2 Mga Hade 14 - Marahay na Bareta Biblia

Si Hadeng Amazias nin Juda

¹ Kan ikaduwang taon kan paghahade ni Jehoas na aking lalaki ni Jehoahaz sa Israel, nagin hade nin Juda si Amazias na aking lalaki ni Joas.

² Beynte y singkong taon an edad ni Amazias kan siya magin hade, asin beynte y nuebeng taon siyang naghade sa Jerusalem. An saiyang ina iyo si Jehoaddin na taga Jerusalem.

³ Ginibo niya an matanos sa atubangan nin Kagurangnan, alagad bako siya arog sa saiyang ginikanan na si Hadeng David, huli ta inarog niya an ginibo kan saiyang ama na si Joas.

⁴ Dai niya ginaba an paganong mga lugar na pagsasambahan, kaya nagpadagos an mga tawo sa pagdolot nin mga sakripisyo asin sa pagtutong nin insenso duman.

⁵ Kan pusog na an saiyang kapangyarihan bilang hade, ipinagadan ni Amazias an mga opisyal na guminadan sa saiyang ama.

⁶ Alagad dai niya ipinagadan an mga aki ninda, kundi sinunod niya an pagboot nin Kagurangnan sa katogonan ni Moises: “An mga magurang dai gagadanon para sa kasalan na ginibo kan saindang mga aki, ni an mga aki para sa kasalan na ginibo kan saindang mga magurang. An sarong tawo gagadanon para sa kasalan na siya nanggad an naggibo.”

⁷ Ginadan niya an dyes mil na Edomita sa Kapantayan nin Asin; sinakop niya an syudad nin Sela asin inapod ining Jokteel, na iyo an ngaran kaini ngunyan.

⁸ Nagpadara si Amazias nin mga sugo sa hade nin Israel na si Jehoas na aking lalaki ni Jehoahaz asin makoapo ni Jehu, dangan ipinasabi, “Madya, asin maghampangan kita sa gera.”

⁹ Ipinadara ni Jehoas ki Amazias an simbag na ini, “Sarong binit sa Lebanon an nagsabi sa sarong sedro sa Lebanon, ‘Ipakasal mo an aki mong babae sa aki kong lalaki.’ Alagad sarong lalaw na hayop an nag-agi dangan tinimaktimakan an binit.

¹⁰ Naghahambog ka ngunyan, Amazias, huli ta nadaog mo an mga Edomita. Magmuraway ka sa saimong kabantogan asin mag-erok ka sa saimong harong. Tano ta naghahanap ka nin ribok na marumpag saimo kaiba an bilog na Juda?”

¹¹ Alagad habong magdangog si Amazias. Kaya nagluwas si Hadeng Jehoas asin inatubang si Hadeng Amazias duman sa Bet-semes sa Juda.

¹² Nadaog an hukbo nin Juda asin nagdurulag an saiyang mga soldados pasiring sa saindang harong.

¹³ Nabihag ni Jehoas si Amazias, dangan nagpasiring siya sa Jerusalem. Rinumpag niya an kudal nin Jerusalem magpoon sa Trangkahan nin Efraim sagkod sa Trangkahan nin Kanto, na minaabot sa dos syentos metros an distansya.

¹⁴ Sinamsam niya an gabos na bulawan saka plata, an gabos na kasangkapan sa Templo sagkod an gabos na kayamanan sa palasyo. An gabos na ini dinara niya pagbalik sa Samaria kaiba an dakul na bihag.

¹⁵ An iba pang ginibo ni Jehoas, sagkod an saiyang kaisogan sa gera laban ki Hadeng Amazias nin Juda gabos nasusurat sa An Kasaysayan kan mga Hade nin Israel.

¹⁶ Nagadan si Jehoas asin ilinubong sa lulubngan kan mga hade sa Samaria. Si Jeroboam Ika Duwa na saiyang aking lalaki iyo an nagsalihid saiya bilang hade.

An Pagkagadan ni Hadeng Amazias nin Juda

¹⁷ Si Amazias na hade nin Juda nabuhay pa sa laog nin kinseng taon pakagadan ni Jehoas na hade nin Israel.

¹⁸ An iba pang ginibo ni Amazias gabos nasusurat sa An Kasaysayan kan mga hade nin Juda.

¹⁹ Nagkaigwa nin plano laban ki Amazias duman sa Jerusalem kaya nagdulag siya pasiring sa Lakis. Alagad linamag siya duman kan saiyang mga kaiwal dangan ginadan.

²⁰ An saiyang bangkay dinara sa Jerusalem sa ibabaw nin sarong kabayo dangan ilinubong sa Syudad ni David, sa lulubngan kan mga hade.

²¹ Pakatapos, pinili kan bilog na banwaan nin Juda an aking lalaki ni Amazias na si Uzzias, na an edad dyes y seis na taon, na magin kasalihid kan saiyang ama bilang hade.

²² Pagkagadan ni Amazias, nabawi ni Uzzias an Elat dangan hinirahay niya an syudad.

Si Hadeng Jeroboam Ika Duwa nin Israel

²³ Kan ikakinseng taon kan paghahade ni Amazias na aking lalaki ni Joas, nagin hade nin Israel si Jeroboam na aking lalaki ni Jehoas; kwarenta y unong taon siyang naghade sa Samaria.

²⁴ Ginibo niya an maraot sa atubangan kan Kagurangnan huli ta sinunod niya an maraot na paarog ni Hadeng Jeroboam na aking lalaki ni Nebat, na nagpakasala sa Israel.

²⁵ Nabawi niya an gabos na teritoryo na pagsadiri kan Israel, magpoon sa dalan nin Hamat sagkod sa Gadan na Dagat, sosog sa tataramon nin Kagurangnan, an Dios nin Israel, kan siya magtaram sa paagi kan sorogoon niyang si Propeta Jonas na aking lalaki ni Amitai, na taga Gat-hefer.

²⁶ Nahiling nin Kagurangnan an makuring pagtios kan mga Israelita; maski saro mayo nin pwedeng magtabang sainda.

²⁷ Alagad bakong katuyohan nin Kagurangnan na paraon sa kinaban an Israel, kaya ilinigtas niya ini sa paagi ni Jeroboam Ika Duwa na aki ni Jehoas.

²⁸ An iba pang ginibo ni Jeroboam Ika Duwa, an saiyang kaisogan, an saiyang mga pakigera, asin an pagkabawi niya sa Damasco saka sa Hamat para sa Israel, gabos nasusurat sa An Kasaysayan kan mga Hade nin Israel.

²⁹ Nagadan si Jeroboam asin ilinubong sa lulubngan kan mga hade. Si Zacarias na saiyang aking lalaki iyo an nagsalihid saiya bilang hade.