakat sinda sa atop.

⁵² Kan salakayon ni Abimelec an tore, nagduman siya sa may pintoan tanganing suloon an tore.

⁵³ Alagad sarong babae an naghulog nin gilingan sa saiyang payo asin napasa an saiyang bungo.

⁵⁴ Inapod ni Abimelec an nagdadara kan saiyang armas asin pinagbotan, “Hugkoton mo an saimong espada asin gadanon mo ako, huli ta habo kong may magsabi na saro sanang babae an guminadan sako.” Binuno siya kan nagdadara kan saiyang armas asin nagadan siya.

⁵⁵ Kan mahiling kan mga Israelita na gadan na si Abimelec, nagpuruli na sinda.

⁵⁶ Sa paaging ini, pinabayad nin Dios si Abimelec kan krimen na ginibo niya laban sa saiyang ama, kan gadanon niya an setenta niyang mga tugang na lalaki.

⁵⁷ Ginibo man nin Dios na magtios an mga taga Shekem huli kan saindang karatan, siring sa maldisyon ni Jotam, na aking lalaki ni Gideon.