Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Ezekiel 8 - Marahay na Bareta Biblia


AN IKADUWANG BISYON NI EZEKIEL ( 8:1–10:22 ) Pagsamba sa mga Dios-dios sa Jerusalem

1 Kan ikalimang aldaw kan ikaanom na bulan kan ikaanom na taon nin samuyang pagkatapokan, mantang nagtutukaw ako sa harong kaiba an mga kamagurangan nin Juda, nag-abot sako an kapangyarihan kan Kagurangnan Dios.

2 Nagtingkalag ako asin nahiling ko an sarong bisyon nin sarong naglalaad na bagay na pormang tawo. Magpoon sa saiyang habayan paibaba, an saiyang hawak garo kalayo asin magpoon sa habayan paitaas, nagliliwanag siya na garo pinakinang na bronse.

3 Inunat niya an garo sarong kamot dangan pinugol ako sa buhok. Dangan sa bisyon na ini, initaas ako kan espiritu nin Dios asin dinara sa Jerusalem. Dinara niya ako sa palaog kan trangkahan sa amihan kan Templo, saen namumugtak an sarong ladawan na sarong insulto sa Dios.

4 Nahiling ko duman an sarong nakasusulang liwanag na nagpapahiling kan presensya kan Dios nin Israel, arog kan bisyon na nahiling ko duman sa tampi kan Salog nin Kebar.

5 Nagtaram sako an Dios, “Aki nin tawo, maghiling ka sa amihan.” Naghiling ako, asin yaon duman harani sa altar, sa may palaog kan trangkahan, an ladawan na sarong insulto sa Dios.

6 Sinabihan ako nin Dios, “Aki nin tawo, nahihiling mo an ginigibo ninda, an makauuyam na mga bagay na ginigibo digdi kan mga Israelita, kun paano ninda ako orog na pinapaharayo sa sakong santwaryo? Alagad makakahiling ka pa nin orog pang makauuyam na mga bagay.”

7 Dinara niya ako sa palaog kan patyong nasa luwas dangan ipinahiling sako an sarong labot sa kudal.

8 Nagsabi siya, “Aki nin tawo, digdi ka lumusot sa kudal.” Naglusot ako sa kudal asin nakanumpong ako nin sarong pintoan.

9 Sinabihan niya ako, “Lumaog ka asin hilingon mo an maraot saka makauuyam na mga bagay na ginigibo ninda duman.”

10 Kaya naglaog ako asin naghiling. An mga lanob igwa nin mga ladawan nin mga halas saka iba pang maating mga hayop, asin iba pang mga bagay na sinasamba kan mga Israelita.

11 Setentang mga kamagurangan nin Israel an idtoon duman, kaiba si Jaazanias na aking lalaki ni Safan. An lambang saro sainda may kapot na insensaryo, asin an asong hale digdi minapaitaas.

12 Hinapot ako nin Dios, “Aki nin tawo, nahiling mo an ginigibo sa hilom kan mga kamagurangan nin Israel? Nagsasamba sinda gabos sa laog nin sarong kwarto na pano nin mga ladawan. Huli ta nagsasabi sinda, ‘Dai kita nahihiling nin Kagurangnan! Pinabayaan na niya an daga.’”

13 Dangan nagsabi sako an Kagurangnan, “Mahihiling mo sindang maggigibo nin orog pang makauuyam na mga bagay.”

14 Kaya dinara niya ako sa trangkahan sa amihan kan Templo asin ipinahiling sako an mga babaeng pinaghihibian an kagadanan kan dios na si Tammuz.

15 Hinapot ako nin Dios, “Aki nin tawo, nahihiling mo iyan? Makakahiling ka pa nin orog na makauuyam na mga bagay.”

16 Kaya dinara niya ako sa patyong nasa laog kan Templo, asin duman sa may pintoan kan santwaryo, sa pagultanan kan patyo asin kan altar, igwa nin beynte y singkong lalaki. Nakatalikod sinda sa santwaryo, asin nakahampang sa sirangan, nagduduko sa pagsamba sa nagsisirang na aldaw.

17 Sinabihan ako kan Kagurangnan, “Aki nin tawo, nahihiling mo iyan? An mga taga Judang ini dai pa nakokontento kan ginigibo nindang makauuyam na mga bagay na nahihiling mo digdi, asin kan pagpalakop nin kadahasan sa bilog na daga. Kundi digdi pa ninda ginigibo an mga iyan sa laog kan Templo asin orog na pinapaanggot ako. Hilinga an pag-olog-olog ninda sako sa paaging orog na nakakapaanggot sako!

18 Mamamatean ninda an gabat kan sakuyang kaanggotan. Dai ko sinda paliligtason o maheherakan. Maski magkurahaw pa sinda sa saindang pagpamibi sa sako, dai ko sinda dadangogon.”

Marahay na Bareta Biblia © Philippine Bible Society, 1992.

Philippine Bible Society
ကြှနျုပျတို့နောကျလိုကျပါ:



ကြော်ငြာတွေ