2 Mga Cronica 35 - Marahay na Bareta Biblia

Nagselebrar si Josias kan Paskwa

¹ Nagselebrar si Josias kan Paskwa duman sa Jerusalem sa pag-omaw sa Kagurangnan. Kan ikakatorseng aldaw kan enot na bulan binuno ninda an korderong Pangpaskwa.

² Itinao niya sa mga padi an saindang mga katongdan sa Templo, asin sinadol niya sinda na pakarahayon an saindang paglingkod.

³ Hinulitan niya an mga Levita, an mga paratukdo nin Israel, na kinonsagra para sa Kagurangnan. Sinabihan niya sinda, “An banal na Kaban nin Tipan ibugtak nindo sa Templo na ipinatugdok ni Solomon na aki ni David. Dai na nindo iyan pagparadarahon sa manlaen-laen na lugar, kundi paglingkodan nindo an Kagurangnan na saindong Dios asin an Israel na saiyang banwaan.

⁴ Magduman kamo sa lugar na itinalaan saindo sa laog kan Templo sosog sa saindong mga kamaganakan saka sosog sa mga katongdan na itinao ni Hadeng David asin ni Solomon na saiyang aki.

⁵ Andamon nindo an saindong mga sadiri tanganing magin an siisay man makatabang sa lambang pamilya kan banwaan nin Israel.

⁶ Bunoon nindo an korderong Pangpaskwa. Magpakabanal kamo asin andamon nindo an mga sakripisyo, tanganing an kapwa nindo mga Israelita magsunod kan mga katukdoan na itinao nin Kagurangnan sa paagi ni Moises.”

⁷ Para sa kaipuhan kan mga tawo sa Paskwa, nagtao si Hadeng Josias nin treynta mil na karnero, kordero, saka mga ogbon na kanding asin tres mil na torong baka. Ini gabos hale sa pagsadiri niyang mga hayop.

⁸ An saiyang mga opisyal boluntad man na nagtao para sa mga tawo, sa mga padi, saka sa mga Levita. Si Hilkias, an Halangkaw na Padi, si Zacarias saka si Jehiel, an mga opisyal na namamahala kan Templo, nagtao man nin dos mil seis syentos na kordero saka mga ogbon na kanding asin tres syentos na torong baka para sa mga sakripisyo.

⁹ An mga lider kan mga Levita na si Conanias, Semaias saka si Netanel na tugang kaini, si Hasabias, si Jeiel, asin si Jozabad nagtao man nin singko mil na kordero saka mga ogbon na kanding asin kinyentos na torong baka na gagamiton kan mga Levita bilang mga dolot sa Paskwa.

¹⁰ Kan andam na an gabos para sa Paskwa, nagduman sa saindang mga lugar an mga padi saka an mga Levita sosog sa pagboot sainda kan hade.

¹¹ Pakabuno kan korderong Pangpaskwa, inanitan kan mga Levita an mga hayop mantang an dugo kaini iwinirik kan mga padi sa altar.

¹² Dangan an mga hayop para sa tinutong na atang binaranga ninda sa mga tawo, sosog sa saindang mga pamilya, tanganing idolot sa Kagurangnan, sosog sa nasusurat sa libro ni Moises.

¹³ Dinarang kan mga Levita an korderong Pangpaskwa sosog sa pagboot; an mga banal na dolot linabonan ninda sa mga kaldero, mga kawa saka mga kawali, dangan hidaling itinao sa mga tawo.

¹⁴ Pakatapos kaini, nagkua man sinda nin karnero para sa saindang sadiri asin para sa mga padi, na mga aki ni Aaron, huli ta sibot an mga padi sagkod banggi sa pagdolot kan mga tinutong na atang saka kan taba kan mga sakripisyo.

¹⁵ An mga Levitang parakanta, na mga kamaganakan ni Asaf, yaon man sa lugar na itinalaan sainda ni Hadeng David. An mga ini iyo si Asaf, si Heman, saka si Jedutun, an propeta kan hade. An mga bantay yaon sa trangkahan na talaan para sainda; dai sinda naghale huli ta an saindang Paskwa inandam para sainda kan mga tugang nindang Levita.

¹⁶ Kaya siring sa pagboot ni Hadeng Josias, an gabos inandam kan aldaw na idto para sa pagsamba sa Kagurangnan, sa pagselebrar kan Paskwa asin sa pagdolot kan mga tinutong na atang sa ibabaw kan altar.

¹⁷ Sa laog nin pitong aldaw, an gabos na Israelita na yaon duman nagselebrar kan Paskwa asin kan Pyesta kan Tinapay na Mayo nin Lebadura.

¹⁸ Magpoon kan panahon ni propeta Samuel, dai pa lamang nagselebrar kan Paskwa an Israel na arog kaini. Mayo lamang sa mga nagin hade nin nagselebrar kan Paskwa arog kan pagselebrar na ini ni Hadeng Josias, kan mga padi saka kan mga Levita, asin kan mga banwaan nin Juda, Israel saka Jerusalem.

¹⁹ An pagselebrar na ini ginibo kan ikadyes y otsong taon kan paghahade ni Josias.

An Kataposan kan Paghahade ni Josias

²⁰ Pakatapos na magibo ni Josias an gabos na ini para sa Templo, pinangenotan ni Neco na hade nin Egipto an sarong hukbo tanganing makilaban duman sa Carkemis sa Salog nin Eufrates; inatubang siya ni Hadeng Josias.

²¹ Alagad nagpadara nin mga sugo ki Josias si Neco na an sabi, “Tadaw ta nakikilabot ka sako, Hade nin Juda? Dai ako nagdigdi tanganing makilaban saimo, kundi sa sakong mga kaiwal asin pinapahidali ako nin Dios. Dai mo pagsalungaton an Dios na nasa kaibahan ko, ta tibaad ronoton ka niya.”

²² Alagad boot nanggad na makilaban si Josias. Dai niya dinangog an tataramon nin Dios sa paagi ni Hadeng Neco. Nagsagin-sagin siya na bakong hade dangan nagduman sa kapantayan nin Meggido tanganing makilaban.

²³ Sa ralaban, napana si Hadeng Josias, kaya sinabihan niya an saiyang mga sorogoon, “Halea ako digdi, huli ta makuri an pagkalugad sakuya!”

²⁴ Kaya hinale siya ninda sa karwahe dangan ibinugtak sa saro pa niyang karwahe saka dinara sa Jerusalem. Duman siya nagadan asin ilinubong sa lulubngan kan mga hade. An saiyang pagkagadan pinagmondoan kan bilog na Juda saka Jerusalem.

²⁵ Sarong panambitan an ginibo ni Jeremias para ki Josias. Poon kaidto nagin kaugalean na an pag-awit kan panambitan na ini kan parakantang mga lalaki saka mga babae, kun nagmomondo sinda para ki Josias; ginibo ining sarong pagboot sa Israel. An awit na ini makukua sa libro nin mga panambitan.

²⁶ An iba pang ginibo ni Josias—an saiyang mga marahay na gibo sosog sa nasusurat sa Katogonan nin Kagurangnan,

²⁷ an saiyang kasaysayan poon sa kapinonan sagkod sa kataposan—gabos nasusurat sa An Kasaysayan kan mga Hade nin Israel saka Juda.