ZEREMIAH 44 - Mara Bible RV (BSI)

Nothlahpa achhyna pachiana

¹ He he Izi râh Mikadô, Tâpahe, Mephi nata Pâtharô khihpizy liata a pahrâpa Zu chyhsa zydua kyh liata Zeremiah hnohta bie a vaw tlôpa a châ.

² “Pheisaihzy Abeipa, Izarei Khazohpa ta hetana heta a tah: Zerusale nata Zudâh khihpi zydua chô liata chhiena ei patlôsapa zydua nama hmô. Moh tua u, tanoh chhao roryhrapa ta y ei ta, khihpizy liata a pahrâpa ama y khao vei hih.

³ Âmo chhao, nâmo chhao, châ pathlatuhpazy chhao ta nama pahno beih leipa khazohzy lâta ropahâhpazy rao ei ta, ama chakaopa vâta, chhiena cha ama chô liata ei patlôsapa a châ.

⁴ Chatahrasala nâ chakaotuhpa hrohsopazy nâmo lâ khâ vaw tuah ei na ta, ‘He hmo pasichhihpa ei hao ngaitapa he tao khao khuh vy!’ tahpa ta ama cha chho chanei ngâ thlâh ha.

⁵ Châhrasala nathlie leipa ei ta, ama nah pachôh hra leipa ei ta, ama moleina ro khoh veih ei. Khazoh hropazy lâta ropahâhpa ama raopa chhao a chalih khoh veih ei.

⁶ Chavâta ei pathiiana nata ei hiehâhna cha, Zudâh khihpizy liata nata Zerusale khiliahzy liata lei thlupa châ ta, ia ha ta, tanoh duahmo hawhna heta, khihpi rypa nata roryhrapazy lâta amâ lie hapa a châ.

⁷ “Chavâta tahmâ Zehôvâh Khazohpa Atotaotheipa, Izarei Khazohpa ta hetana heta a tah: Khazia cha hawhpa moleina rarôh y ngaitapa cha nâmosasyh ta namâ tao thlu? Khazia chanô nata chapaw, hawsaih nata hawti zy Zudâh tawhta chhawh pathlah khaipa ta ypa ta, laibâhpazy hnei khao leipa ta nama y aw tly?

⁸ Khazia pahrâ awpa ta namâ vyna Izi râh liana heta khazoh hropazy lâta ropahâhpazy raopa ta, nâmo ku ta nama taopa hmozy ta ei hie eina pahâh ei chi tly? Khazia nâmosasyh ta a chhawh pathlahpa ta, khizaw phopi zydua hry liata chhiesapa nata pasipasawhpa ta nama y aw?

⁹ Châ pathlatuhpazy moleina, Zudâh beizy nata ama lapinôzy moleina, nâmo moleina nata nama lapinôzy ta Zudâh râh nata Zerusale khiliahzy liata moleina hmo ama taopa zy kha nama my khai ha ma?

¹⁰ Tanoh taihta a panawh to leipa ei ta, nâmo nata châ pathlatuhpazy hmiakô liata ei sopa ei ryhpa nata ei bieraopazy a chhih khoh leipa ei ta, chi hra veih ei.

¹¹ “Chavâta Pheisaihzy Abeipa, Izarei Khazohpa ta hetana heta a tah: Pachâ teh u, cha parao awpa ta châ heihnao aw ei na ta, Zudâh pathla zydua ei chhawh pathlah khai ha aw ei.

¹² Izi râh lâ hmiachhypa ta, cha liata pahrâ awpa ta a siepa Zudâh laibâhpazy cha patu aw ei na ta, ei pamua ha aw ei. Izi râ liata pao aw ei ta, zaozi nata chakâhna zy pamuapa ama châ aw. A chyh chaipa tawhta a lai chaipa taihta zaozi nata chakâh­na ta thi aw ei ta, chyhu sa thlupa, pachhiparypa, chhiesapa nata pasipasawhpa ama châ aw.

¹³ Zerusale ei hriepa hawhna khata, Izi râh liata a pahrâpazy cha, zaozi nata chakâhna nata potlana ta ei hrie aw ei.

¹⁴ Cha hriena cha, Izi râh liata pahrâ awpa ta a vaw siepa Zudâh laibâhpa ahy hmahta khôkhâh leipa aw ei ta, hriena tawhta a boh hra leipa aw ei ta, kua heih ta pahrâ heih awpa ama kho kawna Zudâh râh lâ chhao, ahy hmahta kua heih thei aw veih ei. Arulâta a râpazy tah leipa ta cha, ahy hmahta kua heih khao aw veih ei.”

¹⁵ Ama lapinôzy ta khazoh hropazy lâ ropahâhpa ama raopa a pahnopa chapaw zydua nata cha liata a duahpa chanô zydua nata Izi râh Pâtharô liata a pahrâpa chyhsa zydua, zawpi hluh ngaitapazy ta Zeremiah cha a chhy ei ta, a hnohta,

¹⁶ “Eima hnohta Abeipa moh ta bie na reipazy kha, cha nathlie aw ma pi.

¹⁷ Keimo nata miah pathlatuhpazy nata eima beizy nata eima beimachâzy heta, Zudâh khihpizy nata Zerusale khiliahzy liata eima tao tyhpa hawhna khata, avâ beinô lâ ropahâhpazy raopa ta, dopa hlânazy ano lâ patlai aw pi ta, bie eimâ taihpa zydua eima tao aw. Kha daihti liana kha niedo hluhpi hneipa ta, thlaochhipa ta y pi ta, chhiena a tyh ma pi.

¹⁸ Avâ beinô lâ ropahâhpazy rao khao leipa pi ta, ano lâ dopa hlânazy eima patlai khao vei rakha tawhna khata, ato tlao a phahla pi ta, zaozi nata chakâhna zy ta miah a pahleipadia hapa a châ,” tah ei ta.

¹⁹ Chatawhcha chanôzy ta, “Avâ beinô lâ ropahâhpa eima rao nota nata ano lâ dopa hlânazy eima patlai no kha, eima vahpazy paryhsa leipa ta ma ano nothlahpa pachohsana viahchhâzy tao pi ta, ano lâ dopa hlânazy eima patlai tly?” tah ei ta.

²⁰ Chatawhcha Zeremiah ta ano bie a chhytuhpa zawpi, chapaw nata chanô zydua hnohta,

²¹ “Nâmo nata châ pathlatuhpazy, nama beizy nata nama beimachâzy nata râhsawzy ta Zudâh khihpizy nata Zerusale khiliahzy liata ropahâhpa nama raopazy kha, Abeipa ta a thei thlâh ha ta, a palôh liata ngia thlâh ha vei ma?

²² Hmo moleipa nama taopazy nata hmo pasichhihpa nama taopazy Abeipa ta chhyh thei khao vei. Chavâta nama râh cha tanoh duahmo hawhna heta, râh roryhrapa, râh rypa nata chhiesapa râh châ ha ta, a chhôh liata a pahrâpa chhao ama y khao vei hih.

²³ Nothlahpa khazohzy lâ ropahâhpa raopa ta, Abeipa chô liata molei ei chi ta, Abeipa bie zyh leipa ei chi ta, a ryhpa nata a bieraopa nata a biepiepa zy namâ chhih leipa vâta, tanoh ta nama duahmo hawhna heta, he chhiena he nama chô liata a vaw tlô hapa a châ,” tah ta.

²⁴ Zeremiah ta zawpi zydua nata chanô zydua hnohta, “Izi râh liata a ypa Zudâh mo zydua saih u, Abeipa bie he thei teh u.

²⁵ Pheisaihzy Abeipa, Izarei Khazohpa ta hetana heta a tah: Nâmo nata nama lapinôzy ta, ‘Avâ beinô lâ ropahâhpazy raopa ta, ano lâ dopa hlânazy patlai awpa ta, avâ beinô liata eima bietaizy cha eima tao tlai aw,’ tahpa ta nama pakah ta reih ei chi ta, nama ku ta pi nama patlohsa haw. Nama bietaizy cha pa-i u la, nama bietaizy cha tao lâlao teh u.

²⁶ “Chavâta nâmo Izi râh liata a pahrâpa Zudâh mo zydua saih u, Abeipa bie he thei teh u: Pachâ teh u, ei moh rônahpa ta bie ei taih haw. Izi râh liata a ypa Zudâh chyhsa ahy pakah ta hmahta, ‘Ei Abeipa Zehôvâh hrona reipa ta ei reih,’ tahpa ta ei moh reih beih khao aw veih ei, Abeipa ta a tah.

²⁷ Phana châta châ leipa ta, chhiena châta ei mokhâh thlâh ha ei. Izi râh liata a ypa Zudâh chyhsa zydua cha, ama chhâ khaina taihta zaozi nata chakâhna ta pamuapa ama châ aw.

²⁸ Zaozi a khôkhâhpa chyhsa chyhta cha, Izi râh tawhta Zudâh râh lâ a lie aw ei ta, chatanachata Izi râh liata pahrâ awpa ta a siepa Zudâh laibâhpazy ta ahy bie ma a duah aw, keima bie ma, âmo bie ma tahpa ama pahno aw.

²⁹ “He he nama châta ngiana a châ aw. Ei biezy cha nâmo pasasa awpa ta â duah tlai aw tahpa nama pahno thei nawpa ta, he su liata ei cha hrie aw ei, Abeipa ta a tah.

³⁰ Abeipa ta hetana heta a tah: Zudâh bei Zedekia cha, a hrona la a chhuahpa a chariahpa Babylaw bei Nebukaneza ku liata ei hlâpa hawhna khata, Izi bei Phiraoh Hôpharâ chhao a hrona la a chhuahpa a chariahpazy ku liata ei hlâ aw,” tah ta.