ZEREMIAH 43 - Mara Bible RV (BSI)

Zeremiah Izi râh lâ a chhi raruahpa a châ

¹ Zudâh laibâhpazy hnohta bie reih awpa ta, Abeipa ama Khazohpa ta Zeremiah cha âmo lâ tuah ta. Abeipa ama Khazohpa bie zydua cha Zeremiah ta zawpi zydua hnohta a reih khai nahta,

² Hôsai sawchapawpa Azariah nata Kariah sawchapaw­pa Zôhanâ nata chyhsa a khotlâh kawpa zydua ta Zeremiah hnohta, “Haipa bie na reipa a châ. Abeipa eima Khazohpa ta, ‘Izi râh liata pahrâ awpa ta nama sie awpa châ vei,’ tahpa bie reih awpa ta cha vaw tuah vei.

³ Kaldia mo ta miah ama thie thei nawpa nata Babylaw lâ sei ta miah amâ chhi thei nawpa ta, ama ku liata miah hlâ awpa ta, Neriah sawchapawpa Bâruka ta nâma cha hmâpa ta miah a teipa tlao a châ,” tah ei ta.

⁴ Chatanachata Zudâh râh liata pahrâ lymâ awpa ta Abeipa bie a vaw tlôpa cha, Kariah sawchapawpa Zôhanâ nata pheisaih hyutuhpa zydua nata zawpi zydua ta zyh khoh leipa ei ta.

⁵ Kariah sawchapawpa Zôhanâ nata phei­saih hyutuhpa zydua ta, Zudâh râh liata pahrâ awpa ta to papuapa ta ama yna râh to tawhta a vaw kuapa Zudâh laibâhpa zydua cha,

⁶ chapawzy, chanôzy, hawtizy, abei sawchanôzy nata pheisaih hyutuhpa Nebuzarâdâ ta Sâphâ sawchapawpa Ahikâ sawcha­pawpa Kedaliah nata a hnohta a siesaipa zydua chhaota Izi râh lâ amâ chhi khai haw. Hrohsopa Zeremiah nata Neriah sawchapawpa Bâruka chhao amâ chhi ha hra.

⁷ Izi râh lâ cha Abeipa bie zyh leipa ta sie ei ta. Tâpahe khih kei tlô ei ta.

⁸ Tâpahe liata ama y nota, Zeremiah hnohta Abeipa bie vaw tlô ta:

⁹ “Alô laipazy la la, Zudâh chyhsazy mohmô lia tlai ta, leiraopa ta paraihpa, Tâpahe liata Phiraoh abei o lâ angiana lâpi liata kei pabu mah y.

¹⁰ Chatawhcha ama hnohta hetana heta na chho aw ei: ‘Pheisaihzy Abeipa, Izarei Khazohpa ta hetana heta a tah: Pachâ teh u, nâ chakaotuhpa Babylaw bei Nebukaneza a vaw chhi aw na ta, alô ei pabupazy chô liana heta a beidyuchhai patyuh aw na ta, ano ta a chô liata abei poh o a parai aw.

¹¹ Nebukaneza cha a vaw liepa ta Izi a dyuh aw ta, potlana ta thi awpa ta raopazy cha potlana lâ hlâ aw ta, seichâna lâ sie awpa ta raopazy seichâna lâ hlâ aw ta, zaozi ta thi awpa ta raopazy cha zaozi lâ a hlâ aw ei.

¹² Izi khazohzy o liata mei patih aw na ta, khazoh ozy cha Nebukaneza ta mei ta rao aw ta, khazoh nothlahpazy a siekhei ha aw ei. Mietaku vaituhpa ta a chyhsa liata lôvâpazy a pathaipa hawhta, Izi râh cha pathai aw ta, cha su tawhta thlalôhpa ta a pua aw.

¹³ Izi râh liata Heliôpôli panana tôhzy thlie aw ta, Izi khazohzy achhyna ozy chhao mei ta a rao khai ha aw,’” tah ta.