1 Samuel 14 - Marahay na Bareta Biblia

An Mapangahas na Ginibo ni Jonatan

¹ Sarong aldaw, sinabihan ni Jonatan an hoben na lalaking paradara kan saiyang armas, “Madya, magduman kita sa kampo kan mga Filisteo.” Alagad dai pinaisi ni Jonatan an ama niyang si Saul,

² na nagkakampo sa lindong nin sarong kahoy na granada duman sa Migron, harani sa Gibea, kaiba an haros anom na gatos na soldados.

³ (An pading nagsusulot kan efod iyo si Ahias, na aking lalaki ni Ahitub na tugang ni Ikabod, na aki ni Finehas asin makoapo ni Eli, na padi nin Kagurangnan sa Shilo.) Dai naaraman kan saindang pag-iriba na naghale si Jonatan.

⁴ Sa dalan nin Micmas, na aagihan ni Jonatan tanganing makaabot sa kampo kan mga Filisteo, igwa nin duwang darakulang gapo sa mag-ibong na gilid; Bozez an ngaran kan sarong gapo, asin an saro Sene.

⁵ An saro nasa parteng amihan kan dalan, nakaatubang sa Micmas, asin an saro nasa parteng habagat, nakaatubang sa Geba.

⁶ Sinabihan ni Jonatan an hoben na nagdadara kan saiyang armas, “Magduman kita sa kampo kan bakong sirkomsisyonadong mga Filisteo. Tibaad tabangan kita nin Kagurangnan; kun tabangan niya kita, mayong makakapugol saiya sa pagtao sato nin kapangganahan, maski dikit sana kita.”

⁷ Nagsimbag an hoben, “Giboha an nasa isip mo; kaiba mo ako.”

⁸ Nagsabi si Jonatan, “Maibong kita asin mapahiling sa mga Filisteo.

⁹ Kun magsabi sindang halaton ta sinda, maontok kita.

¹⁰ Alagad kun padolokon ninda kita, madolok kita, huli ta iyo iyan an magigin tanda na papaganahon kita nin Kagurangnan laban sainda.”

¹¹ Kaya nagpahiling sinda sa mga Filisteo asin nagsarabi an mga ini, “Hilinga! Nagruluwas sa saindang mga pinagtatagoan na lungib an nagkapirang mga Hebreyo!”

¹² Kinurahawan ninda si Jonatan asin an kaiba niya, “Sakat kamo digdi! Igwa kaming ipapahiling saindo!” Sinabihan ni Jonatan an saiyang kaiba, “Magsunod ka sako. Papaganahon na nin Kagurangnan an Israel laban sainda.”

¹³ Nagkakamang na sinakat ni Jonatan an hampas kaiba an paradara kan saiyang armas. Sinalakay ni Jonatan an mga Filisteo; tinurumba niya sinda, asin ginaradan sinda kan nagsusunod na kaiba ni Jonatan.

¹⁴ Sa ralaban na idto, si Jonatan asin an saiyang kaiba nakagadan nin haros beynteng Filisteo sa lugar na an kahiwasan arog sa pang-apat na parte nin sarong ektarya.

¹⁵ Nagkatarakot an gabos na Filisteo sa saindang namumugtakan; tinarakigan an mga parasalakay saka an mga soldados na nasa kampo huli sa takot; naglinog an daga, asin nagkaigwa nin dakulang kariribokan.

An Pagkadaog kan mga Filisteo

¹⁶ Nahiling kan mga tawohan ni Saul na nagbabantay sa Gibea sa teritoryo ni Benjamin an mayong direksyon na pagdalagan kan mga Filisteo.

¹⁷ Kaya sinabihan ni Saul an saiyang mga tawohan, “Bilanga nindo an satong mga tawohan asin aramon nindo kun siisay an mayo digdi.” Binilang asin naaraman ninda na mayo duman si Jonatan dangan an hoben na paradara kan saiyang armas.

¹⁸ Sinabihan ni Saul an pading si Ahias, “Daraha digdi an Kaban nin Tipan.” (Kan panahon na idto, an Kaban nin Tipan nin Dios yaon sa kaibahan kan mga Israelita.)

¹⁹ Mantang kinakaolay ni Saul an padi, orog na nagdakula an kariribokan sa kampo kan mga Filisteo, kaya sinabihan ni Saul an padi, “Mayo nang panahon tanganing aramon an kabotan nin Kagurangnan!”

²⁰ Dangan nakilaban si Saul asin an saiyang mga tawohan sa mga Filisteo, na kan panahon na idto, huli sa dakulang kariribokan, sinda-sinda man sana an nagraralaban.

²¹ An nagkapirang mga Hebreyo na nagkampi sa mga Filisteo asin nag-iba sainda sa saindang kampo, nagliwat kan saindang isip asin nag-apil ki Saul saka ki Jonatan.

²² Nadangog kan mga Israelitang nagtatarago sa kabubuldan nin Efraim na nagdudurulag an mga Filisteo, kaya nagsabay man sinda sa pagsalakay,

²³ asin nakilaban sagkod sa ibong kan Bet-aven. Kan aldaw na idto, ilinigtas nin Kagurangnan an Israel.

Mga Pangyayari Pakatapos kan Gera

²⁴ Maluluya na an mga Israelita kan aldaw na idto, huli ta nagboot si Saul: “Maldisyonon an siisay man na magkakan nin ano man sa aldaw na ini bago ako makabalos sa sakong mga kaiwal.” Kaya mayo nin siisay man na nagkakan kan aldaw na idto.

²⁵ Nakaabot an mga tawo sa kadlagan asin nakanumpong nin kadakul na dugos.

²⁶ Pakalaog ninda sa kadlagan, nahiling ninda an nagbubulos na dugos, alagad mayo nin nangahas na magkakan huli ta takot sinda gabos sa maldisyon ni Saul.

²⁷ Alagad dai nadangog ni Jonatan an saiyang ama kan siya magpatanid, kaya idinuta niya an saiyang sugkod sa dugos asin nagkakan siya. Nagrahay tolos an saiyang pagmate.

²⁸ Dangan sinabihan siya kan saro kan mga lalaki, “Nanluluya na kami gabos huli sa gutom, alagad pinatanidan kami kan saimong ama na mamaldisyonon an siisay man na magkakan nin ano man ngunyan na aldaw.”

²⁹ Nagsimbag si Jonatan, “Ano ining ginibo kan sakong ama sa satong mga kahimanwa! Hilinga nindo kun gurano karahay an sakong pagmate huli ta nagkakan ako nin kadikit na dugos!

³⁰ Gurano pa daw karahay kun an sakong mga kahimanwa nakakakan kan sinamsam sa saindang kaiwal; mas dakul pa gayod na mga Filisteo an saindang nagkagaradan!”

³¹ Kan aldaw na idto nadaog kan mga Israelita an mga Filisteo, na saindang linabanan magpoon sa Micmas sagkod sa Aijalon. Alagad maluluya na nin marahay an mga Israelita huli sa gutom,

³² kaya hidali nindang kinua an saindang sinamsam, an mga karnero saka mga baka; binuruno ninda idto duman mismo sa lugar na nakuahan ninda dangan kinakan an karne na igwa pa nin dugo.

³³ Nagsumbong sinda ki Saul, “Hilinga, nagkakasala sa Kagurangnan an mga tawo huli sa pagkakan kan karneng igwa pa nin dugo.” Nagkurahaw si Saul, “Mga parapasaluib! Paligida nindo digdi an sarong dakulang gapo.”

³⁴ Dangan nagboot si Saul, “Magduman kamo sa mga tawo asin sabihan nindo sinda na darahon digdi an saindang mga baka saka karnero asin digdi ninda bunoon dangan kakanon; dai sinda dapat magkasala sa Kagurangnan huli sa pagkakan nin karneng igwa pa nin dugo.” Kaya kan bangging idto, dinara kan mga tawo an saindang mga hayop asin duman ninda binuruno.

³⁵ Nagtugdok nin altar si Saul para sa Kagurangnan; iyo idto an enot na altar na saiyang ginibo.

³⁶ Dangan sinabihan ni Saul an saiyang mga tawohan, “Magrulugsot kita dangan salakayon ta an mga Filisteo sa banggi; samsaman ta sinda sagkod mag-aga asin gadanon ta sinda gabos.” Nagsimbag an mga tawo, “Giboha an pinaghohona mong marahay.” Alagad nagsabi an padi, “Hapoton ta ngona an Dios.”

³⁷ Kaya naghapot si Saul sa Dios, “Salakayon ko daw an mga Filisteo? Papangganahon mo daw kami?” Alagad dai siya sinimbag nin Dios kan aldaw na idto.

³⁸ Dangan sinabihan ni Saul an mga lider kan mga tawo, “Madya kamo asin aramon nindo kun anong kasalan an naginibo ngunyan na aldaw.

³⁹ Isinusumpa ko sa buhay na Kagurangnan, na nagliligtas sa Israel, na gagadanon an nagkasala, maski siya iyo an sakong aking si Jonatan.” Alagad mayo nin siisay man na nagsimbag ki Saul.

⁴⁰ Dangan sinabihan ni Saul an mga tawo, “Magtirindog kamo gabos duman, asin matindog man kami ni Jonatan digdi.” “Giboha an pinaghohona mong marahay,” an simbag kan mga tawo.

⁴¹ Dangan nagsabi si Saul sa Kagurangnan, an Dios nin Israel, “Kagurangnan, tadaw ta dai mo ako sinimbag ngunyan na aldaw? O Kagurangnan, Dios nin Israel, simbagon mo ako sa paagi kan mga sagradong gapo. Kun si Jonatan o ako an may kasalan, simbagon mo ako huli sa Urim; alagad kun an kasalan yaon sa saimong banwaan nin Israel, simbagon mo ako huli sa Tummim.” An luminuwas na simbag iyo si Jonatan saka si Saul; mayo sa mga tawo an kasalan.

⁴² Dangan nagsabi si Saul, “Magpili ka sa samong duwa ni Jonatan.” Napili si Jonatan.

⁴³ Hinapot ni Saul si Jonatan, “Ano an ginibo mo?” Nagsimbag si Jonatan, “Nagkakan ako nin dikit na dugos. Uya ako, andam na magadan.”

⁴⁴ Sinabihan ni Saul si Jonatan, “Gadanon logod ako nin Dios, kun dai taka ipagadan.”

⁴⁵ Alagad nagsarabi an mga tawo ki Saul, “Tama daw na gadanon si Jonatan na nakaginibo kaining dakulang kapangganahan para sa Israel? Dai! Sagkod na buhay an Kagurangnan, minasumpa kami na mayo nin mararakdag na buhok sa payo ni Jonatan, maski saro. An ginibo niya ngunyan na aldaw nangyari huli sa tabang nin Dios.” Kaya ilinigtas kan mga tawo si Jonatan sa kagadanan.

⁴⁶ Pakatapos kaini, dai na ipinadagos ni Saul an paglamag sa mga Filisteo, asin an mga ini nagpuruli sa sadiri nindang daga.

An Paghade ni Saul asin an saiyang Pamilya

⁴⁷ Kan nagin hade si Saul sa Israel, nakilaban siya sa gabos niyang kaiwal sa manlaen-laen na lugar: sa mga Moabita, sa mga Ammonita, saka sa mga Edomita, sa mga hade kan Zoba asin sa mga Filisteo. Saen man nakilaban si Saul, nanggana siya.

⁴⁸ Maisog siyang nakilaban asin nadaog niya maski an mga Amalekita. Ilinigtas niya an mga Israelita sa mga nagsalakay sainda.

⁴⁹ An mga aking lalaki ni Saul iyo si Jonatan, si Isvi, asin si Malkisua. An matuang aki niyang babae iyo si Merab; an ngohod iyo si Mical.

⁵⁰ An agom niya iyo si Ahinoam na aki ni Ahimaaz; an pamayo kan saiyang hukbo iyo si Abner na aking lalaki ni Ner na tiyo ni Saul.

⁵¹ Mga aking lalaki ni Abiel si Kis na ama ni Saul asin si Ner na ama ni Abner.

⁵² Sa bilog na pagkabuhay ni Saul, kaipuhan makilaban siya nin makuri laban sa mga Filisteo. Kaya kun nakakanumpong siya nin sarong makosog o maisog na lalaki, pinapaayon niya ini sa saiyang hukbo.