ZEREMIAH 47 - Mara Bible RV (BSI)

Philistinâ mo pachiana

¹ He he Phiraoh ta Kâza a pahnie hlâta, Philistinâ mo kyh liata hrohsopa Zere­miah hnohta Abeipa bie a vaw tlôpa a châ.

² “Abeipa ta hetana heta a tah: Moh teh u, maw lâ tawhta ti vaw lai ta, A kao bie aw ta a khô aw; Râh nata a chhôh liata a ypa zydua vao khai aw ta, Khihpi nata a chhôh liata a pahrâpazy a vao khai aw; Chyhsazy awhsâh aw ei ta, Râhsaw to ama cha aw.

³ A arâ tôhpazy chakie pyuzy vâta, A talailihzy a chathopa pyuzy vâta, Talailih tiakizy a pahiehna pyuzy vâta, Pawzy cha ama ku thazei khai ha ta, Ama sawzy lâ chhao a heih khao veih ei.

⁴ Philistinâ mo zydua pahleipadiana noh vaw tlô hai ta, Baotuhpa a y tlakaihpazy chhao, Tyre nata Sidaw tawhta chhawh pathlahna noh a vaw tlô haipa vâta, Cha hawhpa hmo cha a vaw ypa a châ. Abeipa ta Philistinâ mo pahleipadia hai ta, Tilaipi kiah Kâftaw râh liata laibâhpazy chhao, A pahleipadia hai ei.

⁵ Kâza luh pôlô ha ta, Askelaw a leidia haw. Hy bypi liata laibâhpazy saih u, Khati taih ma nâmosasyh ta hmah namâ paphao chy aw tly?

⁶ Hy Abeipa zaozi! Khati ta ma nâ chalih aw tly? Na paih liata â khô la, A pahâ la a chalih bâ mah y!

⁷ Abeipa ta bie a cha pie ha khiahta cha, Kheihta ma nâ chalih thei aw? Askelaw nata tilaipi kiah râh a dyuh awpa ta, Abeipa ta a cha rao haw.”