Amos 7 - Marahay na Bareta Biblia

Sarong Bisyon nin mga Doron

¹ Nagkaigwa ako nin sarong bisyon na hale sa Kagurangnan Dios. Sa bisyon na iyan nahiling ko siyang naglalalang nin kadakul na doron kan naputol na an mga dagaming kahirasan kan hade, asin kan nagpopoon nang magtalubo an doot.

² Sa sakong bisyon nahiling kong kinakakan kan mga doron an gabos na tinanom sa bilog na daga, dangan nagsabi ako, “Kagurangnan Dios, patawada an saimong banwaan! Paano sinda mabubuhay? Saradit sinda nin marahay saka maluluya!”

³ Nagbago nin isip an Kagurangnan asin nagsabi, “Dai mangyayari an saimong nahiling.”

Sarong Bisyon nin Kalayo

⁴ Nagkaigwa pa ako nin sarong bisyon hale sa Kagurangnan Dios. Sa bisyon na iyan nahiling kong nag-aandam siya sa pagpadusa kan saiyang banwaan sa paagi nin kalayo. An dakulang dagat sa irarom kan daga nagmara huli sa init kan kalayo asin nasulo na an daga.

⁵ Dangan nagsabi ako, “O Kagurangnan Dios, nakikimaherak ako na omontok ka. Paano mabubuhay an saimong banwaan? Saradit sinda nin marahay saka maluluya!”

⁶ Nagbago nin isip an Kagurangnan asin nagsabi, “Dai man iyan mangyayari.”

Sarong Bisyon nin Sarong Plumo

⁷ Nagkaigwa pa ako nin sarong bisyon hale sa Kagurangnan. Sa bisyon na iyan, nahiling ko siyang nagtitindog sa kataed nin sarong lanob na ginamitan nin plumo asin may kapot siyang sarong plumo.

⁸ Hinapot niya ako, “Amos, ano an nahihiling mo?” Nagsimbag ako, “Sarong plumo.” Dangan nagtaram siya, “Ginagamit ko ining plumo tanganing ipahiling na arog sa kiling na lanob an sakong banwaan. Dai ko na babagohon an sakong isip dapit sa pagpadusa sa sainda.

⁹ Mararaot an mga lugar na pinagsasambahan kan kapagarakian ni Isaac. Magkakagaraba an mga banal na lugar nin Israel. Tataposon ko an paghahade kan lahi ni Hadeng Jeroboam.”

Si Amos asin si Amazias

¹⁰ Dangan nagpatogon si Amazias, an padi nin Betel, ki Hadeng Jeroboam: “Igwa nin pinaplano laban saimo si Amos sa tahaw kan banwaan. An mga pahayag niya iyo an maraot kan daga.

¹¹ Ini an saiyang sinasabi, ‘Magagadan sa gera si Jeroboam, asin an banwaan nin Israel itatapok harayo sa saindang daga.’”

¹² Pakatapos, sinabihan ni Amazias si Amos, “Omontok ka na, propeta! Magbalik ka sa Juda asin duman ka magpabayad sa saimong paghuhulit.

¹³ Dai ka na nanggad magpropesiya digdi sa Betel. Iyo ini an lugar na pinagsasambahan kan hade, an templo kan bilog na kahadean.”

¹⁴ Nagsimbag si Amos, “Bako ako an propeta na nagpopropesiya huli sa bayad. Saro akong pastor nin mga hayop, asin nag-aataman ako nin mga kahoy na higera.

¹⁵ Alagad hinale ako nin Kagurangnan sa trabahong iyan dangan pinagbotan niya ako na magdigdi dangan magpropesiya sa saiyang banwaan nin Israel.

¹⁶ Kaya dangoga ngunyan kun ano an sinasabi nin Kagurangnan. Pinapaontok mo ako sa pagpropesiya, sa pagtaram laban sa banwaan nin Israel.

¹⁷ Amazias, sinasabihan ka nin Kagurangnan, ‘An saimong agom magigin sarong maraot na babae sa mga tinampo asin magagadan sa gera an saimong kaakian. Pagbabarangaon kan iba an saimong daga asin magagadan ka sa sarong paganong daga. Dangan itatapok an banwaan nin Israel harayo sa saindang daga.’”