1 Mga Cronica 26 - Marahay na Bareta Biblia

An mga Bantay sa Templo

¹ Iyo ini an mga grupo kan mga Levita na an katongdan iyo an pagbantay sa mga trangkahan kan Templo. Gikan sa kamaganakan ni Kore, napili si Meselemias, na aking lalaki ni Kore kan pamilya ni Asaf.

² An mga aking lalaki ni Meselemias iyo si Zacarias an matua, ikaduwa si Jediael, ikatolo si Zebadias, ikaapat si Jatniel,

³ ikalima si Elam, ikaanom si Jehohanan, asin ikapito si Eliehoenai.

⁴ Napili man si Obed-edom, na benendisyonan nin Dios huli sa pagtao saiya nin walong aking lalaki na iyo si Semaias an matua, ikaduwa si Jehozabad, ikatolo si Joa, ikaapat si Sacar, ikalima si Netanel,

⁵ ikaanom si Ammiel, ikapito si Issakar, asin ikawalo si Peulletai.

⁶ Nagkaigwa si Semaias nin mga aking lalaki na nagin pamayo kan saindang mga kamaganakan huli kan saindang kakayahan.

⁷ An mga ini iyo si Otni, Refael, Obed, Elzabad, asin an duwa nindang makokosog na tugang na si Elihu saka si Semakias.

⁸ An kabilogan na bilang kan mga aki saka mga makoapo ni Obed-edom na maninigong maglingkod uminabot sa sesenta y dos.

⁹ Dyes y otsong lalaki man sa pamilya ni Meselemias an maninigong maglingkod.

¹⁰ Gikan sa kamaganakan ni Merari, napili si Hosa na igwa nin apat na aking lalaki. An mga ini iyo si Simri (siya an ginibong pamayo kan saiyang ama, maski bako man siya an matuang aki),

¹¹ si Hilkias, si Tebalias, asin Zacarias. Trese gabos na parabantay sa Templo an hale sa pamilya ni Hosa.

¹² Pinaggrupo-grupo an mga bantay sa Templo sosog sa saindang mga pamilya, asin tinarawan sinda nin katongdan sa Templo arog sa ibang mga Levita.

¹³ Sadit man o dakula, nagripa an gabos na pamilya tanganing aramon kun arin na trangkahan an babantayan ninda.

¹⁴ Nanongod ki Selemias an trangkahan sa sirangan; an trangkahan sa amihan nanongod ki Zacarias, aki ni Selemias, sarong lalaking danay na nagtatao nin marahay na hatol.

¹⁵ Nanongod ki Obed-edom an trangkahan sa habagat, asin napasaiyang mga aki an pagbantay kan mga kwartong sarayan.

¹⁶ Nanongod ki Suppim saka ki Hosa an trangkahan sa parteng solnopan asin an trangkahan nin Salleket, sa dalan na minapaitaas. An lambang grupo igwa nin talaan na oras nin pagbantay.

¹⁷ Sa sirangan, anom an nagbabantay aroaldaw. Sa amihan, apat asin apat man sa habagat. Aroaldaw, apat an nagbabantay sa mga kwartong sarayan; duwa sa lambang kwarto.

¹⁸ An edipisyo na nasa solnopan, binabantayan nin apat sa may dalan asin duwa sa mismong edipisyo.

¹⁹ Ini an mga grupo kan mga bantay kan mga trangkahan na naggikan sa kamaganakan ni Kore saka ni Merari.

Iba pang mga Katongdan sa Templo

²⁰ Sa iba pang mga Levita, si Ahias an namahala kan mga kayamanan sa Templo asin kan mga kwartong sarayan kan mga ikinonsagrang regalo para sa Dios.

²¹ Si Ladan, saro kan mga aking lalaki ni Gerson, iyo an ginikanan kan nagkapirang grupo nin pamilya, kaiba an pamilya kan saiyang aking lalaki na si Jehiel.

²² An duwa pang aking lalaki ni Ladan na si Zetam saka si Joel iyo an namahala kan mga kayamanan sa Templo.

²³ Tinarawan man nin mga katongdan an mga kapagarakian ni Amram, Izar, Hebron, asin Uzziel.

²⁴ Si Sebuel, na aking lalaki ni Gerson na aki ni Moises, iyo an pinakapamayo kan mga namamahala kan kayamanan sa Templo.

²⁵ Kadugo niya si Selomit huli ki Eliezer na tugang ni Gerson. Si Eliezer iyo an ama ni Rehabias, na ama ni Jesaias, na ama ni Joram, na ama ni Zikri, na ama ni Selomit.

²⁶ Si Selomit saka an mga kaayon sa saiyang pamilya iyo an namahala kan gabos na regalo sa Dios na idinolot ni David, kan mga pamayo nin mga pamilya, kan mga lider kan mga grupo nin kamaganakan, asin kan mga opisyal nin hukbo.

²⁷ Hale sa mga sinamsam sa gera, nagdolot sinda nin mga regalo na gagamiton sa Templo,

²⁸ si Selomit asin an saiyang pamilya iyo an namahala kan gabos na idinolot para gamiton sa Templo, pati an mga regalong dara kan propetang si Samuel, ni Hadeng Saul, ni Abner na aking lalaki ni Ner, saka ni Joab na aking lalaki ni Zeruias.

Mga Katongdan kan Ibang mga Levita

²⁹ Sa kapagarakian ni Izar, si Kenaias saka an saiyang mga aking lalaki iyo an napili bilang mga kansilyer asin mga hukom.

³⁰ Sa kapagarakian ni Hebron, si Hasabias kaiba an mil syete syentos na mga kadugo niya, na gabos may kakayahan, iyo an namahala kan Israel sa solnopan kan Salog nin Jordan. Sinda an namahala kan trabaho kan Kagurangnan asin kan paglingkod sa hade.

³¹ Si Jerias iyo an pamayo kan mga kapagarakian ni Hebron. Kan ikakwarentang taon kan paghahade ni David, sarong pagsiyasat an ginibo sa kapagarakian ni Hebron, asin nanumpongan an mga maninigo saka may kakayahan na mga lalaking kaayon sa pamilyang ini duman sa Jazer sa Gilead.

³² Nagpili si David nin dos mil syete syentos na mga bantog na pamayo nin mga pamilya sa mga kadugo ni Jerias, asin pinapamahala niya sinda kan gabos na trabaho kan Kagurangnan asin kan paglingkod sa hade duman sa sirangan kan Salog nin Jordan—an teritoryo ni Ruben, ni Gad, saka ni Manases sa Sirangan.