ZEREMIAH 40 - Mara Bible RV (BSI)

Zeremiah Zudâh râh liata siesaipa a châ

¹ Pheisaih hyutuhpa Nebuzarâdâ ta Zerusale khihsawzy nata Zudâh râhsawzy cha, bâlia ta chahryna chôta Babylaw lâ sei ta a chhi ta. Chazy hry liata Zeremiah chhao â hlao hra. Zeremiah deikua cha, Râmâ ama tlô nahta, Nebuzarâdâ ta pathlie ha ta. He he Nebuzarâdâ ta a pathlie tawhta, Zeremiah hnohta Abeipa bie a vaw tlôpa a châ.

² Pheisaih hyutuhpa ta Zeremiah cha a chhi ta, a hnohta, “Abeipa na Khazohpa ta he chhiena he, he su liata a vaw tlô awpa ta vaw phuah ha ta.

³ A reipa hawh tlai ta, Abeipa ta tao ta, chhiena cha nama chô liata a vaw patlôsa ha hih. Abeipa chô liata hmo parao ei chi ta, a bie nama zyh leipa vâta, he hmo he nama chô liata a vaw tlôpa a châ.

⁴ Tahmâ pachâ teh, na ku liata bâliazy tawhta tanoh ei cha pathlie haw. Babylaw lâ ei hnohta a khy awpa na khoh khiahta cha a khy la, a phapa ta ei cha hrôbieh aw. Babylaw lâ ei hnohta nâ khy khoh vei khiahta deikua cha, a khy hlei khah y. Moh teh, râh zydua na hmiakô liata a y hih. Â ryh na tahpa nata pha na tahpa lâ maih sie mah y.

⁵ Na kua awpa khiahta cha, Babylaw bei ta Zudâh khihpizy chô liata ryureituhpa ta a raopa Sâphâ sawchapawpa Ahikâ sawchapawpa Kedaliah lâ kua la, a hnohta râhsawzy hry liata kei pahrâ mah y. Cha su lâ kua awpa na khoh vei khiahta cha, pha na tahna lâ maih sie mah y,” tah ta. Chatanachata pheisaih hyutuhpa ta Zeremiah cha nie awpa nata kuhria pie ta, pasiesa ha ta.

⁶ Zeremiah cha Ahikâ sawchapawpa Kedaliah yna Mizpâ lâ sie ta, râh liata siesaipa râhsawzy hry liata a hnohta pahrâ ha ta.

Zudâh ryureituhpa Kedaliah

⁷ Babylaw bei ta Ahikâ sawchapawpa Kedaliah cha Zudâh râh ryureituhpa ta tao ta, chapawzy, chanôzy, hawtizy nata Babylaw lâ sei ta a chhi leipa, râh liata sipasa chaipazy cha ano ryureina ry liata soh khai ta. Cha thâtih cha lyurâhpa liata a ypa pheisaih hyutuhpa zydua nata ama pheisaihzy ta ama thei nahta,

⁸ Nethaniah sawchapawpa Ismela, Kariah sawchapawpa Zôhanâ nata Zawnathâ, Tâhume sawchapawpa Seriah, Netôpha khihpa Ephai sawchapawzy nata Mâkâ khihpa sawchapawpa Zezaniah nata ama sahlaozy ta Mizpâ liata a ypa Kedaliah cha a kei hmô ei ta.

⁹ Sâphâ sawchapawpa Ahikâ saw­chapawpa Kedaliah ta âmo nata ama sahlaozy cha bie a taih ta, ama hnohta, “Kaldia mo chakao awpa ta chi khuh vy. Râh liana heta y molopa ta, Babylaw bei chakao u la, nama châta a pha aw.

¹⁰ Kei he Mizpâ liata pahrâ aw na ta, keimo lâ a zu tyh awpa Kaldia mo hmiakô liata nama vyuhpa ta ei duah lymâ aw. Nâmo deikua cha, kresawhti nata nopi theilâpazy nata sathaw zy pahmaoh u la, nama beihparizy liata pachô u la, khihpi nama lapazy liata pahrâ muh vy,” tah ta.

¹¹ Cha hawhna hra chata, Babylaw bei ta Zudâh phopi laibâhpazy siesai ta, ama chô liata ryureituhpa châta Sâphâ sawchapawpa Ahikâ sawchapawpa Kedaliah a taopa thâtih cha, Zu chyhsa Môabâ râh liata a pahrâpazy, Amawna mo hry liata a pahrâpazy, Edômâ râh liata nata râh hropazy liata a pahrâpazy ta ama thei nahta,

¹² Zu chyhsa zydua cha to papuapa ta ama yna râh zydua tawhta vaw kuapa ta, Zudâh râh Mizpâ liata Kedaliah lâ vaw tlô ei ta. Âmo chhao cha kresawhti nata nopi theilâpa hluhpi pahmaoh hra ei ta.

¹³ Kariah sawchapawpa Zôhanâ nata lyurâhpa liata pheisaih hyutuhpa zydua Mizpâ liata Kedaliah lâ a vy ei ta,

¹⁴ a hnohta, “Nethaniah sawcha­pawpa Ismela he, na hrona la awpa ta, Amawna bei Bâlisi ta a vaw tuapa a châpa na pahno ma?” tah ei ta. Châhrasala Ahikâ sawchapawpa Kedaliah ta zo leipa ta.

¹⁵ Kariah sawchapawpa Zôhanâ ta Kedaliah cha Mizpâ liata arulâta bie chho ta, a hnohta, “Sie aw na ta, Nethaniah sawchapawpa Ismela he ei kei thie ha aw. Ahy hmahta pahno aw veih ei. Khazia na hrona a la aw tly? Cha hawhta châ mawh sala, nâma châ bylyupa Zu chyhsa zydua pai khai aw ei ta, Zudâh laibâhpazy ama leidia khai aw mâh tâh,” tah ta.

¹⁶ Châhrasala Ahikâ sawchapawpa Kedaliah ta Kariah sawcha­pawpa Zôhanâ hnohta, “Cha hmo cha na tao awpa châ vei, Ismela thâtih na reipa cha a do vei,” tah ha ta.