Awit nin mga Awit 8 - Marahay na Bareta Biblia

¹ Mawot kong nagin tugang na lalaki taka, na nagsuso sa daghan nin sakong ina. Dangan kun manumpongan taka sa tinampo, mahahadokan taka asin mayo nin maanggot sako.

² Ipag-iiba taka sa harong nin sakong ina, saen tutukdoan mo ako dapit sa pagkamoot. Tatawan taka nin masiram na arak, sakong arak na hale sa granada tanganing saimong inomon.

³ An wala niyang kamot nauulonan ko, asin nakukugos ako kan saiyang too.

⁴ Magsumpa kamo, mga babae nin Jerusalem, na dai nindo oontokon an samong pagkamoot.

An Ikaanom na Awit An mga Babae

⁵ Siisay ining nagdadangadang hale sa kalangtadan, na nakasandig sa saiyang namomotan? Sa irarom nin kahoy na mansanas pinukaw taka, sa lugar na namundagan mo.

An Babae

⁶ Giboha akong sarong tanda sa saimong puso, sarong tanda sa saimong braso; huli ta an pagkamoot siring kakosog sa kagadanan, an pag-imon makuri siring sa lulubngan. An mga kikilat kaiyan gabos kikilat nin kalayo, sarong nagkakarabang kalayo.

⁷ An laad nin pagkamoot dai mapapalsok kan katubigan, ni malalamos nin mga baha. Alagad kun baloon nin sarong lalaki na bakalon an pagkamoot nin kwarta, pagtuyatuya an saiyang makukua.

An mga Tugang na Lalaki kan Babae

⁸ Igwa kaming sadit na tugang na babae, asin sadit pa an saiyang mga suso. Ano an magigibo mi para saiya sa aldaw na igwa na nin hoben na lalaking boot mag-agom saiya?

⁹ Kun siya sarong kudal, itutugdok mi siya nin sarong toreng plata. Alagad kun siya sarong trangkahan, tatahoban mi siya nin mga tablang sedro.

An Babae

¹⁰ Ako sarong kudal, asin an sakong mga suso iyo an mga tore kaiyan. Nakakaaram an sakong namomotan na sa kaibahan niya nakakanumpong ako nin kaogmahan asin katoninongan.

An Lalaki

¹¹ Igwa si Solomon nin ubasan sa lugar na inaapod Baal-hamon. Inaarkila iyan saiya kan mga paraoma; an lambang saro minabayad nin sangribong pedaso nin plata.

¹² An sakong ubasan, an sadiri ko, para sako sana; ika, O Solomon, saimo na an sangribong pedaso nin plata, asin kamong mga paraoma, an dos syentos bilang saindong kahirasan.

¹³ Padangogan sako an saimong tingog hale sa tatamnan, sakong namomotan; an sakong mga kairiba naghahalat sa pagdangog kan saimong pagtaram.

An Babae

¹⁴ Madya, sakong namomotan, maghidali ka siring sa usa, siring sa ogbon na usa sa kabukidan, saen nagtatalubo an mga pahamot.