2 Mga Cronica 20 - Marahay na Bareta Biblia

Pakigera sa Edom

¹ Pakalihis nin nagkapirang panahon, nagsalakay sa Juda an mga Moabita saka mga Ammonita, kaiba an nagkapirang mga Meunita.

² Nagkapirang sugo an nag-abot asin nagsabi ki Jehosafat, “Sarong dakulang hukbo na hale sa Edom an nagdadangadang hale sa ibong kan Gadan na Dagat sa pagsalakay saimo; yaon na sinda sa Hazazon-tamar.” (Saro pang ngaran ini kan Engedi.)

³ Natakot si Jehosafat asin namibi sa Kagurangnan. Nagboot siya nin pag-ayuno sa bilog na Juda.

⁴ Hale sa gabos na syudad nin Juda, nagtiripon sa Jerusalem an gabos na tawo tanganing maghagad nin tabang sa Kagurangnan.

⁵ Sinda asin an gabos na taga Jerusalem nagtiripon sa bagong patyo kan Templo nin Kagurangnan. Nagtindog si Jehosafat sa atubangan kan gabos

⁶ asin namibi, “O Kagurangnan, Dios nin samuyang mga ginikanan, ika an Dios sa langit na naghahade kan gabos na kahadean sa kinaban! Nasa saimong kamot an kosog asin kapangyarihan, kaya mayo nin makakatumang saimo.

⁷ Ika an samuyang Dios. Kan magdangadang sa dagang ini an Israel na saimong banwaan, pinahale mo an mga nag-eerok digdi asin itinao mo ini sa mga kapagarakian ni Abraham na saimong katood, tanganing masadirihan ninda sagkod pa man.

⁸ Nag-erok sinda digdi saka nagpatugdok nin sarong templo para sa kaomawan mo, huli ta aram ninda

⁹ na kun mag-abot sainda bilang padusa an karatan, an gera, an peste o gutom, pwede sindang magdigdi saka magtindog sa atubangan kan Templong ini na pinagsasambahan saimo. Pwede sindang magpamibi saimo sa saindang kasakitan, asin dadangogon mo sinda saka ililigtas.

¹⁰ “Sinalakay kami ngunyan kan mga taga Ammon, Moab saka Edom. Kan magluwas sa Egipto an samong mga ginikanan, dai mo sinda tinugotan na maglaog sa mga lugar na idto, kaya linihisan ninda iyan asin dai rinaot.

¹¹ Siring kaini an pagbalos ninda samo—na kami pahaleon sa dagang ini na itinao mo samuya.

¹² Ika an samuyang Dios! Padusahan mo sinda, huli ta mayo kami nin kosog na atubangon an dakulang hukbo na ini na nagsasalakay samo. Dai mi aram kun ano an samong gigibohon, alagad minalaom kami na tatabangan mo kami.”

¹³ Nagtirindog duman sa atubangan nin Kagurangnan an gabos na lalaki nin Juda, kaiba an saindang mga agom saka mga aki.

¹⁴ Dangan an espiritu nin Kagurangnan nag-abot sa sarong Levita na nasa katiriponan. Siya si Jahaziel na aking lalaki ni Zacarias; kaayon siya sa kamaganakan ni Asaf huli kan saiyang lolo na si Benaias, na aking lalaki ni Jeiel, na aking lalaki ni Matanias.

¹⁵ Nagtaram si Jahaziel, “Dangoga, O Hadeng Jehosafat, asin kamo gabos na taga Juda saka taga Jerusalem! Nagtataram an Kagurangnan na dai kamo manluya o matakot sa atubang kan dakulang hukbong ini; huli ta bakong saindo an gerang ini kundi sa Dios.

¹⁶ Salakayon nindo sinda sa aga mantang nagtutukad sinda sa Tukadon nin Ziz. Manunumpongan nindo sinda sa poro kan kapantayan, sa sirangan na parte kan kalangtadan nin Jeruel.

¹⁷ Dai kaipuhan na labanan nindo sinda sa gerang ini. Mag-ontok sana kamo sa tamang lugar, dai maggibo nin anoman asin mahihiling nindo an kapangganahan nin Kagurangnan para saindo. Banwaan nin Juda asin Jerusalem, dai kamo manluya o matakot. Lumuwas kamo sa pakilaban sainda, asin iibahan kamo nin Kagurangnan!”

¹⁸ Dangan nagdapa si Jehosafat asin an gabos na taga Juda saka mga taga Jerusalem sa pagsamba sa Kagurangnan.

¹⁹ An mga Levita na kaayon sa mga kamaganakan ni Kohat saka ni Kora nagtirindog saka nagkurahaw nin makosog sa pag-omaw sa Kagurangnan, an Dios nin Israel.

²⁰ Pagkaagang amay, an mga tawo nagduruman sa kalangtadan nin Tekoa. Mantang paluwas na sinda, nagtindog si Jehosafat dangan nagsabi, “Mga taga Juda asin mga taga Jerusalem, dangoga nindo ako! Magtubod kamo sa Kagurangnan na saindong Dios asin dai kamo mahihiro; magtubod kamo sa saiyang mga propeta asin manggagana kamo.”

²¹ Pakatapos niyang makihumapot sa mga tawo, pinagbotan niya an mga maawit nin pag-omaw sa Kagurangnan na magsulot kan gubing na pangpyesta, dangan pangenotan an hukbo mantang nag-aawit nin siring: “Omawon an Kagurangnan, huli ta an saiyang pagkamoot nagdadanay sagkod pa man.”

²² Kan nagpoon na sindang mag-awit, ginibo nin Kagurangnan na magkariribong an mga hukbo nin Ammon, Moab saka Edom.

²³ Sinalakay kan mga Ammonita saka mga Moabita an mga Edomita sagkod na magkagaradan an mga ini. Dangan naghampangan an mga Ammonita saka an mga Moabita asin maringis sindang naglaban.

²⁴ Kan an mga taga Juda magduman sa sarong toreng bantayan duman sa kalangtadan, tinanaw ninda an mga hukbo kan kaiwal asin nahiling nindang gadan na an gabos asin an mga bangkay nagkahurutad sa daga; mayo nin siisay man na nakadulag.

²⁵ Nagdolok si Jehosafat asin an saiyang hukbo tanganing samsaman an mga kaiwal. Nakakua sinda nin dakul na baka, mga kagamitan, mga gubing asin iba pang mahalagang mga bagay. Inabot sinda nin tolong aldaw sa panamsam alagad dai ninda naubos huli ta dakul nin marahay.

²⁶ Kan ikaapat na aldaw, nagtiripon sinda sa Kapantayan nin Beraca dangan nag-omaw sa Kagurangnan; kaya sagkod ngunyan an lugar na idto inaapod “Beraca”.

²⁷ Si Jehosafat asin an saiyang hukbo maogmang nagbalik sa Jerusalem, huli ta dinaog nin Kagurangnan an saindang mga kaiwal.

²⁸ Pag-abot ninda sa syudad, nagduman sinda sa Templo nin Kagurangnan mantang nagtutugtog nin mga arpa, lira, saka mga trompeta.

²⁹ Natakot an gabos na nasyon na nakadangog kun paano dinaog nin Kagurangnan an mga kaiwal nin Israel.

³⁰ Kaya nagin matoninong an paghahade ni Jehosafat huli ta ilinikay siya nin Dios sa anoman na pag-alaman sa palibot niya.

An Kataposan kan Paghahade ni Jehosafat

³¹ Siring kaini an paghade ni Jehosafat sa Juda. Treynta y singkong taon an edad niya kan siya magin hade, asin beynte y singkong taon siyang naghade sa Jerusalem. An saiyang ina iyo si Azuba na aki ni Silhi.

³² Arog sa saiyang ama na si Asa, ginibo niya an matanos sa atubang nin Kagurangnan.

³³ Alagad dai niya ginaba an paganong mga lugar na pagsasambahan asin an mga tawo bakong bilog sa pusong nagsamba sa Dios nin saindang mga ginikanan.

³⁴ An iba pang ginibo ni Jehosafat, poon sa kapinonan sagkod sa kataposan, gabos nasusurat sa An Kasaysayan ni Jehu na Aking Lalaki ni Hanani, na kabtang kan An Kasaysayan kan mga Hade nin Israel.

³⁵ Sarong panahon, nakialyansa si Hadeng Jehosafat nin Juda ki Hadeng Ahazias nin Israel, na naggibo nin dakul na karatan.

³⁶ Sa pantalan kan Ezion-geber naggibo sinda nin mga barko na mapasiring sa Tarsis.

³⁷ Alagad pinatanidan si Jehosafat ni Eliezer na aking lalaki ni Dodavahu, kan banwa nin Maresa, “Huli ta nakialyansa ka ki Ahazias, raraoton nin Kagurangnan an saimong ginibo.” Kaya nagkaroronot sa dagat an mga barko asin dai nakaabot sa Tarsis.