ZEREMIAH 6 - Mara Bible RV (BSI)

Zerusale nata Zudâh raona

¹ Hy Benzami pathlazy saih u, Abohna su lâ a râ u la, Zerusale tawhta pua teh u! Tekô liata chiahmie tô u la, Behakere liata ngiana poh chaluah teh u! Maw lâ tawhta chhiena vaw pua ta, Raona rarôh y ngaitapa a vaw pua.

² Laihsa chhithaipa nata panyupa Zaio sawchanô cha ei pahleipadia aw.

³ Mietaku vaituhpazy ta ama mietaku zawzy chhaota a vyhnao aw ei ta, A chheipâh liata ama poh ozy parai aw ei ta, Ama su chyu liata ama tlaih aw.

⁴ “Zaio sawchanô a dyuh awpa ta a chhuanoh u la, Thyu teh u, nohchhô locho nota a dyuh ei suh u! Châhrasala eima hu a po kaw dia, Noh a kia ha ta, Nohawh â zei ha hih!

⁵ Thyu teh u, zâ ta siehnao sih la, Abei ozy kei parao suh u!” ama tah.

⁶ Pheisaihzy Abeipa ta hetana heta a tah: “Zerusale thozy thlu u la, Khihpi dôh awpa ta, A thokhyzy alei pacho thlu teh u. Tlybaina ta a biepa khihpi châ ta, Hrie tlâhpa khihpi a châ.

⁷ Tikhaoh ta ti khâ a papuapa hawhta, A moleina khâ a papua. Atudaina nata raona pyu a chhôh liata theipa châ ta, Pasana nata hmahphaona zy ei hmiakô liata khâ ama y.

⁸ Hy Zerusale, zikyurâna he a papeisa mah y; Chataleipatala cha siesaipa ta, Roryhrapa ta cha tao aw na ta, Pahrâ tlâh leipa râh ta ei cha tao pathlei aw na.”

⁹ Pheisaihzy Abeipa ta hetana heta a tah: “Izarei laibâhpazy cha, Kre thei kâmo thohpa hawhta Tlokhuh kâmo thohpa châ ei sala; Kre thei lyutuhpa hawhta, A chiahzy pathâpazi heih teh u.”

¹⁰ Ahyzy ma zikyurâna bie he chho aw ei na ta, A nathlie aw ei tly i? Moh teh u, nakhaoh chopaw tai leipa châ ei ta, Nathlie thei veih ei. Âmo châta la Abeipa bie he zakheichhihpa hmo châ ta, Abeipa bie liata alyna hnei veih ei.

¹¹ Chavâta Abeipa pathiiana ta bie na ta, Mao-oh ngâ thlâh hapa he ei tha a chhâ kaw bâ. “Na pathiiana cha khiliah liata hawtizy chô liata patlai la, Satlia a y pakhypazy chô liata patlai mah y. A chanô chapaw ta lapa châ aw ei ta, Machâpazy nata nôpi pawpipazy chhao lapa ama châ aw.

¹² Râh liata a pahrâpazy chô liata ei ku hy aw na ta, Ama ozy cha mohropazy piepa châ aw ta, Ama lyu nata lapinôzy chhao­ mohropazy piepa a châ aw,” Abeipa ta a tah.

¹³ “A nawh chaipa tawhta a lai chaipa taihta, Chyhsa to karâyna ta bie ei ta, Â doleipa ta athôhna ama tlua; Hrohsopa nata theihthaipa a hlaopa ta, Chyhsa to ta hmo doleipa ama tao.

¹⁴ Ei phopi hmah cha, Naosiata ta patlâh a chhuahpa ta; Thlalôhna rai y leina daihti lia chhao ta, ‘Thlalôhna, thlalôhna,’ ama tah tyh.

¹⁵ Hmo pasichhihpa ama tao no khata, Nozana châh zy ama pahno tlyma i? Khâpa nozana châh cha ma ama pahno bao aw! Ama noza tiarâh leipa ta, Hmiachhie nawpa châh chhao pahno veih ei. Chavâta a paopazy hry liata pao hra aw ei ta, Âmo ei hriena daihti liata thy pathlahpa ama châ aw,” Abeipa ta a tah.

¹⁶ Abeipa ta hetana heta a tah: “Lâpizy liata a duahpa ta moh u la, Lâthlôh phapa yna lâhlôzy thâtih hiahri u la, Cha lâpi cha a chhih teh u; Nama thlahpa châta apahâna nama hmô aw,” tah ta. Châhrasala Izarei sawzy ta, “Cha lâpi cha a chhih aw ma pi,” tah ei ta.

¹⁷ “Riahvaituhpazy cha sopa ei na ta, Chiahmie pyu nathlie awpa ta ei cha chho ei. Châhrasala, ‘Nathlie aw ma pi,’ tah ei chi ta.

¹⁸ Chavâta Hy phopizy saih u, Nathlie u la; Hy zawpizy saih u, Ama chô liata a tlô awpa pahno teh u.

¹⁹ Hy leilô y, nathlie teh; Ei biezy nathlie leipa ei ta, Ei ryhpa ama dythapa vâta, Ama hmotaopa theilâpa chhiena cha, He phopi chô liata ei vaw patlôsa aw.

²⁰ Sebâ tawhta a vypa deiryh cha, Khâpa ma ei taona aw? Râh hlapi tawhta basuh a vypa chhao, Khâpa ma ei taona aw? Nama raopa hlânazy a pyh tlâh châ leipa ta, Namâ theihnazy ta na palysa hra vei.

²¹ Chavâta Abeipa ta hetana heta a tah: ‘He phopi hmiakô liata achapiana lôzy soh aw na ta, Cha liata amâ chapia aw; Paw nata saw a chapia khoh aw ei ta, Vaih nata a viasa ama leidia khoh aw.’”

²² Abeipa ta hetana heta a tah: “Moh teh u, maw lâ râh tawhta phopi miakha a vy ta, Alei su chhâna tawhta phopi rônahpa a vaw thyu.

²³ Libaw nata asei a chaba ei ta, Zawngiahna a hnei leipa nôchhiepazy ama châ. Ama pyu cha tilaipi a aohpa pyu lyu ta, Arâ kiah ei ta, Adyuhna châta pheisaih a patlâhpa hawhta a patlâh ei ta, Hy Zaio sawchanô y, hrâ ama cha vaw siehnao huh!”

²⁴ Cha kyh liata bie pathâhpa thei pi ta, Eima bâhtha a tlo khai haw; Nôpona ta miah patu ta, Chanô sawzeih pasapa tlu ta pasana ta miah a patu haw.

²⁵ Chariahpa ta zaozi hnei ta, Su to liata chichhihna a ypa vâta, Lyurâhpa lâ pua leipa u la, Lâpi liata chhao si hra khuh vy.

²⁶ Hy ei phopi zuah y, Eikhapi ta paraotuhpa miah a vaw tlô thlu awpa vâta, Latho poh a bu la, Buchâh liata a hluah mah y. Sawchapaw matlupa mâchhiesapa hawhta mâchhie sa la, Thata chaphôh tu mah y.

²⁷ “Ei phopi hroziezy pahnopa ta na pasia thei nawpa ei ta, Ei phopi hry liata thua pasiatuhpa ta ei cha tao.

²⁸ Ama zydua ta palôh laipa nata chhorupa châ ei ta, Chyhsa a reipachhie thaipazy a kao tyhpa ama châ. Dawh nata thua châ ei ta, Avyuhna a taopazy ama châ.

²⁹ Syuhu ta mei thata hmô ta, Ky cha mei liata a zao khai haw. Moleipazy thypa ama châ leipa vâta, Pathaisana rai cha hraoleipa a châ tyh.

³⁰ Abeipa ta a dytha hapa vâ ei ta, Tâkâ sôh leipa tahpa ama châ aw.”