Deuteronomio 33 - Marahay na Bareta Biblia

Benendisyonan ni Moises an mga Tribu nin Israel

¹ Iyo ini an mga bendisyon na ipinahayag ni Moises, an sorogoon nin Dios, sa banwaan nin Israel bago siya nagadan.

² Naghilig hale sa Bukid nin Sinai an Kagurangnan; siring sa aldaw, nagsirang siya sa Edom asin nagliwanag hale sa Bukid nin Paran, kaiba an sampolong ribong mga anghel, na may naglalaad na kalayo sa too niyang kamot.

³ Namomotan nin Kagurangnan an saiyang banwaan; an mga sadiri niya, saiyang inaataman. Kaya nagduduko kita sa saiyang pamitisan, asin nagkukuyog kan saiyang mga kabotan.

⁴ Nagkukuyog kita kan Togon na itinao sato ni Moises; an pinakamahalagang pagsadiri kan satong banwaan.

⁵ Nagin hade an Kagurangnan kan saiyang banwaan na Israel, kan magkatiripon an saindang mga tribu asin mga lider.

⁶ Nagsabi si Moises manongod ki Ruben: “Mabuhay logod si Ruben, dai magadan; dai mag-ina an saiyang mga tawohan.”

⁷ Nagsabi si Moises manongod ki Juda: “Dangoga, an tingog ni Juda, O Kagurangnan, asin isaro mo siya sa saiyang banwaan. Lumaban ka para saiya, O Kagurangnan, asin tabangan mo siya laban sa saiyang mga kaiwal.”

⁸ Nagsabi si Moises manongod ki Levi: “Ipinapahayag mo ki Levi an saimong kabotan sa paagi kan Urim asin Tummim. Binalo mo siya duman sa Massa; saiyang kaimbodan nahiling mo sa katubigan nin Meriba.

⁹ Pinaorog ka niya ki sa saiyang ama asin ina, ki sa mga tugang asin mga aki niya. Kinuyog kan mga Levita an saimong mga kabotan, inotob ninda an saimong tipan.

¹⁰ Huhulitan ninda an saimong banwaan na magkuyog kan saimong katogonan; madolot sinda nin mga atang sa ibabaw kan saimong altar.

¹¹ O Kagurangnan, pakosoga an saindang tribu; akoa an gibo kan saindang mga kamot. Ronota an gabos nindang kaiwal, tanganing dai na makabangon sagkod pa man.”

¹² Nagsabi siya manongod ki Benjamin: “Siya an padangat nin Kagurangnan; inaataman saka binabantayan siya nin Kagurangnan sa bilog na aldaw, patin nag-eerok sa saiyang kaibahan.”

¹³ Nagsabi si Moises manongod ki Jose: “Bendisyonan logod nin Kagurangnan an saiyang daga nin uran hale sa kaitaasan, nin tubig hale sa kairaroman.

¹⁴ Magtao logod an saiyang daga nin mga bungang hinog sa saldang; magyaman sa mga bunga na ginuno sa tamang panahon.

¹⁵ Matahoban logod nin mga piling bunga an mga suanoy na kabukidan, asin an daing tapos na kabubuldan.

¹⁶ Mapano logod an saiyang daga kan gabos na marahay, benendisyonan huli kan karahayan kan Kagurangnan, na nagtaram hale sa nagkakalayong tinanom. Makamtan logod ni Jose an mga bendisyon na ini, huli ta siya an lider sa saindang magturugang.

¹⁷ Igwa kan kosog nin sarong toro si Jose, kan mga sungay nin lalaw na toro. An mga sungay niya iyo an rinibo ni Manases, asin an sampolong rinibo ni Efraim. Ini an isinusuag niya sa mga banwaan, sagkod na makaabot sinda sa mga poro kan kinaban.”

¹⁸ Nagsabi siya manongod ki Zabulon asin ki Issakar: “Mag-uswag logod si Zabulon sa saiyang negosyo sa dagat; magyaman logod si Issakar sa saiyang pinag-eerokan.

¹⁹ Aapodon ninda sa saindang bukid an mga dayuhan sa pagdolot duman nin maninigong atang. Kinukua ninda sa dagat an saindang yaman, asin sa mga baybay kan kadagatan.”

²⁰ Nagsabi si Moises manongod ki Gad: “Pag-omawon an Dios na nagpadakula kan daga ni Gad. Naghahalat si Gad siring sa sarong leon, tanganing takyag o payo saiyang ronoton.

²¹ Kinua niya an pinakamarahay na parte kan daga; kahirasan nin sarong namamayo an napasaiya. Kinuyog niya an mga pagboot nin Kagurangnan saka mga togon, kan an mga lider nin Israel magkatiripon.”

²² Nagsabi si Moises manongod ki Dan: “Si Dan sarong ogbon na leon na naglulukso hale sa Basan.”

²³ Nagsabi siya manongod ki Neftali: “Benendisyonan nin Kagurangnan si Neftali, pinano kan saiyang biyaya. Abot sa habagat an saiyang daga magpoon sa Danaw nin Galilea.”

²⁴ Nagsabi si Moises manongod ki Asher: “Orog na paladan si Asher sa gabos na aki; padangaton logod siya kan saiyang mga tugang. Magyaman logod sa oliba an saiyang daga.

²⁵ Mga banwa niya kudalon logod nin lansang; mag-erok logod siya na daing kahandalan.”

²⁶ O Israel, daing kabaing an saindong Dios, na nakasakay sa panganoron; sa kamurawayan, minahilig siya hale sa langit tanganing kamo tabangan.

²⁷ An daing tapos na Dios an saindong erokan; an saiyang mga kamot an saindong kakosogan. Inalaw niya an kaiwal sa saindong pagdangadang, asin nagtaram siya na sa saindong kamot sinda magagadan.

²⁸ Kaya an Israel nag-eerok sa katoninongan, sa daga na mayaman sa ani asin sa arak, na binabaribi kan ambon nin kalangitan.

²⁹ Paladan ka, O Israel! Mayo nin arog saimo, banwaan na ilinigtas nin Kagurangnan. Siya iyo an kalasag kan saimong tabang, an saimong espada nin kapangganahan. Madolok asin makikimaherak saimo an mga kaiwal, alagad sinda saimong titimaktimakan.