ZEREMIAH 49 - Mara Bible RV (BSI)

Amawna mo pachiana

¹ Amawna mo kyh liata, Abeipa ta hetana heta a tah: “Izarei ta sawchapawzy hnei vei ma? Ryutotuhpa hnei vei ma? Khazia Mikô ta Kâdâ cha pho ta, Ano phopi cha Kâdâ khihpizy liata a pahrâsa tly?

² Chavâta moh teh u, Amawna mo yna Râbâ khihpi a dyuh awpa ta, Apahôpahâna pyu thei awpa ta Ri tao nawpa nohzy a vaw tlô hai,” Abeipa ta a tah. “Râbâ khihpi cha, Raona apathluna khihpi châ aw ta; A khichapeihzy chhao, Mei ta raopa a châ aw; Ano a photuhpazy cha, Izarei ta a pho aw ei,” Abeipa ta a tah.

³ “Hy Hesbaw, sâh teh, Ai khihpi paraopa ta a y ha hih! Râbâ sawchanôzy saih u, cha teh u! Mikô cha seichâna lâ a sie aw, A theihthaipazy nata a beimachâzy chhaota. Chavâta latho poh a bupa ta chaphôh tu u la, Thokhyzy chhôh liata a râhreih teh u!

⁴ Hy sawchanô ngâchhih leipa y, Na saikao râh phapazy a palaikheipa ta, Na ryusôhpazy a ngâchhâ chi ta ma, ‘Ahy nâ siehnao ngâh aw?’ na tah?

⁵ Pachâ teh, na chheipâh chyhsa zydua tawhta Na chô liata chichhihna ei vaw patlôsa aw; Chyhsa to su to lâta to papuapa châ aw ei chi ta, Arâpazy a pakhy awpa y aw veih ei,” Pheisaihzy Abeipa Zehôvâh ta a tah.

⁶ “Cha khai tawhta deikua cha, Amawna mo cha vânoh ei patosa heih aw ei,” Abeipa ta a tah.

Edômâ mo pachiana

⁷ “Edômâ kyh liata, Pheisaihzy Abeipa ta hetana heta a tah: Temâ liata sona y khao vei ma? Asopazy ryhraona a chhâ ha ma? Ama sona a lei khai ha ma?

⁸ Hy Dedâ râhsawzy saih u, A râ u la, lâpi tleipa ta, Khaohtlô a thupa liata a nyu teh u! Esaw ei hriena daihti liata, Esaw vâchhiena a chô liata ei vaw patlôsa aw.

⁹ Kre thei lyutuhpazy nâ lâ a vy ei sala, Kâmo thoh awpa kre thei siesai aw veih ei ma? Zâ ta parutuhpazy a vy ei sala, Ama khopa rakha deita hrao aw veih ei ma?

¹⁰ Esaw deikua cha thluahruapa ta paysa na ta, Arulâta a yna suzy ei hmô haw; A nyu thei khao vei. A pathlazy pahleipadiapa châ ei ta, A unawhzy nata a vaihzy pahleipadiapa ama châ; Esaw cha y khao vei.

¹¹ Paw leipa na sawzy cha siesai mah y, Kei ta ei hrôbieh aw ei; Na nôhmeizy chhao, Kei liata a pahnieh mawh ei sy.”

¹² Abeipa ta hetana heta a tah: “Nyu a doh awpa a châ leipazy ta ama do thlyu awpa a byuh khiahta cha, nâ chhochhi cha hrie leipa ta na pua aw ma? Hrie leipa ta pua cheita aw va chi, na do thlyu awpa a châ.

¹³ Bôzrâ cha su chichhihpa, pasipasawhpa, roryhrapa nata chhiesapa khihpi châ aw ta, a khichapeihzy chhao roryhrapa ta ama y zôzaw aw tahpa ta, keima sasyh ta ei moh a reipa ta bie ei taih haw,” Abeipa ta a tah.

¹⁴ Abeipa tawhta bietapa thei na ta, Phopizy hnohta lyuhchâpa tuapa a châ: “A hmaohpakhypa ta, Edômâ siehnao u la, A dyuh awpa ta thyu teh u!

¹⁵ Pachâ teh, phopizy hry liata cha panawh aw na ta, Chyhsapazy hry liata mohnaochhihpa ta ei cha tao aw.

¹⁶ Nâ lôkhaohzy liata pahrâ chi ta, Tlâh laki liata a tlaih tyhpa y, Chichhihna na taopa ta cha dôvei ta, Na palôh apalaina ta a cha dôvei haw. Pahmôhpi bu tlu ta a sâhpa ta na bu tu hra la, Cha tawhna chata ei châ dao pathlah aw,” Abeipa ta a tah.

¹⁷ “Edômâ cha roryhrapa ta y aw ta, a chapiapa maihta rarôh y tah aw ei ta, chhiena â tyhpa zydua vâta ama hmao ama tô chie aw.

¹⁸ Sawdawmâ nata Kawmawrâ nata a chheipâh liata khihpizy paraopa ta a ypa hawhna khata, cha liata ahy hmah pahrâ khao leipa aw ei ta, ahy hmahta cha lâ a paih khao aw veih ei,” Abeipa ta a tah.

¹⁹ “Pachâ teh u, chakeibarôhneipa ta sibiepa su phapa liata mietakuzy Zawdâh râhmâhpa tawhta eikhapi ta a vaw puahnaopa hawhta, Edômâ chhao a râh tawhta eikhapi ta parâsa aw na ta, ei khopa maih a chô liata biehneituhpa ta ei rao aw. Kei hawhpa ahy y tly? Ahy ma a hmiakô liata a luah awpa ta nâ aw thei tly? Kheihawhpa mietaku vaituhpa ma ei hmiakô liata a duah thei aw tly?

²⁰ Chavâta Edômâ chô liata Abeipa ta tao â chhuahpa he nathlie u la, Temâ mo chô liata tao â chhuahpazy he nathlie teh u: Sahroh zaw tawzy taihta a daophipa châ aw ei ta, ama hmo a tyhpa cha ama tlaihna sibiepa suzy taihta rarôh y ama tah aw.

²¹ Ama paona pyu ta alei a chalyu aw ta, ama chapa pyu cha Tilaipi Saihpa lia taihta theipa a châ aw.

²² Moh teh u, chariahpa cha pahmôhpi hawhta a pasâhpa ta, Bôzrâ chô liata a mathlaw pakaipa ta za tla thlu aw ta, cha noh liata Edômâ pasaiphazy palôh cha, chanô sawzeihpa palôh hawhta a châ aw.”

Dâmaskâ pachiana

²³ He he Dâmaskâ kyh a châ: “Hâmathi nata Apâ cha, Thâtih chhiepa ama theipa vâta, Nozapa ta ama y. Chipa ta zao khai ei ta, Tilaipi chalihsa thei leipa hawhta, Tymâpa ta ama y.

²⁴ Dâmaskâ cha thazeipa ta y ta, A râ awpa ta a palie ta, Thlazohna ta a patu haw; Chanô sawzeihpa hawhta, Rietheina nata pachârôhna ta a patu haw.

²⁵ Kheihta ma khihpi moh pathâhpa cha, Siesaipa châ leipa ta; Ei lyna khihpi cha, Siesaipa a châ vei tly?

²⁶ Chavâta a satliazy cha, Tlyliahzy liata pao aw ei ta; A pheisaih zydua chhao, Cha noh ta pahleipadiapa ama châ aw,” Pheisaihzy Abeipa ta a tah.

²⁷ “Dâmaskâ thokhy liata mei patih aw na ta, Benhadâ abei ozy a kâ khai aw,” Pheisaihzy Abeipa ta a tah.

Kedâ nata Hâzaw pachiana

²⁸ He he Babylaw bei Nebukaneza ta a pahnie hapa, Kedâ nata Hâzaw khinarâhzy kyh a châ: Abeipa ta hetana heta a tah: “Thyu u la, Kedâ siehnao u la, Nochhi sawzy kei pahleipadia teh u!

²⁹ Ama poh ozy nata ama sahrohzy lapa châ aw ta, Ama pohraipazy nata ama hmobaoh zydua lapa a châ aw; Ama râraoseihpazy siekheipa châ aw ta, Chyhsazy ta, ‘Su to liata chichhihpa a y,’ Tahpa ta ama awsao aw.

³⁰ Hy Hâzaw chyhsazy saih u, A râ u la, lâhlapi taihta a râpai u la, Khaohtlô a thupazy liata pahrâ teh u! Babylaw bei Nebukaneza ta Châ dyuh awpa ei a chhuah ta, Nama chô liata a tao awpazy A pachhuahpanoh haw,” Abeipa ta a tah.

³¹ “Thyu u la, chhôhmohpa ta a ypa phopi cha a kei dyuh u la, Thlalôhpa ta a ypa phopi cha a kei dyuh teh u; Thokhy chhikaozy nata a hraina lâzy hnei leipa ta, Âmo dei ta khih a sapa phopi cha siehnao teh u,” Abeipa ta a tah.

³² “Ama râraoseihpazy cha, Hraona sôh châ aw ei ta; Ama viahchao zawzy chhao, Hraona sôh ama châ aw. Ama baih hmi a ngyupa phopi cha, Thlih pathlina su to lâta papai aw ei na ta, Kao to tawhta ama chô liata Chhiena ei vaw patlôsa aw,” Abeipa ta a tah.

³³ “Hâzaw cha changiezy tlaihna su châ aw ta, Chhâzaw ta roryhrapa ta a y aw; Cha liata chyhsa pahrâ khao leipa aw ei ta, Cha lâ a paihpa y khao aw veih ei,” Abeipa ta a tah.

Elâmi mo pachiana

³⁴ He he Zudâh bei Zedekia ryureina â thaona liata, Elâmi kyh liata Abeipa bie hrohsopa Zeremiah hnohta a vaw tlôpa a châ.

³⁵ Pheisaihzy Abeipa ta hetana heta a tah: “Moh teh u, Elâmi libaw, ama thatlôna chaipa cha ei parao aw.

³⁶ Avâ kaokih miapalih tawhta thlih miapalih Elâmi chô liata vaw pathlisa aw na ta, thlih pathlina kaokih to lâta ei papai aw ei. Elâmi râh tawhta to papua chyhsazy tlô leina râh rai y aw vei.

³⁷ Ama chariahpazy nata ama hrona la a chhuahpazy hmiakô liata, Elâmi mo cha chipa ta paysa aw ei na ta, ei hiehâhna ru ngaitapa lei thlupa ta, ama chô liata chhiena ei patlôsa aw,” Abeipa ta a tah. “Ei pahleipadia khai hlâlei ei cha, zaozi ta ei chadaisa lymâ aw ei.

³⁸ Elâmi râh liata ei beidyuchhai patyuh aw na ta, ama beizy nata ama beimachâzy ei pahleipadia khai aw ei,” Abeipa ta a tah.

³⁹ “Noh hnôhlâzy liata deikua cha, Elâmi cha vânoh ei patosa heih aw,” Abeipa ta a tah.