ZEREMIAH 5 - Mara Bible RV (BSI)

Zerusale ro khoh vei

¹ Zerusale khiliah liata a râhreih u la, Moh u la, ngia teh u! A tlyliahzy liata tlua u la, Adona tao ta ngâchhihna a tluapa Pakha chhâ nama hmô khiahta cha, Zerusale cha ei ngiahthai aw.

² “Abeipa hrona reipa ta ei reih,” tah taraw ei ta, Haipa ta bie â taih tyhpazy ama châ.

³ Hy Abeipa, ngâchhihna vei ma na mo ta a tlua tyh vei? Âmo cha tu chi ta, Châhrasala pasa a pahno hlei leipa ei ta, Âmo cha palâ chi ta, Châhrasala chhoreina a pyh khoh hlei veih ei. Ama hmia alô hlâta pachâsa via ei ta, Ro khoh veih ei.

⁴ Chatawhcha kei ta, “Hezy he dyhchhiepazy deita châ ei ta, Hmo a pahno thai leipazy ama châ hih; Abeipa lâpi pahno leipa ei ta, Ama Khazohpa ryhpa pahno vei ei.

⁵ Chhituhpazy lâ vawh aw na ta, Ama hnohta ei kei reih aw; Âmo cha Abeipa lâpi pahno thlyu aw ei ta, Ama Khazohpa ryhpa ama pahno tlai aw,” tah na ta. Châhrasala a paraohpa ta raopaky thlie ei ta, Bâliazy ama chhie haw.

⁶ Ama paraonazy hluh ta, Ama paona a lai ngaitapa vâta, Râhmâhpa chakeibarôhneipa ta âmo cha tai aw ta, Râhchawhpa changie ta a sie aw ei; Keihchhoh ta ama khihpizy a byh aw ta, Khihpi tawhta a puapazy a hriechheih lymâ aw ei.

⁷ “Kheihta ma ei châ ngiahthai thei aw? Na sawzy ta na siesai ei ta, Khazoh a châ leipazy moh reipa ta bie amâ taih hapa cha. Ama rihbiena taihta ei pasapa chhao ei ta, Nâ pheisai pyly ei ta, Âzuahnôzy o lâ a hripi ta ama ngai tyh.

⁸ Arâ tôhpa sa phapa, a paw a khohpa lyu ei ta, Chyhsa to ama vaih lapinô hiatliapa ta ama sâh tyh.

⁹ Cha hmozy vâna chata hrie aw veih ei na ma? Cha hawhpa phopi chô liata ei phuh la aw va na ma?” Abeipa ta a tah.

¹⁰ “A kre sadôzy lâ khypa ta kaw parao u la, A chhâna taihta deikua parao khuh vy. A chiahzy chhao Abeipa eih ama châ leipa vâta, Thlâ khai ha muh vy.

¹¹ Izarei pathlazy nata Zudâh pathlazy he Sathisahlai ngaitapa ta ei chô liata a ypazy ama châ,” Abeipa ta a tah.

¹² Abeipa kyh haipa ta reih ei ta, “Khâpa hmah tao hlei aw vei; Chhiena eima chô liata vaw tlô leipa aw ta, Zaozi nata chakâhna zy a tyh aw ma pi.

¹³ Hrohsopazy chhao ziza dei châ aw ei ta, Âmo liata bie y aw vei. Cha hawhna chata ama chô liata taopa a châ aw!” ama tah.

Abeipa ta pachiana a phuah

¹⁴ Chavâta Zehôvâh, Pheisaihzy Khazohpa ta hetana heta a tah: “Cha hawpa bie cha ama reipa vâta, Pachâh teh, ei biezy cha na pakah liata mei pachâsapa ta, He phopi he tho pachâsa aw ei na ta, Mei ta a kâ khai aw ei.

¹⁵ Hy Izarei pathlazy saih u, Moh teh u, nâmo châ dyuh awpa phopi Lâhlapi tawhta ei vaw chhi aw. Cha phopi cha phopi thatlôpa châ ta, Phopi hlôpa a châ. Ama reih na thei leipa phopi châ ta, Ama bie reipa na pahno leipa phopi a châ,” Abeipa ta a tah.

¹⁶ “Ama châtai byh cha chhi a pahypa châ ta, Ama zydua ta pasaipha sai ama châ.

¹⁷ Na kôvei nata pati zy nie khai aw ei ta, Na sawchapawzy nata sawchanôzy ama nie khai aw. Na mietaku zawzy nata na viahchao hrizy nie khai aw ei ta, Na kre zôhzy nata na theiku kôzy ama nie khai aw. Nâ ngâchhâpa na thokhy khihpizy tlai chhao, Zaozi ta ama parao khai aw.”

¹⁸ “Châhrasala cha nohzy liana chhao chata, cha pamua pathlah aw veih ei na,” Abeipa ta a tah.

¹⁹ Chyhsazy ta, “‘Khazia ma Abeipa eima Khazohpa ta he hmo zydua he eima chô liata a tao tly?’ ama tah tita, ‘Na siesai ei chi ta, chihropa khazohzy nama râh liata nama chakaopa hawhta, nâmo chhao nama râh a châ leipa liata chihropazy nama chakao aw,’ Abeipa ta a tah,” na tah aw.

²⁰ He thâtih he Zakaw pathlazy liata phuah u la, Zudâh râh liata pathâhsa teh u:

²¹ “Hy ahrupa nata novâhna a hnei leipazy saih u, He he thei teh u. Mo hnei ei chi ta, Châhrasala hmô veih ei chi; Nah hnei ei chi ta, Châhrasala thei veih ei chi.

²² Na chi aw veih ei chi ma? Ei hmiakô liata a chalyu aw vei ei chi ma? Kei he tilaipi râhri châta sadi a sohtuhpa châ na ta, Tilaipi a khô lei nawpa ta, Chhâzaw pakhâna châta sadi a sohtuhpa ei châ. Tichatlaopazy a chatlao ngâ kaw hra ei sala, Râhri khô thei leipa ei ta; A aoh ngâ kaw hra ei sala, Râhri siepakhô thei veih ei,” Abeipa ta a tah.

²³ “Châhrasala he phopi he palôh kuhchhapa châ ei ta, Chhorupa ama châ; Lâpi tlei ei ta ama sie nano syulyu haw.

²⁴ ‘A daihti ta avâ pasuasa ta, Chasipaw avâ nata châhvâ avâzy pasuasapa ta, Sâh hria daihti liata avâ a pahiasatuhpa, Abeipa eima Khazohpa cha chi ei suh u,’ Tahna châh ama palôh ta pahno vei.

²⁵ Nama paraonazy ta vâsuazy pakuasa ta, Nama moleinazy ta hmo phapa a cha paky ei.

²⁶ Ei phopi hry liata moleipazy y ei ta, Pavaw a byhtuhpa hawhta, A bôhpa ta ama chadi tyh. Khoheih chôh ei ta, Chyhsazy ama pa-ao tyh.

²⁷ Pavaw byh liata pavaw a biepa hawhta, Ama ozy cha dôveina ta bie ta, Chavâta kaw lai ei ta ama hneirôh.

²⁸ Thawh ei ta, Ama mitlaoh pha kaw. Moleina hmo taona kyh liata deikua, Â daihpa pahno veih ei; Paw hnei leipazy amâ tivy thei nawpa ta, Adona ta ama bie pachiapa leipa ei ta, Dyhchhiepazy pikhei tovyuh a duakhei veih ei.

²⁹ He hmozy vâna heta hrie aw veih ei na ma? He hawhpa phopi chô liana heta ei phuh la aw va na ma?” Abeipa ta a tah.

³⁰ Râh liata chichhihpa hmo vaw tlô ta, Rarôh ypa hmo a vaw tlô:

³¹ Hrohsopazy ta haipa ta hrohsona biezy phuah ei ta, Theihthaipazy ta âmo rei sai ta ryu ama reih. Cha hawhta taopa cha ei phopi khonazie châ kaw ta, Châhrasala chhâna noh a vaw tlô tita, Kheihta ma namâ tao aw tly?