Daniel 1 - Marahay na Bareta Biblia

AN ISTORYA NI DANIEL ASIN KAN SAIYANG MGA KATOOD ( 1:1–6:28 ) An mga Hoben na Lalaki sa Palasyo ni Nebukadnezzar

¹ Sa ikatolong taon kan paghahade ni Jehoiakim sa Juda, sinalakay ni Hadeng Nebukadnezzar nin Babilonia an Jerusalem asin pinalibotan an syudad.

² Itinugot nin Kagurangnan na mabihag si Hadeng Jehoiakim ni Hadeng Nebukadnezzar asin samsamon kaini an nagkapirang kagamitan kan Templo. An nagkapirang bihag dinara niya sa templo kan saiyang mga dios sa Babilon, asin an mga nasamsam na kagamitan ibinugtak niya sa mga sarayan kan templo.

³ Pinagbotan kan hade si Aspenaz, an saiyang pangenot na opisyal, na magpili nin nagkapirang hoben na lalaki hale sa kadaklan kan Israelitang nabihag. An mga hoben na lalaking ini hale sa pamilya kan hade asin kan mga prinsipe.

⁴ Kaipuhan na gwapo an mga ini, madonong, may pakasabot, madaling makanood, asin mayo nin kaninan, tanganing maninigo sindang maglingkod sa palasyo. Si Aspenaz iyo an matukdo sainda sa pagbasa asin sa pagsurat kan lengwahe kan mga taga Babilonia.

⁵ Nagboboot man an hade na tawan sinda aroaldaw kan parehong pagkakan saka arak na itinatao sa pamilya kan hade. Pakalihis nin tolong taon nin pag-aadal, maatubang sinda sa hade.

⁶ Kaiba sa mga napili iyo si Daniel, Hananias, Misael asin Azarias, na gabos hale sa tribu ni Juda.

⁷ An mga ini tinawan nin bagong ngaran kan pangenot na opisyal: si Daniel inapod Beltesazzar; si Hananias, Sadrak; si Misael, Mesak; asin si Azarias, Abednego.

⁸ Nagdesisyon si Daniel na dai niya didigtaan an sadiri huli sa pagkakan kan kakanon asin sa pag-inom kan arak na hale sa palasyo, kaya hinagad niya ki Aspenaz na tabangan siya.

⁹ Ginibo nin Dios na mawilihan asin maherakan si Daniel ni Aspenaz.

¹⁰ Alagad takot sa hade si Aspenaz, kaya nagsabi siya ki Daniel, “Itinalaan kan hade kun ano an saindong kakakanon saka iinomon, asin kun mahiling niya kamong maluya ki sa ibang hoben na mga lalaki, tibaad gadanon niya ako.”

¹¹ Kaya nagduman si Daniel sa bantay na ibinugtak ni Aspenaz na mangataman ki Daniel asin sa tolo niyang katood dangan nagsabi,

¹² “Baloa kami sa laog nin sampolong aldaw; tawan mo sana kami nin gulay na makakakan saka tubig na maiinom,

¹³ dangan ikomparar mo kami sa hoben na mga lalaking nagkakakan kan hale sa palasyo, asin magdesisyon ka sosog sa saimong mahiling.”

¹⁴ Nag-oyon an bantay na baloon sinda sa laog nin sampolong aldaw.

¹⁵ Pakalihis kaini, nahiling sindang orog na marahay an hawak saka makosog ki sa mga nagkakan kan hale sa palasyo.

¹⁶ Kaya poon kaidto nagtugot an bantay na magkakan sinda nin gulay embes kan itinataong pagkakan kan hade.

¹⁷ Tinawan nin Dios an apat na hoben na lalaki nin pakaaram asin kabatiran sa literatura saka sa pilosopiya. Laen pa kaini, tinawan pa nin Dios si Daniel nin kadonongan sa pagpaliwanag kan mga bisyon saka mga pangatorogan.

¹⁸ Pakalihis kan tolong taon na itinalaan kan hade, an gabos na hoben na lalaki dinara ni Aspenaz ki Nebukadnezzar.

¹⁹ Kinaolay sinda gabos kan hade, asin nahiling niyang mas marahay ki sa gabos si Daniel, Hananias, Misael, asin Azarias, kaya sinda an napiling maglingkod sa hade.

²⁰ Maski anong hapot o problema an itao kan hade, an apat na ini iyo an may sampolong beses na naaaraman ki sa arin man na parahula o salamangkero sa bilog niyang kahadean.

²¹ Padagos na naglingkod si Daniel sa palasyo sagkod na an Babilonia nasakop ni Ciro na emperador nin Persia.