ZEREMIAH 52 - Mara Bible RV (BSI)

Bei Zedekia nata Zerusale paona kyh

¹ Zedekia cha â bei pathao nota kô kih nata kô khapa châ ta, Zerusale liata kô hrawh hleikha â bei. A nô moh cha Hâmutâ châ ta, Libnâ khihpa Zeremiah sawchanô a châ.

² Zehôki taozie zydua hawhta tao hrapa ta, Abeipa mohmô liata hmo pha leipa tao ta.

³ Abeipa pathiiana vâta, a mohmô tawhta papua hana taihta, Zerusale nata Zudâh chô liata a vaw tlô hapa a châ. Zedekia cha Babylaw bei ry liata a ypa tawhta pua a chhuah ta.

⁴ Zedekia â beina kô chakina, thla hrawhna, noh hrawhna noh liata, Babylaw bei Nebukaneza cha a pheisaih zydua chhaota Zerusale siehnao ta. Khihpi cha dôh ei ta, khihpi dôhna diasuazy tao ei ta.

⁵ Bei Zedekia abeina kô hrawh hleikhana taihta khihpi cha dôh ei ta.

⁶ Thla palihna, noh chakina noh ta khihpi liata chakâh mozoh vaw tlô pathao ta, râh zawpizy châta niedo rai y khao leipa ta.

⁷ Chatanachata khihpi thokhy papyu ei ta, pheisaih zydua cha abei sadô kiapâh thokhy miano likawh liata a ypa chhikao lâ tawhta a zo ta a râ ei ta. Kaldia mo ta khihpi cha dôh thlâh ha ei ta. Arabâ bypi lâpi lâta sie ei ta.

⁸ Kaldia pheisaihzy ta abei cha a chadai ei ta, Zerikô bypi liata kei pha ha ei ta. Abei cha a pheisaih zydua ta a râsai khai ha ei ta.

⁹ Kaldia mo ta Bei Zedekia cha patu ei ta, Hâmathi râh Riblâ khihpi liata Babylaw bei lâ a chhi ei ta, cha liata a thâtih pachia ta.

¹⁰ Babylaw bei ta Zedekia sawchapawzy cha, ama paw mohmô lia tlai ta thie ta, Zudâh beimachâ zydua chhao Riblâ liata a thie khai ha ei.

¹¹ Zedekia cha a mozy thaoh ta, bâliazy ta buh ta. Babylaw bei ta Zedekia cha Babylaw lâ siekhei ta, a thi noh tlôna taihta patâhna o liata khô ta.

Achhyna o paraona

¹² Babylaw bei Nebukaneza abeina kô hrawh hleichakina, cha kô thla pangawhna, noh hrawhna noh liata, abei vaituhpazy hyutuhpa, Babylaw bei chakaotuhpa Nebuzarâdâ cha Zerusale a ngia ta.

¹³ Abeipa Achhyna o, abei o nata Zerusale liata o zydua mei ta rao ta, o rônahpa zydua mei ta a rao khai haw.

¹⁴ Zerusale padôpa ta taopa thokhyzy chhao, abei vaituhpazy hyutuhpa hnohta a ypa Kaldia pheisaihzy ta a zydua ta ama pacho khai haw.

¹⁵ Abei vaituhpazy hyutuhpa Nebuzarâdâ ta dyhchhie chaipa thokhazy, khihpi liata siesaipazy, Babylaw bei lâta âmo kho ta â hlâpazy nata zôthaipa laibâhpazy cha sei ta â chhi ha ei.

¹⁶ Râh chyhsa dyhchhie chaipa thokhazy deikua cha, pheisaih hyutuhpa Nebuzarâdâ ta kre sadô mohôhtuhpa nata leipalietuhpazy châta a siesai ei.

¹⁷ Abeipa o liata dawh tôhzy nata patyunazy nata dawh tipâh Abeipa o liata a ypazy cha, Kaldia mo ta pakeichheih ei ta, dawh zydua cha Babylaw lâ ama siekhei haw.

¹⁸ Beihzy, buchâh linazy, meiôh lao chakienazy, rahôzy, ropahâhpa raona beihkohzy nata Achhyna o liata chakaona châta hmâpa dawh hmobaoh zydua la khai ei ta,

¹⁹ nyuzy, mei lanazy, rahôzy, beihzy, sathaw meiôh sonazy, ropahâhpa raona beihkohzy nata dopa hlâna châta hmâpa biebuhzy chhao ama la khai haw. Abei vaituhpazy hyutuhpa ta, ngôh ta taopazy cha ngôh hmobaohzy hry liata soh ta, tâkâ ta taopazy cha tâkâ hmobaohzy hry liata sopa ta a siekhei khai haw.

²⁰ Bei Sawlawmaw ta Abeipa o châta dawh ta a taopa atôh miano, tipâh miakha, tipâh ry liata viahchao tôhpa pô hrawh hleino nata patyunazy cha, amâ hrina ziepa pathliah tiah awpa châ veih ei.

²¹ Atôh cha a chhôh pakaopa ta taopa châ ta, atôh miakha cha â sâhna lâ dy hrawh hleicharie châ ta, â pahlôna lâ dy hrawh hleino châ ta, zô palih a chha.

²² A pawhmao liata dawh lubyuhpa y ta, lubyuhpa cha dy pangawh â sâh. Dawh lubyuhpa cha dawh sao nata pawmikarânâ nothlahpazy ta pahlypa a châ. Atôh mianona chhao, cha hawhta taopa châ ta, pawmikarânâ nothlahpazy a hnei hra.

²³ A kâ lâta pawmikarânâ sychaki nata miacharu y ta, dawh sao chô liata pawmikarânâ a ypa zydua cha za kha a châ.

Izarei phopi Babylaw lâ sei ta ama sie

²⁴ Abei vaituhpazy hyutuhpa ta theihthai bei Seriah nata ano a pazipa theihthaipa Zephania nata ochhi vaituhpa pathôh zy patu ta.

²⁵ Pheisaih hyutuhpa pakha, khihpi liata a ypa beimachâ pasari, râh chyhsazy moh rona rai a hriapa chârohtuhpa pheisaih hyutuhpa nata khihpi liata a ypa râh chyhsa sycharu chhao khihpi tawhta a siekhei ha ei.

²⁶ Abei vaituhpazy hyutuhpa Nebuzarâdâ ta âmo cha a chhi ta, Riblâ khihpi liata Babylaw bei lâ tlôkhei ta.

²⁷ Babylaw bei ta Hâmathi râh Riblâ khihpi liata âmo cha chhawh ta, a thie ha ei. Chatanachata Zudâh pathlazy cha ama râh tawhta seichâna lâ ama siekhei haw.

²⁸ He he Nebukaneza ta Zudâh phopi sei ta â chhipazy maluh a châ: Kô sarina liata Zu chyhsa 3,023 a chhi ta,

²⁹ Nebukaneza abeina kô hrawh hleichariena liata, Zerusale tawhta chyhsa 832 sei ta â chhi ei.

³⁰ Nebukaneza abeina kô kih nata kô thôhna liata, abei vaituhpazy hyutuhpa Nebuzarâdâ ta Zu chyhsa 745 sei ta a chhi ta, ama zydua ta 4,600 ama châ.

Zehôkhi pathliena

³¹ Babylaw bei Evimerôdâ ta a ryureina â thaona kô liata, Zudâh bei Zehôkhi cha, seichâna lâ a sie tawhta kô sythôh nata kô sarina, thla hrawh hleinona, noh kih nata noh pangawhna noh ta patâhna o tawhta papua ta.

³² Evimerôdâ ta Zehôkhi cha bie pha a chho ta, Babylaw liata a hnohta a ypa beizy hlâta a sâh viapa ta patyusa ta.

³³ Zehôkhi cha patâhna o chysiazy pahluh ta, a hro chhôh zydua ta abei tlâhkhai liata pati a dôh lymâ.

³⁴ Â mohôhna châta, noh chareih ta â ngiahpa hawhta, a hro chhôh zydua, a thi noh tlôna taihta Babylaw bei ta tovyuh a pie lymâ.