1 Mga Cronica 10 - Marahay na Bareta Biblia

An Pagkagadan ni Hadeng Saul

¹ Nakilaban an mga Filisteo sa mga Israelita sa Bukid nin Gilboa. Dakul na Israelita an nagkagaradan duman. Nagdurulag an iba sainda na kairiba si Hadeng Saul asin an mga aki niyang lalaki.

² Alagad naabotan sinda kan mga Filisteo asin ginadan an tolong aking lalaki ni Saul na si Jonatan, Abinadab, saka Malkisua.

³ Nagin mangirhat an ralaban sa palibot ni Saul, asin natamaan siya kan mga parapana.

⁴ Sinabihan ni Saul an paradara kan saiyang mga armas, “Hugkota an saimong espada asin gadana ako tanganing dai ako pag-olog-ologon kan bakong serkomsisyonadong mga Filisteong ini. Alagad makuri an takot kan paradara nin armas, kaya dai siya nagkuyog. Kaya kinua ni Saul an saiyang espada asin dinapaan an tarom kaini.

⁵ Kan mahiling kan paradara nin armas na gadan na si Saul, dinapaan man niya an tarom kan saiyang espada asin nagadan.

⁶ Sarabay na nagadan si Saul asin an saiyang mga aking lalaki, kaya mayong naghade hale sa saiyang kapagarakian.

⁷ Kan mahiling kan mga Israelita na nag-erok sa Kapantayan nin Jezreel na duminulag an hukbo dangan nagadan si Saul pati an mga aking lalaki kaini, binarayaan ninda an saindang mga banwa asin nagdurulag. Nag-arabot an mga Filisteo asin nag-erok sinda sa mga banwang idto.

⁸ Sunod na aldaw, kan magduman sa mga bangkay an mga Filisteo tanganing samsaman, nanumpongan ninda sa Bukid nin Gilboa an bangkay ni Saul asin kan saiyang tolong aking lalaki.

⁹ Pinugotan ninda nin payo si Saul, asin hinubaan kan saiyang mga armas. Dangan nagpadara sinda nin mga sugo sa bilog na daga kan mga Filisteo tanganing ibalangibog an marahay na bareta sa saindang mga dios-dios asin sa saindang mga kahimanwa.

¹⁰ Ibinugtak ninda an mga armas ni Saul sa templo kan saindang mga dios-dios, asin binitay an saiyang payo duman sa templo kan saindang dios na si Dagon.

¹¹ Kan madangog kan mga taga Jabes-gilead an ginibo kan mga Filisteo ki Saul,

¹² nagduruman an mga maiisog na lalaki, kinua ninda an bangkay ni Saul asin kan saiyang mga aking lalaki dangan dinara sa Jabez. Ilinubong ninda an mga tolang sa irarom kan sarong hamurawon na kahoy duman sa Jabez. Pagkatapos, nag-ayuno sinda sa laog nin pitong aldaw.

¹³ Nagadan si Saul huli ta dai siya nagin maimbod sa Kagurangnan. Linapas niya an mga pagboot nin Kagurangnan; nakihumapot siya sa sarong espiritista sa paghagad nin kapaliwanagan,

¹⁴ embes na makihumapot sa Kagurangnan. Kaya ginadan siya nin Kagurangnan, asin an saiyang kahadean itinao ki David na aki ni Jesse.