ZEREMIAH 50 - Mara Bible RV (BSI)

Babylaw pachiana

¹ He he Babylaw khihpi nata Kaldia râh kyh liata, Abeipa ta hrohsopa Zeremiah hmâpa ta a reipa bie a châ:

² “Phopizy hry liata phuahpa ta tlâh awh u la, Ngiana poh chaluahpa ta awh teh u; ‘Babylaw cha lapa châ ta, Bel maophyuhpa ta y ta, Merôdâ thlazohpa ta a y. A nothlah leihpazy maophyuhpa ta y ei ta, A khazoh nothlahpazy thlazohpa ta ama y,’ Tahpa ta phih leipa ta phuah teh u.

³ “Maw lâta phopi ta za siehnao aw ta, A râh roryhrapa ta a tao aw; Chyhsapa nata râhsa zydua a râ khai aw ei ta, Râh liata a pahrâpa y khao aw veih ei.

⁴ “Cha nohzy liata nata cha daihti liata, Izarei sawzy nata Zudâh sawzy hmaohkha ta amâ vy aw; Chana chôta a vy aw ei ta, Abeipa ama Khazohpa ama tlua aw,” Abeipa ta a tah.

⁵ “Zaio lâpi hiahri aw ei ta, Zaio lâ hmiachhypa ta, ‘A vy teh u, Chhâzaw biehrai my khao lei awpa tao sih la, Abeipa cha a zao ei suh u,’ ama tah aw.

⁶ “Ei phopi cha mietaku a leipa ama châ. Âmo vaituhpazy ta paviasa ei ta, Tlâhpizy lâta amâ chhi; Tlâhpi tawhta tlâhthlôh lâta viavi laih ei ta, Amâ syna mietaku o ama my haw.

⁷ A hmôpa maihta âmo cha palâ ei ta, Ama chariahpazy ta, ‘Keimo thaileina châ vei, Âmo tlai ta siana pahrâna Abeipa chô liata molei ei ta, Âmo pathlatuhpazy hnabeiseihna Abeipa chô liata ama moleipa vâta a châ,’ ama tah.

⁸ “Babylaw tawhta a râ u la, Kaldia râh tawhta pua teh u; Mie zaw liata mie tôhpazy hawhta y teh u.

⁹ Pachâ teh u, maw lâ râh phopi rônahpazy pahmaoh aw ei na ta, Babylaw a dyuh awpa ta pathyu aw ei na ta ei vaw chhi aw ei. Babylaw a dyuh awpa ta a paziah aw ei ta, Babylaw cha maw lâ tawhta pahniepa a châ aw. Ama châtaizy cha, Chariah a dyuh thaipa pasaipha lyu ei ta, Ku ruapa ta a kua leipa a châ.

¹⁰ Kaldia cha hraopa châ aw ta, A hraotuhpazy lôhrâtlôpa ta ama y aw,” Abeipa ta a tah.

¹¹ “Hy ei ryuto a hraotuhpazy saih u, Thaphapa nata thapawh kawpa ta ypa ta, Si panyupa su liata viahchao zeinô hawhta a chapiepa ta, Arâ tôhpa hawhta sâh hra u la,

¹² Nama nô cha noza ngaitapa ta y aw ta, Châ satuhnô cha nohzaopa ta a y aw. Pachâ teh u, phopizy hry liata Nawh chaipa a châ aw; Râh chawhpa nata râh raohpa châ aw ta, Sadi by lâta â lie aw.

¹³ Abeipa hiehâhna vâta râh cha, Pahrâpa châ khao leipa aw ta; Tlokhuh roryhrapa ta y aw ta, Babylaw a chapiapa maihta rarôh y ama tah aw; A hmah zydua vâta Ama hmao ama tô chie aw.

¹⁴ “Libaw a keituhpa zydua saih u, Babylaw chadôpa ta a paziah u la, Châtaizy chado leipa ta Babylaw cha ka teh u; Abeipa chô liata a molei haw.

¹⁵ Su to tawhta rahao chie teh u; A chariahpa ku liata â pie ha ta, A diasuazy pao ta, A thokhyzy a cho haw. Abeipa phuh lana a châ hih: A chô liata phuh la u la, A taopa hawhta a chô liata tao hra teh u.

¹⁶ Chi hietuhpa cha, Babylaw tawhta chhawh pathlah u la; Savâ ta sâh a hria tyhpa chhao, Chhawh pathlah teh u. Tlybaituhpa zaozi vâta, Chyhsa to âmo phopi chyu pangai ei sala, Âmo râh chyu lâta a râ mawh ei sy.

¹⁷ “Izarei cha mietaku pai patlapa châ ta, Chakeibarôhneipa ta â chadai pai hapa a châ. Asuria bei ta ano cha palâ tua ta, Tahmâ Babylaw bei Nebukaneza ta a ruzy a thlie haw.

¹⁸ “Chavâta Pheisaihzy Abeipa, Izarei Khazohpa ta hetana heta a tah: “Pachâ teh u, Asuria bei ei hriepa hawhta, Babylaw bei nata a râh chhao ei hrie aw.

¹⁹ Izarei cha a tlaih tyhna su lâ a chhi heih aw na ta, Kâmel nata Bâsanâ liata tlaih heih aw ta, Epharai tlâhzy nata Kilia liata Hro lôhrâtlôpa ta a y heih aw.

²⁰ Laibâhpa châta ei pahlôhpazy cha, Ei ngiahthai awpa vâ ei ta, Cha nohzy nata cha daihti liata, Izarei liata paraona tlua aw ei ta, Hmô aw veih ei; Zudâh liata moleina tlua aw ei ta, Hmô aw veih ei,” Abeipa ta a tah.

²¹ “Merâthai râh siehnao u la, Pekô mo siehnao teh u. Âmo cha thiepa ta tlokhuh pahleipadia u la, Bie ei cha piepa zydua ei kha tao khai teh u,” Abeipa ta a tah.

²² “Râh liata adyuhna pyu y ta, Pahleipadiana rarôh ypa pyu a y!

²³ Khizaw pôhpalôhpa syulô cha, Tlie ta a kei thlâh ha dia! Kheihtazieta ma Babylaw cha, Phopizy hry liata su chichhihpa lâta a pua haw!

²⁴ Hy Babylaw, Khoheih ei cha chôkhâhpa liata a ao ha chi ta, Châhrasala pahno va chi; Abeipa na chakhiapa vâta, Hmôpa châ chi ta, Patupa na châ.

²⁵ Pheisaih Abeipa Zehôvâh cha, Kaldia râh liata tao awpa a hneipa vâta, A chariah chhaichhi sona pahy ta, A hiehâhna chaihraizy a thaoh haw.

²⁶ Râhri chhâna su to tawhta vaw siehnao u la, A sawpâhzy pahy khai teh u; Sâh pathlupa hawhta Babylaw cha pathlu u la, Tlokhuh pahleipadia teh u; Khâpa hmah pahlôh khuh vy.

²⁷ A viahchao tôhpazy thiena su la zu ei sala, Thie khai ha teh u. Ama noh vaw tlô ta, Âmo hriena daihti a vaw tlô haw; Ama hu a po kaw dia!

²⁸ “Abeipa eima Khazohpa phuh lana kyh Zaio liata phuahpa ta, Achhyna o phuh lana kyh phuah awpa ta, Babylaw râh tawhta a vaw râpazy ao nathlie u la, Riahnyupazy ao nathlie teh u.

²⁹ “Babylaw a dyuh awpa ta, Likathaipazy aw u la, Libaw a keipa zydua aw teh u. Babylaw chadôpa ta riehmozy paryh u la, Ahy hmah papua khuh vy. A hmotaopa lymâ hawhta viarithô u la, A taopa zydua hawhta a chô liata tao teh u; Sâlâ kawpa ta Abeipa a dyuh ta, Izarei Mo Pathaihpa a dyuhtuhpa a châ.

³⁰ Chavâta a satliazy cha, A tlyliahzy liata pao aw ei ta; A pheisaih zydua chhao, Cha noh liata pahleipadia khaipa ama châ aw,” Abeipa ta a tah.

³¹ “Hy nâ, chyhsa a palaipa, ei châ dyuh; Na noh vaw tlô ha ta, Ei cha hrie nawpa daihti a vaw tlô haw,” Pheisaihzy Abeipa Zehôvâh ta a tah.

³² “Apalaipa chyhsa cha, A chapiapa ta pao aw ta, A pathyu awpa y aw veih ei; A khihpizy liata mei patih aw na ta, A chheipâh liata a ypa zydua a kâ khai aw.

³³ “Pheisaihzy Abeipa ta hetana heta a tah: Izarei sawzy tlybaipa ta y ei ta, Zudâh sawzy chhao âmo hnohta tlybaipa ama châ. Sei ta âmo a chhituhpa zydua ta Khâchâ patu ha ei ta, Pathlie khoh veih ei.

³⁴ Châhrasala âmo Chatlaituhpa cha, Thatlôpa châ ta; A moh Pheisaihzy Abeipa a châ. Ano ta âmo chhâh a châ aw ta, Khizaw liata thlalôhna a paysa aw; Babylaw chyhsazy chô liata deikua cha, Tymâna a patlôsa aw.

³⁵ “Zaozi ta Kaldia mo a dyuh aw ta, Babylaw chyhsazy â dyuh aw; A beimachâzy nata a chyhsa sopazy chhao, Â dyuh aw ei,” Abeipa ta a tah.

³⁶ “Zaozi ta hrohso pakheipazy a dyuh aw ta, Âmo cha ahrupazy ama vaw châ aw. Zaozi ta a pasaiphazy a dyuh aw ta, Pahleipadiapa ama châ aw.

³⁷ Zaozi ta Babylaw arâzy nata talailihzy a dyuh aw ta, A râh chhôh liata râh hropa pheisaih zydua â dyuh aw; Chatanachata chanô hawhta ama châ aw. Zaozi ta a ryusôhpazy a dyuh aw ta, Hraopa ama châ awh.

³⁸ Nohkâhna ta a tizy a dyuh aw ta, Ama kua khai aw. Khazoh nothlahpazy yna râh châ ta, Khazoh nothlahpazy vâta Ama hru khai hana râh a châ.

³⁹ “Chavâta Babylaw râh cha, Sahrâhpa nata changiezy pahrâna châ aw ta, Pavawpizy pahrâna a châ aw. A chhôh liata chyhsa pahrâ beih khao leipa aw ei ta, Chhâ zydua ta a pahrâpa y khao aw veih ei.

⁴⁰ Khazohpa ta Sawdawmâ nata Kawmawrâ parao ta, A chheipâh khihpizy a parao khai hapa hawhna khata, Cha liata ahy hmah pahrâ khao leipa aw ei ta, Cha lâ a paihpa chyhsa saw ahy hmah y aw veih ei,” Abeipa ta a tah.

⁴¹ “Moh teh u, maw lâ tawhta phopi miakha a vy ta, Phopi thatlôpa nata bei hluhpizy cha, Alei su lâhla chaipazy tawhta ama vaw thyu.

⁴² Libaw nata asei a chaba ei ta, Zawngiahna a hnei leipa Nôchhiepazy ama châ. Ama pyu cha tilaipi a aohpa pyu lyu ta, Arâ kiah ei ta, Adyuhna châta pheisaih a patlâhpa hawhta amâ patlâh; Hy Babylaw sawchanô y, Hrâ ama cha vaw siehnao huh.

⁴³ “Babylaw bei cha ama thâtih a thei nahta, A bâhtha a tlo khai haw; Nôpona ta patu ta, Chanô sawzeih pasapa tlu ta pasana ta a patu haw.

⁴⁴ “Pachâ teh u, chakeibarôhneipa ta sibiepa su phapa liata mietakuzy Zawdâh râhmâhpa tawhta eikhapi ta a vaw puahnaopa hawhta, Babylaw chhao a râh tawhta eikhapi ta parâsa aw na ta, ei khopa maih a chô liata biehneituhpa ta ei rao aw. Kei hawhpa he ahy y tly? Ahy ma a hmiakô liata a luah awpa ta nâ aw thei tly? Kheihawhpa mietaku vaituhpa ma ei hmiakô liata a duah thei aw tly?

⁴⁵ Chavâta Babylaw chô liata Abeipa ta tao â chhuahpa he nathlie u la, Kaldia râh chô liata tao â chhuahpazy he nathlie teh u: Ama sahroh zaw tawzy a daophipa châ aw ei ta, ama hmo a tyhpa cha ama tlaihna sibiepa suzy taihta rarôh y ama tah aw.

⁴⁶ Babylaw pahniena pyu ta alei chalyusa aw ta, a chana ao cha phopizy ta ama thei aw.”