1 Mga Cronica 20 - Marahay na Bareta Biblia

Sinakop ni David an Rabba

¹ Pakatapos kan tiglipot na iyo an panahon na ipinagduduman sa gera kan mga hade, pinamayohan ni Joab an hukbo asin sinalakay an daga nin Ammon; alagad nagpawalat si David sa Jerusalem. Pinalibotan ninda an syudad nin Rabba, sinalakay asin rinaot.

² An dios-dios kan mga Ammonita na si Molek igwa nin bulawan na korona na an timbang minaabot sa treynta y kwatro kilos. Igwa ini nin tampok na mahalagang bato, na kinua ni David asin ibinugtak sa saiyang korona. Kinua man niya an dakulang halaga nin sinamsam hale sa syudad.

³ Pinatrabaho niya an mga tawong taga Rabba na gamit an mga lagadi, mga piko saka mga patok. Iyo man an ginibo niya sa mga tawo kan ibang mga banwa nin Ammon. Dangan nagbalik sa Jerusalem si David saka an saiyang mga tawohan.

Gera Laban sa mga Higanteng Filisteo

⁴ Pakatapos kaini, nagkaigwa nin gera laban sa mga Filisteo sa Gezer; sa ralaban na ini, nagadan ni Sibecai na taga Husa si Sipai, na saro sa mga kapagarakian kan mga higante, asin nadaog an mga Filisteo.

⁵ Nagkaigwa pa nin sarong gera laban sa mga Filisteo, asin nagadan ni Elhanan na aking lalaki ni Jair, si Lami na tugang na lalaki ni Goliat na taga Gat, na igwang garod na an tugod siring kadakula sa kahabaan nin sarong habolan.

⁶ Dangan nagkaigwa pa nin sarong gera sa Gat, igwa nin sarong higante na anom an muro sa lambang kamot asin sa lambang bitis; mga higante man an saiyang ginikanan.

⁷ Kan pinag-olog-olog niya an mga Israelita, ginadan siya ni Jonatan, na aking lalaki ni Samma na tugang ni David.

⁸ An mga higanteng ini, na ginaradan ni David saka kan saiyang mga tawohan, gabos gikan sa mga higante sa Gat.