ZEREMIAH 48 - Mara Bible RV (BSI)

Môabâ pachiana

¹ Môabâ kyh liata, Pheisaihzy Abeipa, Izarei Khazohpa ta hetana heta a tah: “Nebô cha roryhrapa ta y ta, A hu a po kaw dia! Kiriathai chhao lapa châ ta, Maophyuhpa ta a y; Thokhy paraopa châ ta, Maophyuhpa ta a y.

² Môabâ moh pathâhna a lei haw. Parao awpa ta Hesbaw liata pachia ei ta, ‘A vy teh u, Phopi a châna tawhta Chhawh pathlah ha ei suh u!’ ama tah. Hy Mâdame khihpi y, Nâ chhao pahleipadiapa châ aw chi ta, Zaozi ta a cha chadai aw.

³ Hôrônai tawhta awhpa ao vaw pua ta, Hraona nata raona rarôh ypa pyu a vaw pua!

⁴ “Môabâ cha pahleipadiapa châ ta, A sawzy aoh tlili ta ama cha.

⁵ Chana chôta Luhi chakhâ kiah ei ta, Raona vâta nôpona ao chhaota Hôrônai chhutla ama chô.

⁶ A râ u la, nama hrona pabohsa u la, Râhchawhpa liata thobuh hawhta y teh u!

⁷ “Na hmotaopazy nata na ryusôhpazy na ngâpa vâta, Nâ chhao lapa châ aw chi ta, Khemô cha seichâna lâ a sie aw, A theihthaipazy nata a beimachâzy chhaota.

⁸ Khihpi to liata paraotuhpa vaw tlô aw ta, Khihpi miakha hmahta a boh aw vei; Abeipa ta a rei hapa hawhta, Saikao by leidia aw ta, Bypi chhao paraopa a châ aw.

⁹ Môabâ cha â zaw ha awpa vâta, Mathlaw pie teh u. A khihpizy roryhrapa ta y aw ta, A chhôh liata a pahrâpa y khao aw veih ei.

¹⁰ “Diathlâpa ta Abeipa rai a hriapa cha chhiesapa ta y sala, thisaih palo awpa ta a zaozi a hmâh khoh leipa chhao chhiesapa ta y mawh sy.

¹¹ “A thyutlia no tawhta Môabâ cha thadâhpa ta y ta, A beih chaopahrâ liata chhôhmohpa ta a y. Beih hropa lâ patly khaipa châ beih leipa ta, Seichâna lâ sie beih vei. Chavâta a pahâh tyhpa hawhta pahâh lymâ ta, A roh a nano beih vei.

¹² “Châhrasala pachâ teh u, paruatuhpazy ano lâ vaw tuah aw ei na ta, âmo ta parua aw ei ta, a beihzy paruapa ta, a râchâzy ama pakei khai nawpa nohzy a vaw tlô hai, Abeipa ta a tah.

¹³ Chatanachata Izarei pathlazy ta ama ngâpa Bethel ama zakheipa hawhta, Môabâ chhao ta Khemô cha a zakhei aw.

¹⁴ “Kheihta ma, ‘Riahphapa châ pi ta, Adyuhna pasaiphazy eima châ,’ Nama tah thei tly?

¹⁵ Môabâ cha paraopa a châ haw; Pahleipadiatuhpazy ta a khihpizy khyhnao ei ta, A satlia pha chaipazy thiena su lâ ama zu haw,” Abeipa, a moh Pheisaihzy Abeipa ta a tah.

¹⁶ Môabâ vâchhie nawpa noh a hnia ha ta, A pasatao nawpa daihti thlai a vaw tlô aw.

¹⁷ A chheipâh liata a ypazy ta taokhei u la, A moh a pahnopa zydua ta taokhei teh u; “Kheihta ma chôchahrei thatlôpa tlie thei ta, Sômasi rônahpa a tlie thei tly,” tah teh u.

¹⁸ “Nâ, Dibô sawchanô, Na rônahna tawhta za chô la, Chhaohlei chawhkaraipa liata a tyuh teh. Môabâ hraotuhpa ta châ khyhnao ta, Na thokhyzy a parao haw.

¹⁹ Hy Arôerâ khihsaw y, Lâpi kiah liata a duahpa ta moh la, Chapaw arâpa nata chanô abohpa zy hnohta, ‘Khâpa hmo ma a tlô tly?’ Tahpa ta hiahri teh.

²⁰ Môabâ cha parao hapa châ ta, Maophyuhpa ta a y; Chavâta sâh u la, cha teh u! Anaw liata phuah u la, Môabâ cha a ry haw tah teh u.

²¹ “Tlâh bypa râh chô liata pachiana a vaw tlô haw. Môabâ râh Hôlô, Zazâh, Mepha,

²² Dibô, Nebô, Bedibalâthai,

²³ Kiriathai, Bekamu, Bemeô,

²⁴ Keriô nata Bôzrâ khihpizy chô liata pachiana vaw tlô ha ta, Môabâ râh khihpi hropa lâhla lâhnia liata a ypa khihpi zydua chô liata chhao pachiana a vaw tlô haw.

²⁵ “Môabâ ki cha tai pathlahpa châ ta, A bâh thliepa a châ haw,” Abeipa ta a tah.

²⁶ “Môabâ ta Abeipa â palai thlu; Chavâta parisa u la, A pali liata a hlao sala, Pahneisaopa ta y mawh sy.

²⁷ Izarei kha na pahneisao tyh vei ma? Ano kyh na reina maihta na luh chahuah awpa ta, Parutuhpazy hry liata hmôpa a châ beih ma?

²⁸ “Hy Môabâ râhsawzy saih u, Khihpizy puasaipa ta, Lôkâhpa liata pahrâ u la, Khaohtlô pâhchhô liata a bu a tuhpa Vachhuh hawhta y teh u.

²⁹ Môabâ apalaina thâtih eima thei, Â vaw khotlâh chaimâh. Â pasâhsazie nata â palaizie thei pi ta, Â khotlâhzie nata a palôh laizie eima thei.

³⁰ A sâlâzie pahno na ta, Hraoleipa a palaikhei ta, A hmotaopazy a do vei,” Abeipa ta a tah.

³¹ Chavâta Môabâ châta sâh na ta, Môabâ mo zydua ei chakhei ei; Kihere mo chhao mâchhie ei sapa ei.

³² Hy Sibmâ kre zôh y, Zaze khihpi ei chakheipa hlâta ei cha chakhei via na! Na chiahzy tilaipi chô liata a zawh ta, Zaze tilaipi taihta â zawh; Na nopi theilâpazy nata na kre theizy cha, Hraotuhpa ta a tla thlu khai haw.

³³ Thaphana nata alyna zy Lyu phapa tawhta pai ha ta, Môabâ râh tawhta a pai haw. Kre saohna khaoh liata kresawhti pachhâsa ha na ta, Ahy hmahta thapha ta awhpa ta Kre tly khao aw veih ei; Awhpa pyu chhao, Thaphana pyu châ khao aw vei.

³⁴ “Hesbaw nata Elialeh liata awh ei ta, Zahâ taihta ama ao ama papua; Zawâ tawhta awh ei ta, Hôrônai tai nata Ekalâselisia taihta ama ao ama papua. Niri tizy chhao roryhrapa ta a y haw.

³⁵ Su sâhpazy liata atheihna hlâ ta, A khazoh lâta ropahâhpa a raopa chhao, Môabâ râh liata ei pachhâsa ha aw,” Abeipa ta a tah.

³⁶ “Chavâta ramo pyu hawhta ei palôh Môabâ châta a hrô ta, Ramo pyu hawhta ei palôh Kihere mo châta â hrô. Chavâta hneirôna ama hmôpazy a lei khai aw.

³⁷ Luh to papôlôpa châ ta, Kâhhmi to ngyupa a châ. Ku zydua âpa châ ta, Chai liata latho poh a saipa a châ.

³⁸ Chyhsazy kho khao leipa beih keipa hawhta, Môabâ cha ei pakeichheih hapa vâta, Môabâ vâphuh zydua chaphôhtuna ta bie ta, Ama tlyliah zydua chaphôhtuna ta a bie,” Abeipa ta a tah.

³⁹ “Môabâ cha a keichheih khai ha dia! Ama chana ao rimâ cha! Môabâ cha noza tupa ta ma, Chyhsazy hnôh a chhy ha bâ! Cha hawhna chata Môabâ cha, A chheipâh râh zydua châta, Pahnei parâsaopa ta y ta, Pachisana châta hmâpa lâta a pua haw.”

⁴⁰ Abeipa ta hetana heta a tah: “Moh teh u, Môabâ chariahpa cha, Pahmôh hawhta a vaw zaw ta; A chô liata a mathlaw a pakai huh.

⁴¹ Keriô khihpi cha pahniepa châ aw ta, A thokhyzy lapa a châ aw. Cha noh liata, Môabâ pasaiphazy palôh cha, Chanô sawzeihpa palôh hawhta a châ aw.

⁴² Môabâ cha Abeipa â palai thlupa vâta, Pahleipadiapa châ aw ta, Phopi tloh khao aw vei.

⁴³ Hy Môabâ chyhsa y, Na hmiakô liata chichhihna y ta, Khaohtlô nata khoheih a y,” Abeipa ta a tah.

⁴⁴ “Chichhihna tawhta a râpa cha, Khaohtlô liata tla aw ta; Khaohtlô tawhta a puapa cha, Khoheih liata â ao aw. Môabâ mo hriena kô vaw patlôsa aw na ta, Cha hmozy cha ama chô liata a tlô aw,” Abeipa ta a tah.

⁴⁵ “Hesbaw tawhta mei vaw pua ta, Sihaw liah tawhta meipaleih a vaw pua; Môabâ baih hmi kâ khai ta, Kalihpi a topa sahlao laki sâzy a kâ khai haw; Chavâta arâpazy cha ama thachhâ ta, Hesbaw nohpahli liata amâ duah.

⁴⁶ Hy Môabâ, na hu a po kaw dia! Khemô phopi ama lei haw; Na sawchapawzy cha sei ta a chhipa châ ei ta, Na sawchanôzy seichâna lâ a chhipa ama châ.

⁴⁷ “Châhrasala noh hnôhlâzy liata, Môabâ cha vânoh ei patosa heih aw,” Abeipa ta a tah. Kha rakha kha Môabâ pachiana kyh cha a châ.