Exodo 9 - Marahay na Bareta Biblia

Pagkagadan kan mga Hayop

¹ Nagtaram an Kagurangnan ki Moises, “Dumuman ka sa hade asin sabihan mo siya na nagtaram an Kagurangnan, an Dios kan mga Hebreyo, ‘Tugotan mong humale an sakuyang banwaan tanganing makapagsamba sinda sako.

² Kun magsayuma ka giraray asin padagos na pugolon sinda,

³ papadusahan taka. Papadarahan ko nin makangirhat na helang an gabos mong hayop—an saimong mga kabayo, mga asno, mga kamelyo, mga baka, mga karnero, saka mga kanding.

⁴ Lalaenon ko an mga hayop kan mga Israelita sa mga hayop kan mga Egipcio tanganing mayong magadan sa mga hayop na sadiri kan mga Israelita.

⁵ Ako, an Kagurangnan, nagtatalaan kan oras: sa aga gigibohon ko ini.’”

⁶ Sunod na aldaw, ginibo nin Kagurangnan an saiyang itinaram, kaya nagkagaradan an gabos na hayop kan mga Egipcio alagad mayong nagadan maski saro sa mga hayop kan mga Israelita.

⁷ Nagsugo an hade tanganing siyasaton an nangyari, asin naaraman niya na mayo nin nagadan sa mga hayop kan mga Israelita. Alagad nagmatagas an hade asin dai tinugotan na humale an mga tawo.

Mga Pigsa

⁸ Dangan nagtaram an Kagurangnan ki Moises asin ki Aaron, “Humakbot kamo nin abo sa pogon asin sa atubang kan hade, itapok iyan ni Moises paitaas.

⁹ Malakop an abo sa daga nin Egipto siring sa pinong alpog, asin an lawas kan mga tawo saka mga hayop tutuboan nin mga pigsa na nagnanana.”

¹⁰ Kaya nagkua sinda nin abo sa pogon asin nagtindog sa atubangan kan hade. Itinapok ini ni Moises paitaas asin tinuboan nin mga pigsa na nagnanana an mga tawo saka an mga hayop.

¹¹ An mga salamangkero dai nakahampang ki Moises huli ta lakop man an hawak ninda nin mga pigsa arog kan ibang mga Egipcio.

¹² Alagad pinatagas nin Kagurangnan an puso kan hade, kaya dai kaini dinangog si Moises saka si Aaron, sosog sa itinaram nin Kagurangnan.

Makosog na Uran nin Yelo

¹³ Nagtaram an Kagurangnan ki Moises, “Magduman ka sa hade sa agang amay, asin sabihan mo siya na an Kagurangnan, an Dios kan mga Hebreyo, nagtaram, ‘Tugotan mong humale an sakuyang banwaan tanganing makapagsamba sinda sako.

¹⁴ Ngunyan, bako sana an saimong mga opisyal saka mga nasasakopan an papadusahan ko, kundi sagkod ika, tanganing maaraman mo na mayo nin makakaarog sa sako sa bilog na kinaban.

¹⁵ Garadan na kuta kamo kun ika asin an saimong banwaan sakong pinahelang.

¹⁶ Alagad binuhay taka tanganing ipahiling saimo an sakong kapangyarihan, asin tanganing makalakop sa bilog na kinaban an sakuyang ngaran.

¹⁷ Alagad mapaabaw-abaw ka pa sagkod ngunyan asin habo mo pang tugotan na humale an sakong banwaan.

¹⁸ Sa aga, sa siring kaining oras, papauranan ko nin sarong makosog na uran nin yelo an Egipto na dai pa nadangog sa istorya kan dagang ini.

¹⁹ Kaya ngunyan, ipagboot mo na isirong an saimong mga hayop saka an ano pa man na dapat na isirong, huli ta magagadan an gabos na tawo asin hayop na matamaan kan yelo.’”

²⁰ Natakot sa itinaram nin Kagurangnan an ibang mga opisyal kan hade, kaya pinasirong ninda an saindang mga oripon asin mga hayop.

²¹ Alagad an iba dai natakot sa patanid nin Kagurangnan kaya pinabayaan sa kaomahan an saindang mga oripon asin mga hayop.

²² Dangan nagtaram an Kagurangnan ki Moises, “Unata paitaas an saimong kamot tanganing umuran nin yelo sa bilog na daga nin Egipto asin tumama sa mga tawo, sa mga hayop, dangan sa gabos na tinanom sa kaomahan.”

²³ Kaya itinaas ni Moises an saiyang sugkod, dangan pinadaguldol asin pinakikilat nin Kagurangnan saka pinauranan nin yelo an daga.

²⁴ Makosog nin marahay an uran nin yelo na may kaibang kikilat. Ini an pinakamakosog na pag-uran nin yelo sa bilog na istorya nin Egipto.

²⁵ Naghugpa an yelo sa bilog na daga nin Egipto asin nagkagaradan an dai nakasirong na mga hayop saka tawo. Nagkararaot man an mga tinanom asin nagkabarare an mga kahoy.

²⁶ An rehiyon nin Goshen, na pinag-eerokan kan mga Israelita, iyo sana an lugar na dai hinugpaan nin yelo.

²⁷ Ipinaapod kan hade si Moises saka si Aaron asin sinabihan, “Ngunyan nagkasala ako, an Kagurangnan iyo an tama. Ako asin an sakong banwaan an sala.

²⁸ Mamibi kamo sa Kagurangnan huli ta dai mi na matitios ining pagdaguldol asin pag-uran nin yelo. Nanunuga ako na papahaleon ko na kamo; asin dai na kamo maghahaloy digdi.”

²⁹ Nagsabi si Moises, “Pakaluwas ko sa syudad, iitaas ko an sakong kamot sa pagpamibi sa Kagurangnan. Maontok an pagdaguldol asin an pag-uran nin yelo, tanganing maaraman mong an Kagurangnan iyo an kagsadiri kan kinaban.

³⁰ Alagad aram kong ika asin an saimong mga opisyal dai natatakot sa Kagurangnan Dios.”

³¹ An tanom na lino saka sebada nagkararaot huli ta naghihinog na an sebada asin namumurak na an lino.

³² Alagad maski saro kan trigo dai naano huli ta huri an pagtalubo kaini.

³³ Binayaan ni Moises an hade; nagduman siya sa luwas kan syudad, asin itinaas an saiyang mga kamot sa pagpamibi sa Kagurangnan. Dangan nag-ontok an daguldol, an yelo asin an uran.

³⁴ Kan mahiling kan hade an nangyari, nagkasala naman siya. Nagmatagas siya asin an saiyang mga opisyal.

³⁵ Siring sa itinaram nin Kagurangnan ki Moises, dai tinugotan kan hade na maghale an mga Israelita.