ZEREMIAH 51 - Mara Bible RV (BSI)

Babylaw paraona

¹ Abeipa ta hetana heta a tah: “Moh teh u, paraotuhpa thlih ei pathyu aw; Babylaw chô liata pathli aw ta, Lebakâmai chyhsazy chô liata a pathli aw.

² Zietuhpazy Babylaw lâ tuah aw na ta, Âmo ta Babylaw cha zie aw ei ta, A râh ama parua aw. Nôpona noh vaw tlô aw ta, Su to tawhta Babylaw ama siehnao aw.

³ Likathaipa ta a libaw a kei hmâ leipa sala, Thua viahkao a kypa chhao, A duah hmâ khah sy. A satliazy pahlôh leipa u la, A pheisaih zydua tlokhuh pahleipadia khai teh u.

⁴ Kaldia râh liata thiepa ta pao aw ei ta, A khiliahzy liata a chôsaopa ama châ aw.

⁵ Ama Khazohpa, Pheisaihzy Abeipa ta Izarei nata Zudâh cha siesai leipa ta, Kaldia râh deikua cha moleina ta bie ta, Izarei Mo Pathaihpa chô liata ama moleina ta a bie.

⁶ “Babylaw khih chhôh tawhta a râ u la, Chyhsa to ama hrona pabohsa mawh ei sy! Babylaw moleina vâta leidia khah u; He he Abeipa phuh lana daihti châ ta, Babylaw viari a thôna daihti a châ hih.

⁷ Babylaw cha Abeipa ku liata ngôh nyu châ ta, Khizaw zydua a parisa tyhpa a châ; Phopizy ta a kresawhti cha doh ei ta, Chavâta phopizy cha ama hru khai haw.

⁸ Babylaw cha eikhapi ta pao ta, A keichheih haw; Chakhei u la, A hmah liata thohna hniapa teh u, A tlâh thei ngyu aw.

⁹ Babylaw cha patlâh a chhuah pi ta, Châhrasala tlâh thei vei. Chavâta ano cha siesai sih la, Eima râh chyu lâta sie ei suh u; Ano hrie nawpa kyh vârâh tlô ha ta, Avâ taihta chalopa a châ ha hih.

¹⁰ Abeipa ta thai miah pachâsa ha ta, A vy u la, Abeipa eima Khazohpa hmotaopa cha, Zaio liata phuah suh u.

¹¹ “Châtaizy chata u la, Vyhphaozy a chaba teh u! Abeipa ta Babylaw parao a chhuah ha ta, Chavâta Media beizy palôh a pathyu haw; Cha cha Abeipa phuh lana châ ta, Achhyna o phuh a lana a châ.

¹² Babylaw thokhyzy cha ngiana poh chaluah chie u la, Khihpi vaina cha thapatlô teh u; Vaituhpazy soh u la, A byh nawpazy a chhuanoh teh u; Babylaw chyhsazy kyh a reipa kha, Abeipa ta a chhuanoh ta a tao ha hih.

¹³ Hy nâ, ti hluhpi kiah liata pahrâ chi ta, Ryusôhpazy a hnei hluhpa y, Na chhâna vaw tlô ha ta, Na hrona ri a chie haw.

¹⁴ Pheisaihzy Abeipa ta a hrona reipa ta, Hetana heta bie â taih haw: Khawsu pôpi hawhta a hluhpa Chyhsapa ta cha pabie aw na ta, Pahniena hladyuh ama cha pathluah thlu aw.

¹⁵ “A hmotaotheina ta alei tao ta, A sona ta khizaw padua ta, A novâhna ta avâ a parai.

¹⁶ A ao a papua nahta, Avâ liata ti pyuzy paro ta, Khizaw kaokih tawhta ameihzy a pathyu tyh. Vâsua châta dôhla pathliesa ta, A ryubyh tawhta thlih a pathlisa tyh.

¹⁷ Chyhsa to ahrupa châ ei ta, Pahnona hnei veih ei. Nothlahpazy cha dôveina dei châ ei ta, Âmo liata husona y vei; Chavâta ano taopa nothlahpazy cheingei ta, Ngôh daihtuhpa cha nozapa ta a paysa tyh.

¹⁸ Phahnaina a hnei leipa châ ei ta, Dôveina raihria a châ; Âmo hriena daihti liata ama leidia aw.

¹⁹ Zakaw Tovyuh deikua cha, Cha hawhta châ vei, Ano cha ato taotuhpa a châ; Izarei cha a ryuto chipho châ ta, A moh Pheisaihzy Abeipa a châ.

²⁰ “Hy Babylaw, nâ cha ei chariah tuna ahrei châ chi ta, Ei adyuhna chaihrai na châ; Nâma hmâpa ta phopizy chaphie ei na ta, Nâma hmâpa ta khinarâhzy ei pahleipadia ha ei.

²¹ Nâma hmâpa ta arâ nata a kiahtuhpa chaphie ei na ta, Nâma hmâpa ta talailih nata a haohtuhpa ei chaphie ha ei.

²² Nâma hmâpa ta chanô nata chapaw chaphie ei na ta, Nâma hmâpa ta hawti nata machâ ei chaphie ha ei. Nâma hmâpa ta satlia nata laihsa chaphie ei na ta,

²³ Nâma hmâpa ta mietaku vaituhpa nata a mietaku zaw ei chaphie ha ei; Nâma hmâpa ta lyutaopa nata a viahchao tôhpa bao chaphie na ta, Nâma hmâpa ta râhvaotuhpazy nata beimachâzy ei chaphie ha ei.

²⁴ Châhrasala Babylaw khihpi nata Kaldia chyhsazy cha, Zaio chô liata hmo chhiepa ama taopa zydua vâta, Nama mohmô lia tlai ta viari ei thô aw ei,” Abeipa ta a tah.

²⁵ “Hy khizaw zydua a paraotuhpa tlâhpi, Moh teh, ei châ dyuh hih; Na chô liata ei ku hypa ta, Lôkâh sâhpa tawhta cha pahluah aw na ta, Tlâh kâupa ta ei cha tao aw” Abeipa ta a tah.

²⁶ “A ki lô châta Nâ tawhta alô lapa châ khao leipa aw ta; Abôna lô châta chhao, Nâ tawhta lapa châ khao aw vei; Chhâzaw ta roryhrapa ta na y aw,” Abeipa ta a tah.

²⁷ “Râh liata ngiana poh chaluah u la, Phopizy hry liata chiahmie tô teh u; Ano a dyuh awpa ta khinarâhzy aw u la, Ararâ, Mini nata Askenâ râhzy aw teh u; Ano a dyuh awpa ta pheisaih hyutuhpa rao u la, Khawsu pôpi hawhta hluhpa ta arâzy a chhi teh u.

²⁸ Babylaw a dyuh awpa ta, Phopizy pachhuahpanoh teh u; Media beizy pachhuahpanoh u la, Ama râh avaotuhpazy nata baotuhpazy pachhuahpanoh teh u; Ama biehneina ry liata râh zydua chhao, Pachhuahpanoh teh u.

²⁹ “Babylaw râh cha roryhrapa ta taopa ta, Chyhsa pahrâ leina râh ta tao awpa ta, Abeipa hmochhuahpa cha a vaw tlô hapa vâta, Babylaw râh cha pasataopa ta â chalyu.

³⁰ Babylaw pasaiphazy cha, Chariah a dyuh khao veih ei; Ama thokhy chhôh liata tlôh ei ta, Ama riahphana a dia haw; Chanô ama lyu bâ. A pahrâna suzy kâ khai ha ta, A thokhy chhikao hraina lâhreizy a tlie khai haw.

³¹ A khihpi cha su to liata la hapa a châna kyh Babylaw bei chho awpa ta, Zikyurâtuhpa ta zikyurâtuhpa hropa a kei tyh ta, Lyuhchâpa ta lyuhchâ hropa â kei tyh.

³² Chavah chakana suzy la ha ei ta, Tichhoh yna liaryhzy mei ta ama rao haw; Pheisaihzy thlazohpa ta ama y.”

³³ Pheisaihzy Abeipa, Izarei Khazohpa ta hetana heta a tah: “Babylaw sawchanô cha, Sâh tly nota sawhri hawhta a châ; Bohpi leipa ta a sâh hria daihti a vaw tlô aw.”

³⁴ Zaio khihsawzy ta, “Babylaw bei Nebukaneza ta na palâ ha ta, Eina chaeih pazao haw; Beih ruapa ta na tao ta, Parihpi hawhta eina palâ haw; Ei niedo pahâhpazy ta a py a pabie ta, Chysia hawhta na saoh ta eina thy haw.

³⁵ Kei nata ei chiheihzy chô liata Thachahra miah ama hmâ thlupa he, Babylaw chô liata vaw tlô mawh sy,” tah ei sala, Zerusale ta, “Ei thisaih maoh cha, Kaldia chyhsazy chô liata a y aw,” tah mawh sy.

³⁶ Chavâta Abeipa ta hetana heta a tah: “Pachâ teh, na chhâh a châ aw na ta, Na phuh ei cha lapa aw. A tilaipi pakua aw na ta, A tihnawh ei pachawhkaraisa aw.

³⁷ Babylaw cha raona apathlupa châ aw ta, Changiezy tlaihna a châ aw; Su chichhihpa nata hmaotô chiepa châ aw ta, Chyhsa pahrâ leina khihpi a châ aw.

³⁸ Chakeibarôhneipazy hawhta, Hmaohkha ta a rôh aw ei ta; Chakeibarôhneipa tawzy hawhta, Ama sâh aw.

³⁹ Ama parôpachaw kaw nota, Kyhchhi ei taopa aw ei; Parisa aw ei na ta, Thaphapa ta ei paysa aw ei; Chhâzaw ta a mô aw ei ta, Thyu khao aw veih ei,” Abeipa ta a tah.

⁴⁰ Mietakutaw thie awpazy hawhta A chhi aw ei na ta; Mietaku tôhpa nata mie tôhpa thie awpazy hawhta, Ei chhi aw ei.

⁴¹ “Kheihta ma Sesâ cha lapa châ ta, Khizaw zydua ta reithaipa cha, Patupa a châ tly! Kheihta ma Babylaw cha, Phopizy hry liata Roryhrapa ta a y tly!

⁴² Babylaw cha tilaipi ta vao ta, Tichatlaopa a aoh ngâpa ta a vao haw.

⁴³ A khihpizy roryhra khai ha ta, Râh raohpa nata râhchawhpa lâta amâ lie haw; Chyhsa pahrâ leina râh châ ha ta, Chyhsa saw chapia leipa râh lâta â lie haw.

⁴⁴ Babylaw liata Bel cha hrie aw na ta, A palâ hapa chhao, A pakah tawhta ei thaoh aw. Babylaw thokhy cha a cho haw, Phopizy ta ano cha by khao aw veih ei.

⁴⁵ “Hy ei phopi sawzy, Babylaw chhôh tawhta pua teh u; Abeipa hiehâhna ru ngaitapa tawhta, Chyhsa to ama hrona pabohsa mawh ei sy!

⁴⁶ Râh liata bie pathâhpa nama thei tita, Nama palôh panao leipa sala, Chi hra khuh vy; Kô kha liata bie pathâhpa vaw tlô aw ta, Kô hropa liata a vaw tlô heih aw; Ryureituhpazy a chakhia aw ei ta, Râh liata atudaina a y aw.

⁴⁷ “Chavâta pachâ teh u, Nohzy a vaw tlô hai; Cha nohzy liata, Babylaw khazoh nothlahpazy cha hrie aw ei na ta, Râh pôhpalôhpa maophyuhpa ta ei paysa aw; A chyhsa ama thiepa zydua A chhôh liata pao aw ei ta, Ama ri â zawh aw.

⁴⁸ Paraotuhpa ta maw lâ tawhta Babylaw a vaw siehnao awpa vâta, Lei nah vâ nata a chhôh liata a ypa zydua ta, Babylaw cha amâ lyna hla ama sa chie aw,” Abeipa ta a tah.

⁴⁹ “Babylaw ta khizaw râh zydua liata Chyhsa thie ta a papaopa hawhta, Babylaw cha Izarei ta thie aw ta a papao aw.

⁵⁰ “Nâmo zaozi a khôkhâhtuhpazy saih u, Sie u la, lâpi liata a duah khuh vy! Abeipa cha lâhlapi tawh chhao ta a thei u la, Nama palôh liata hetana heta Zerusale a lâ mawh sy:

⁵¹ ‘Chi hropazy vaw tlô ei ta, Abeipa o su pathaihpazy liata amâ ngiapa vâta, Reipachhiena biezy eima thei; Nozapa ta y pi ta, Nohzaona ta eima hmia a khu haw.’

⁵² “Chavâta moh teh u, Nohzy a vaw tlô hai; Cha nohzy liata, Babylaw khazoh nothlahpazy cha pachia aw ei na ta, Babylaw râh zydua hmaphaohpazy ta bie aw ta, Amâ hrô hôlô aw,” Abeipa ta a tah.

⁵³ “Babylaw cha avâ daihpa ta, Thokhy sâhpa a tu hra sala, Ei tuapa paraotuhpa ta a siehnao pyly aw,” Abeipa ta a tah.

⁵⁴ “Nathlie tua u, Babylaw tawhta chana ao vaw pua ta, Kaldia râh tawhta raona pyu ru ngaitapa a vaw pua chu!

⁵⁵ Abeipa ta Babylaw cha pahleipadia hai ta, A pyu ru ngaitapa a padiasa hai. A chariahpazy ta Tichatlaopa thatlôpa hawhta vaw su aw ei ta, Ama pyu ru ngaitapa â vih ngâ kaw aw.

⁵⁶ Babylaw cha paraotuhpa ta a vaw tlô thlu hai; A pasaiphazy patupa châ aw ei ta, Ama libawzy thlie pachhôpa a châ aw; Abeipa cha viari a thôpa Khazohpa châ ta, Viari a thô thlyu aw.

⁵⁷ Babylaw beimachâzy nata a chyhsa sopazy parisa aw ei na ta, Râhvaotuhpazy ei parisa aw ei; A pheisaih hyutuhpazy parisa aw ei na ta, A pasaiphazy ei parisa aw ei; Chhâzaw ta a mô aw ei ta, Thyu khao aw veih ei,” Abeipa, a moh Pheisaihzy Abeipa ta a tah.

⁵⁸ Pheisaihzy Abeipa ta hetana heta a tah: “Babylaw thokhy chhapa cha pachopa châ aw ta, A chhikao a sâhpazy mei ta raopa a châ aw. Phopizy cha hraoleipa ta hriapasa ei ta, Râhzy ta mei châta ama rie tlâ amâ pathei.”

⁵⁹ He bie he Zudâh bei Zedekia ryureina kô palihna liata Babylaw lâ siekheipa a châ nota, a hnohta a sie hrapa Mâsei sawchapawpa Neriah sawchapawpa Seriah hnohta, Zeremiah ta bie a piepa a châ. Seriah cha abei o liata hyutuh chaipa a châ.

⁶⁰ Zeremiah ta Babylaw chô liata chhiena a tlô awpa zydua, Babylaw kyh liata he bie zydua he châbu liata roh ta.

⁶¹ Zeremiah ta Seriah hnohta: “Babylaw na tlô tita, he bie zydua he reih tlai la,

⁶² ‘Hy Abeipa y, he su kyh liata, chhawh pathlahpa châ aw ta, chyhsapa tlyma râhsa tlyma, khâpa hmahta pahrâ khao leipa ta, chhâzaw ta roryhrapa ta a y awpa kyh na rei hapa kha a châ,’ tah mah y.

⁶³ He châbu he na rei khai nahta, alô nata chahry pâ la, Ufrâti chavah liah liata thy la,

⁶⁴ ‘He châbu hawhna heta Babylaw cha a pamôh aw ta, a chô liata chhiena ei patlôsa awpa vâta, thyu khao aw vei, thachhâ ngaitapa ta ama y aw,’ tahpa ta reih mah y,” tah ta. Kha via kha Zeremiah biezy cha a châ.