Ezekiel 2 - Marahay na Bareta Biblia

Inapod nin Dios si Ezekiel na Magin Propeta

¹ Pakahiling ko kaini, nagdapa ako sa daga. Dangan nadangog ko an sarong tingog na nagsasabi, “Aki nin tawo, tumindog ka. Makikiolay ako saimo.”

² Mantang nagtataram an tingog, an espiritu nin Dios naglaog sa sako asin pinatindog ako, dangan nagpadagos sa pagtaram an tingog,

³ “Aki nin tawo, sinusugo taka sa banwaan nin Israel. Nagtumang sinda saka nagtalikod sako; sagkod ngunyan mga rebelde pa sinda arog kan saindang mga ginikanan.

⁴ Matagas an saindang payo asin dai ninda ako ginagalangan, kaya sinusugo taka tanganing sabihan sinda na ini an tataramon ko, an Kagurangnan Dios.

⁵ Magdangog man sinda o dai, maaaraman ninda na igwa nin sarong propeta sa tahaw ninda.

⁶ “Alagad ika, aki nin tawo, dai ka matakot sainda ni sa saindang mga tataramon. Lalabanan ka ninda asin kaoongisan; an pakiiba mo sainda garo pagtukaw sa tahaw nin mga uyang. Alagad dai ka matakot sa saindang tataramon o sa saindang mga hilingon, huli ta mga rebelde sinda.

⁷ Itataram mo sainda an boot kong isabi mo sainda, magdangog man sinda o dai, huli ta mga rebelde sinda.

⁸ “Alagad ika, aki nin tawo, dangoga an itataram ko saimo. Dai ka magrebelde arog sainda. Ngumanga ka asin kakanon mo an itatao ko saimo.”

⁹ Dangan nahiling ko an sarong kamot na nakaunat pasiring sako, na may kapot na sarong libro.

¹⁰ Binukasan kan kamot an libro asin nahiling ko na an mag-ibong kaini pano nin surat—nasusuratan ini nin mga panambitan, mga pagmondo, asin mga pag-agrangay.