ZÔELA 3 - Mara Bible RV (BSI)

Abeipa ta phopizy a pachia

¹ “Pachâ teh u, cha nohzy nata cha daihti liata, Zudâh nata Zerusale cha, Vânoh ei patosa heih aw.

² Phopi zydua pahmaoh aw ei na ta, Zehôsaphâ Saikao lâ ei chhi aw ei; Cha liata âmo cha, Ei phopi nata ei ryuto Izarei moh ta ei pachia aw ei. Izarei sawzy cha phopizy hry liata papai ei ta, Ei râh amâ raipa vâta, Phopizy cha ei pachia aw ei.

³ Ei phopi cha nuby a daopa ta a rai ei ta, Chapaw hawti cha âzuahnô nata ri ei ta, Kresawhti châta chanô hawti zuah ei ta ama doh tyh.

⁴ “Nâmo, Tyre, Sidaw nata Philistinâ râhzy saih u, ei châta khâpa ma nama châ tly? Ei hmotaopa kheihawhpa vâta ma viari eina thô ei chi tly? Viari eina thô khiah ei chi ta cha, nama viarithôna cha nâmo luh chô lia tlai ta a chatliepa nata a parapa ta ei vaw pakuasa aw.

⁵ Ei tâkâ nata ngôhzy la ei chi ta, ei ryusôhpazy chhao nama achhyna ozy lâ nama paly.

⁶ Zudâh nata Zerusale chyhsazy chhao, ama râh tawhta lâhlapi lâ pasiesa ha awpa ta, Krikâh mozy hnohta nama zuah.

⁷ Moh teh u, nama zuana suzy tawhta âmo cha pathyu aw ei na ta, nama viarithôna cha nâmo luh chô lia tlai ta ei vaw pakuasa aw.

⁸ Nama sawchapawzy nata nama sawchanôzy cha Zudâh chyhsazy ku liata zuah aw ei na ta, âmo ta lâhlapi liata a ypa phopi, Sabia mo hnohta ama zua pachhuah aw,” Abeipa ta a tah.

⁹ Phopizy hry liata he he phuah teh u: Adyuhna a chhuanoh u la, Pasaiphazy pathyu teh u. Pheisaih zydua a vaw hnia ei sala, A khy mawh ei sy.

¹⁰ Nama leipaliena thua pazaopazy cha, Zaozi lâta daih u la; Theilâ kô nama taina tâkôzy cha, Asei lâta daih teh u. Chyhsa chiehleipa chhao ta, “Thatlôpa ei châ,” tah mawh sy.

¹¹ Nâmo, Izarei chheipâh phopizy saih u, A parapa ta a vy u la, Cha liata a hmaoh teh u. Hy Abeipa, na pasaiphazy za tuah mah y.

¹² “Phopizy cha thyu ei sala, Zehôsaphâ Saikao lâ a khy mawh ei sy. Cha liata a tyuh aw na ta, Izarei chheipâh phopi zydua ei pachia aw ei.

¹³ “Nama savâ phia teh u, Sâh hria â daih ha hih. A vy u la, vaw tly teh u; Kre saohna khaoh bie ta, Tibeihzy a khô ha hih; Ama moleina a lai kaw dia!

¹⁴ “Zasâh manôhzy kalihpi to ei ta, Pachiana saikao liata ama y! Abeipa noh cha, Pachiana Saikao liata â hnia haw.

¹⁵ Noh nata thlâpâ zy zoh ei ta, Awhsizy khaih khao veih ei.

¹⁶ “Abeipa cha Zaio tawhta a rôhpa ta, Zerusale tawhta ao papua ta, Alei nata avâ amâ chalyu. Châhrasala Abeipa cha, A phopi châta amâ chhaina châ ta; Izarei sawzy châta ama thokhy a châ.”

Zudâh rônahna

¹⁷ “Chatanachata kei he ei tlâh pathaihpa Zaio liata a pahrâpa, Abeipa nama Khazohpa ei châ tahpa nama pahno aw. Zerusale cha khihpi pathaihpa châ aw ta, Chihropazy ta chapia heih khao aw veih ei.

¹⁸ “Cha noh liata, Tlâhpizy tawhta kresawhti thlôhpa a zâ thlaoh aw; Tlâhthlôhzy liata sâhpiti loh aw ta, Zudâh vahtiepa zydua liata tizy a loh aw; Abeipa o tawhta tihnawh vaw pua aw ta, Siti Saikao cha ti ta a bao aw.

¹⁹ “Zudâh mo pasasa ei ta, Paraona hnei leipa thisaih ama râh liata ama palopa vâta, Izi cha roryhrapa ta y aw ta, Edômâ chhao râhchawhpa nata roryhrapa râh a châ aw.

²⁰ “Zudâh deikua cha tlyzaw ta pahrâna râh châ aw ta, Zerusale chhao Chhâzaw ta pahrâna khihpi a châ aw.

²¹ Ama thisaih phuh ei la mâh leipazy cha, Ama thisaih phuh ei la lymâ aw, Abeipa cha Zaio liata pahrâ tlôh ta.”