1 Mga Hade 6 - Marahay na Bareta Biblia

Itinugdok ni Solomon an Templo

¹ Pinoonan ni Solomon an pagtugdok kan Templo kan ika kwatro syentos otsentang taon pakahale sa Egipto kan banwaan nin Israel, kan ikaapat na taon nin saiyang paghade, kan ikaduwang bulan, an bulan nin Ziv.

² An Templo na itinugdok ni Solomon para sa Kagurangnan igwa nin sukol na beynte y syete metros an laba, siyam na metros an lakbang, asin trese metros may kabanga an langkaw.

³ An balkon igwa nin sukol na apat na metros may kabanga an laba asin siyam na metros an lakbang, siring kan lakbang kan mismong santwaryo.

⁴ An mga lanob kan Templo igwa nin mga bintana na mas hayakpit sa luwas ki sa laog.

⁵ Nakadukot ini sa mga gilid saka sa likod kan Templo, asin an lambang eskalon duwang metros may beynte sentimetros an langkaw.

⁶ Duwang metros asin beynte sentimetros man an lakbang kan lambang kwarto sa enot na eskalon, duwang metros asin setenta sentimetros an lakbang sa ikaduwang eskalon, tolong metros asin sampolong sentimetros sa ikatolo. An lanob sa lambang eskalon mas mahimpis ki sa lanob sa ibabang eskalon tanganing mapamugtak sa lanob an mga kwarto na dai na kaipuhan pang isurok an mga darakulang kahabaan na kahoy kaini sa lanob.

⁷ Tinarabas na an mga gapong ginamit sa Templo, kaya mayong pinagukpok nin martilyo, patok, o sa iba pang mga kagamitan na lansang mantang ginigibo an Templo.

⁸ Nasa parteng timog kan Templo an laogan pasiring sa pinakababang eskalon. Hale digdi igwa nin sarong hagdan pasiring sa ikaduwang eskalon, dangan saro pang hagdan pasiring sa ikatolo.

⁹ Kaya tinapos ni Solomon an pagtugdok kan Templo. Binugtakan niya ini nin kisame, na kahoy na sedro an ginamit para sa mga kostilyas saka mga tabla.

¹⁰ An tolong eskalon na edipisyo, na an lambang eskalon duwang metros asin beynte sentimetros an langkaw, itinugdok na nakakabit sa panluwas na mga lanob kan Templo asin nakakabit sa mga ini huli kan mga darakulang kahoy na sedro.

¹¹ Nagtaram an Kagurangnan ki Solomon,

¹² “Kun kukuyogon mo an gabos kong mga togon saka pagboot, gigibohon ko para saimo an ipinanuga ko sa saimong ama na si David.

¹³ Maerok ako sa kaibahan kan sakong banwaan na Israel digdi sa Templong ini na ipinapatugdok mo, asin dai ko sinda papabayaan.”

¹⁴ Kaya tinapos ni Solomon an pagpatugdok kan Templo.

An mga Samno sa laog kan Templo

¹⁵ An mga palaog na lanob napapatos nin mga saradit na tablang sedro, magpoon sa salog sagkod sa kisame; tablang aguho an ginibong salog.

¹⁶ Sa pinakahuring parte kan Templo, igwa nin ginibong sarong kwarto na nasa laog nin marahay, na inapod Kabanal-banaleng Lugar. An kwartong ini siyam na metros an laba na nalalanoban nin mga mahimpis na tablang sedro magpoon sa salog sagkod sa kisame.

¹⁷ An kwarto sa atubangan kan Kabanal-banaleng Lugar igwa nin laba na dyes y otso metros.

¹⁸ An lanob na mga tablang sedro igwa nin mga dibuhong mga melon saka mga bukad na burak; an bilog na laog napapatos nin tablang sedro, kaya dai nanggad nahihiling an mga gapo kan lanob.

¹⁹ Sa pinakahurihan kan Templo, igwa nin ginibong sarong kwarto na bubugtakan kan Kaban nin Tipan nin Kagurangnan.

²⁰ An kwartong ini na gabos patos nin purong bulawan, siyam na metros an laba, siyam na metros an lakbang, asin siyam na metros an langkaw. An altar napapatos nin saradit na tablang sedro.

²¹ An laog kan Templo patos nin bulawan, asin binugtakan nin mga kadenang bulawan an palaog kan pinakatagong kwarto na patos man nin bulawan.

²² An bilog na laog kan Templo pinatos nin bulawan, siring man an altar sa Kabanal-banaleng Lugar.

²³ Duwang kerubin na ginibo hale sa kahoy na oliba an ibinugtak sa Kabanal-banaleng Lugar; apat na metros asin kwarenta sentimetros an langkaw kan lambang saro.

^24-26 Pareho an sukol asin porma kan duwang kerubin. An lambang saro igwa nin duwang pakpak; an lambang pakpak duwang metros asin beynte sentimetros an laba, kaya apat na metros asin kwarenta sentimetros an sukol kan mga pakpak hale sa mag-ibong na poro.

²⁷ Magkataed na ibinugtak sa Kabanal-banaleng Lugar an mga kerubin. Nakaunat an saindang mga pakpak kaya an sarong pakpak kan sarong kerubin nakaduta sa sarong ibong na lanob mantang an sarong pakpak kan saro pang kerubin nakaduta man sa sarong ibong na lanob; an saindang mga pakpak na dai nakaduta sa mga lanob nagdudutaan sa tahaw kan kwarto.

²⁸ Patos nin bulawan an mga kerubin.

²⁹ An mga lanob kan pangenot na kwarto asin kan pinakatagong kwarto gabos igwa nin samnong inukit na mga kerubin, mga kahoy na palma, asin mga bukad na burak.

³⁰ An salog kan mga kwartong ini patos nin bulawan.

³¹ Duwang pinto na gibo sa kahoy na oliba an ibinugtak sa laogan kan Kabanal-banaleng Lugar; an itaas kan pintoan sarong mapanas na arko.

³² An mga pinto igwa nin samnong inukit na mga kerubin, mga kahoy na palma, asin mga bukad na burak. Patos nin bulawan an mga pinto, an mga kerubin, asin an mga kahoy na palma.

³³ Para sa laogan kan pangenot na kwarto, ginibo an sarong kwadradong hamba nin kahoy na oliba

³⁴ asin duwang turotiklop na pinto na gibo sa kahoy na aguho.

³⁵ An mga pinto sinamnohan nin mga inukit na mga kerubin, mga kahoy na palma, asin mga bukad na burak. An gabos na ini napapatos nin bulawan.

³⁶ Ginibo sa atubangan kan Templo an panlaog na patyo, na napapalibotan nin kudal na ginibo sa paagi nin pagbabaw kan kahoy na sedro sa lambang tolong babaw na gapo.

³⁷ An pundasyon kan Templo ibinugtak kan ikaduwang bulan, an bulan nin Ziv, kan ikaapat na taon kan paghahade ni Solomon.

³⁸ Kan ikawalong bulan, an bulan nin Bul, kan ikaonseng taon kan paghade ni Solomon, natapos an Templo sosog sa plano. Pitong taon ining ipinatugdok ni Solomon.