ZEREMIAH 42 - Mara Bible RV (BSI)

Izi râh lâ zu lei awpa ta zikyurâna

¹ Chatawhcha pheisaih hyutuhpa zydua, Kariah sawchapawpa Zôhanâ, Hôsai sawchapawpa Zezaniah nata zawpi zydua cha, a chyh chaipa tawhta a lai chaipa taihta a vaw hnia ei ta,

² hrohsopa Zeremiah hnohta, “Eima châ haw na, eima hiana he na hmiakô liata a pyhpa châ sala, he laibâhpa zydua châna heta, Abeipa na Khazohpa lâ thlah miah chhâpa mah y. Na mo ta miah na hmôpa hawhna heta, chyhsa hluhpi hry liata a chyhta dei pahlôhpa eima châ hih.

³ Chavâta Abeipa na Khazohpa ta eima si nawpa lâpi nata eima tao awpa hmozy miah a pahmô thei nawpa ta, thlah miah chhâpa mah y,” tah ei ta.

⁴ Hrohsopa Zeremiah ta ama hnohta, “Nama biereipa cha ei thei na. Moh teh u, nama bie hawhta Abeipa nama Khazohpa lâ cha thlahchhâ aw na ta, Abeipa ta a châ chhypa hawh ei ta ei cha chho aw ei. Khâpa hmah cha phih aw veih ei na,” tah ta.

⁵ Âmo ta Zeremiah hnohta, “Abeipa na Khazohpa ta miah chho awpa ta a cha tuapa bie zydua hawhta eima tao leipa khiahta cha, Abeipa cha miah padei awpa ta bie a pahnokheituhpa dopa nata ngâchhihpa châ mawh sy.

⁶ A phapa a châpa chhao ta, a chhiepa a châpa chhao ta, eima cha tuana Abeipa eima Khazohpa bie cha eima zyh aw. Abeipa eima Khazohpa bie eima zyhpa cha eima châta a pha aw,” tah ei ta.

⁷ Noh hrawh a châ tawhta Zeremiah hnohta Abeipa bie vaw tlô ta.

⁸ Kariah sawchapawpa Zôhanâ nata a hnohta a ypa pheisaih hyutuhpa zydua nata zawpi zydua, a chyh chaipa tawhta a lai chaipa taihta awpakhy ta,

⁹ ama hnohta, “Izarei Khazohpa Abeipa, a hmiakô liata nama hiana tlôkhei awpa ta eina tuana ei chi khata hetana heta a tah:

¹⁰ He râh liata nama y thlâh khiahta cha, cha padua aw ei na ta, cha phie aw veih ei na. Cha loh aw ei na ta, cha phia aw veih ei na. Nama chô liata chhiena ei patlôsapa kha ei ngiapachhi haw.

¹¹ Babylaw bei nama chi kawpa he chi khuh vy. A ku tawhta cha pachha awpa nata cha papua awpa ei ta, ei cha ypâ thlâh ha ei mâh tâh. Chavâta ano cha chi khuh vy, Abeipa ta a tah.

¹² Babylaw bei ta cha ngiachhie ei sala, nama râh chyu liata pahrâ lymâ awpa ta a pasai thei nawpa ta, nama chô liata ngiachhiena ei palâsa aw.

¹³ Châhrasala Abeipa nama Khazohpa bie zyh leipa ta, ‘He râh liata pahrâ aw ma pi,’ a tahpa châ ha u la,

¹⁴ ‘He râh liata pahrâ aw ma pi, adyuhna eima hmô lei nawpa râh, chiahmie pyu chhao thei leipa ta, nie awpa hnei leipa ta nodipa ta eima y lei nawpa Izi râh lâ tlao sie aw pi ta, cha liata eima pahrâ aw,’ nama tah khiahta deikua cha,

¹⁵ Hy Zudâh laibâhpazy saih u, Abeipa bie he thei teh u. Pheisaihzy Abeipa, Izarei Khazohpa ta hetana heta a tah: Izi râh lâ nama hmia paheipa ta sie raruah u la, cha liata nama pahrâ khiahta cha,

¹⁶ nama chi kawpa zaozi ta Izi râh liata cha pha aw ei ta, nama chi kawpa chakâhna ta Izi râh lâ cha zi aw ei ta, cha liata nama thi aw.

¹⁷ Izi râh liata pahrâ awpa ta, cha lâ ama hmia pahei ta, a siepa zydua cha, zaozi nata chakâhna nata potlana ta ama thi aw. Ama chô liata chhiena ei patlôsa awpa tawhna chata a hrohpa nata laibâhpa pakha hmah y aw veih ei.

¹⁸ “Pheisaihzy Abeipa, Izarei Khazohpa ta hetana heta a tah: Zerusale khihsawzy chô liata ei hiehâhna nata ei pathiiana ei lei thlu hapa hawhna ei khata, Izi râh lâ nama sie tita chhao, ei pathiiana nama chô liata ei cha lei thlu hra aw ei. Chatanachata chyhu sa thlupa, pachhiparypa, chhiesapa nata pasipasawhpa châ aw ei chi ta, he su he hmô heih khao veih ei chi.

¹⁹ Hy Zudâh laibâhpazy saih u, Abeipa ta, ‘Izi râh lâ zu khuh vy,’ a cha tah ei. Tanoh ta zikyu ei châ râpa ei he a siapa ta pahno teh u.

²⁰ Nâmo tlai ta, ‘Abeipa eima Khazohpa lâ thlah miah chhâpa la, Abeipa eima Khazohpa ta a reipa maih miah chho la, eima tao aw,’ tahpa ta Abeipa nama Khazohpa lâ na tuah ei chi ta, châhrasala dôveina nama palôh liata a ypa tlao a vaw châ.

²¹ Abeipa bie cha tanoh nama hnohta phuah na ta, châhrasala Abeipa nama Khazohpa ta nâmo chho awpa ta eina tuapa bie khâpa hmah zyh veih ei chi.

²² Chavâta tahmâ a siapa ta pahno teh u. Sie ta pahrâ awpa nama khona su liana tlai chata zaozi nata chakâhna nata potlana ta nama thi aw,” tah ta.