1 Samuel 8 - Marahay na Bareta Biblia

Naghagad nin Hade an mga Tawo

¹ Kan gurang na si Samuel, ginibo niyang mga hukom sa Israel an saiyang mga aking lalaki.

² An ngaran kan matua iyo si Joel, asin an ngohod iyo si Abias; sinda an nagin mga hukom sa Beer-sheba.

³ Alagad dai sinda nagsunod sa paarog kan saindang ama; boot sana nindang magyaman, kaya nag-ako sinda nin mga suhol asin biniko ninda an katanosan.

⁴ Dangan nagtiripon an kamagurangan nin Israel, nagduruman ki Samuel sa Rama,

⁵ asin nagsarabi saiya, “Gurang ka na asin dai nagsusunod kan saimong paarog an saimong mga aking lalaki. Kaya magpili ka nin hade na maghahade samo, arog kan ibang mga nasyon.”

⁶ Dai nagustohan ni Samuel an kahagadan ninda na magkaigwa nin hade, kaya namibi siya sa Kagurangnan.

⁷ Nagtaram saiya an Kagurangnan, “Dangoga an gabos na sinasabi saimo kan mga tawo, huli ta bakong ika an saindang hinaboan; ako an hinaboan ninda bilang saindang hade.

⁸ Magpoon kan iluwas ko sinda sa Egipto, nagtalikod na sinda sako asin nagsamba sa mga dios-dios. Ngunyan ginigibo ninda saimo an danay na ginigibo ninda sako.

⁹ Kaya dangoga sinda, alagad patanidan mo nanggad sinda asin paliwanagan kun ano an gigibohon sainda kan saindang hade.”

¹⁰ Sinabihan ni Samuel kan gabos na itinaram nin Kagurangnan an mga tawong naghahagad saiya nin hade.

¹¹ Olay niya, “Ini an gigibohon saindo kan saindong hade: kukuahon niya an saindong mga aking lalaki dangan gigibohon na mga soldados; an iba sainda malunad sa saiyang mga karwahe, an iba sa mga kabayo, asin an iba magdadalagan sa enotan kan saiyang mga karwahe.

¹² An iba sainda gigibohon niyang mga opisyal nin sangribo katawo, saka an iba mga opisyal nin singkwenta katawo. An iba gigibohon niyang mga paraarado saka paraani; an iba magigin paragibo nin mga armas sa gera, asin mga kagamitan para sa saiyang mga karwahe.

¹³ Kukuahon niya an saindong mga aking babae tanganing magin mga paragibo nin pahamot, magin mga paraluto sagkod mga panadero.

¹⁴ Kukuahon niya an pinakamarahay nindong mga oma, mga tatamnan nin ubas asin oliba, dangan itatao sa saiyang mga opisyal.

¹⁵ Kukuahon niya an ikasampolong kabtang kan saindong inaning trigo saka ubas dangan itatao iyan sa saiyang mga opisyal sa palasyo asin ibang mga sorogoon.

¹⁶ Kukuahon niya an saindong mga sorogoon, an pinakamarahay nindong mga baka sagkod asno, dangan gagamiton niya sa pagtrabaho.

¹⁷ Kukuahon niya an ikasampolong kabtang kan saindong mga hayop, asin magigin mga oripon niya kamo.

¹⁸ Pag-abot kan panahon na iyan, maagrangay kamo huli kan saindong hade na pinili nindo para saindo, alagad dai kamo dadangogon nin Kagurangnan.”

¹⁹ Alagad habong magdangog an mga tawo ki Samuel, kundi nagsabi, “Dai! Boot ming magkaigwa nin sarong hade

²⁰ tanganing makaarog kami sa ibang nasyon, na igwang hade na mamamayo samo, mangenot samo sa pakigera asin makilaban para samo.”

²¹ Kan madangog ni Samuel an gabos na sinabi kan mga tawo, inosip niya iyan sa Kagurangnan.

²² Nagsimbag an Kagurangnan, “Giboha an boot ninda; tawe sinda nin hade.” Dangan pinapuli ni Samuel an mga Israelita sa saindang mga harong.