2 Mga Cronica 14 - Marahay na Bareta Biblia

Dinaog ni Hadeng Asa an mga taga Etiopia

¹ Nagadan si Hadeng Abias asin ilinubong sa Syudad ni David. Si Asa na saiyang aking lalaki iyo an nagsalihid saiya bilang hade, asin kan panahon niya, an daga nagkaigwa nin katoninongan sa laog nin sampolong taon.

² Nawilihan nin Kagurangnan si Asa huli ta ginibo kaini an marahay saka matanos.

³ Hinale niya an dayuhan na mga altar asin paganong mga lugar na pagsasambahan, rinumpag an mga harigi saka mga simbolo kan diosang si Asera.

⁴ Pinagbotan niya an banwaan nin Juda na magkuyog kan kabotan nin Kagurangnan, an Dios kan saindang mga ginikanan, asin mag-otob kan saiyang mga togon saka pagboot.

⁵ An kahadean na sakop niya nagkaigwa nin katoninongan huli ta hinale niya sa gabos na syudad nin Juda an gabos na paganong mga lugar na pagsasambahan asin an mga altar nin insenso.

⁶ Pinapusog ni Asa an mga syudad nin Juda. Dakul na taon na dai nagkaigwa nin gera kan panahon niya huli ta itinao saiya nin Kagurangnan an katoninongan.

⁷ Sinabihan ni Asa an banwaan nin Juda, “Pakosogon nyato an mga syudad asin palibotan ta nin kudal, mga bantayan, mga trangkahan saka mga barat. Sadiri pa nyato an dagang ini, huli ta kinuyog ta an kabotan kan Kagurangnan na satuyang Dios. Inataman niya kita asin tinawan nin katoninongan sa gabos na lugar.” Kaya nagtugdok sinda asin nag-uswag.

⁸ Si Hadeng Asa igwa nin hukbo, na an tres syentos mil gikan sa Juda, na gabos armado nin kalasag saka garod, asin an dos syentos otsenta mil gikan sa Benjamin, na gabos armado nin kalasag saka mga pana. Mga maiisog saka may kakayahan sinda gabos.

⁹ Sarong taga Etiopia na an ngaran Zera, an nagsalakay sa Juda kaiba an saiyang hukbo nin sarong milyon na soldados saka tres syentos na karwahe; nakaabot sinda sagkod sa Maresa.

¹⁰ Nagluwas si Asa tanganing labanan siya, asin an duwang hukbo naghampangan sa Kapantayan nin Zefata sa Maresa.

¹¹ Namibi si Asa sa Kagurangnan na saiyang Dios, “O Kagurangnan, matatabangan mo an sarong maluyang hukbo, siring na matatabangan mo man an sarong makosog na hukbo. Tabangan mo kami, O Kagurangnan na samuyang Dios, huli ta nananarig kami saimo asin sa ngaran mo nagdigdi kami sa pakilaban sa dakulang hukbong ini. O Kagurangnan, ika an samuyang Dios; hare pagtugot na madaog ka nin siisay man.”

¹² Dinaog nin Kagurangnan an mga taga Etiopia sa atubang ni Asa asin kan mga taga Juda. Nagdurulag an mga taga Etiopia.

¹³ Linamag sinda ni Asa asin kan mga kairiba kaini sagkod sa Gerar. Nadaog an mga taga Etiopia asin nagadan sinda gabos. Dinaog sinda nin Kagurangnan asin dakul an nasamsam kan mga taga Juda.

¹⁴ Dangan narumpag ninda an mga syudad sa palibot nin Gerar huli ta an mga tawo duman natakot sa Kagurangnan. Sinamsaman kan hukbo an mga syudad na ini asin dakul an saindang nakua.

¹⁵ Sinalakay man ninda an mga kampo kan mga pastor nin karnero, dangan kinurua ninda an dakul na karnero saka mga kamelyo. Pakatapos, nagpuli sinda sa Jerusalem.