ZEREMIAH 4 - Mara Bible RV (BSI)

Kua awpa ta awna

¹ “Hy Izarei y, na kua awpa khiahta la, Kei lâ vaw kua mah y,” Abeipa ta a tah. “Na pasichhihnazy ei mohmô tawhta pasie la, Na palôh a zawvaw leipa sala,

² Ngâchhihna, adona nata siana ta, ‘Abeipa hrona reipa ta ei reih,’ Tahpa ta bie nâ taih khiahta cha, Phopizy cha Abeipa liata huhiehpa ta y aw ei ta, Ano amâ palaikhei aw.”

³ Zudâh râhsawzy nata Zerusale khihsawzy hnohta Abeipa ta hetana heta a tah: “Nama chhaohlei pahmâhpa cha palie bâ teh u, Ahlohzy hry liata chi hie khuh vy.

⁴ Hy Zudâh râhsawzy nata Zerusale khihsawzy saih u, Abeipa lâta nama chopaw tai u la, Nama palôh chopawzy tai teh u; Chataleipatala moleina hmo nama taopazy vâta, Ei hiehâhna mei hawhta pua aw ta, Ahy hmahta pachhai thei leipa ta a kâ pathlei aw na.”

Maw lâ tawhta a vaw tlôpa chhiena

⁵ Zudâh râh liata chhopa ta, Zerusale liata phuah u la, Hetana heta tah teh u: “Râh chhôh zydua liata chiahmie tôpa ta, A paro ngaitapa ta awh u la, ‘A vaw hmaoh u la, Thokhy ta dôhpa khihpizy liata a ngia suh u,’ tah teh u.

⁶ Zaio lâta ngiana poh chaluah u la, Abohna tluapa ta a râ teh u; Nama nainô sô khah sy, Maw lâ tawhta chhiena vaw patlôsa aw na ta, Chhiena rarôh ypa ei vaw patlôsa aw.

⁷ Â nyuna sipopa tawhta chakeibarôhneipa vaw pua ha ta, Râhzy paraotuhpa a vaw pua haw; Na râh roryhrapa ta tao awpa ta, A yna su tawhta a vaw pua haw; Na khihpizy cha khihpi rypa châ aw ei ta, A chhôh liata a pahrâpa y khao aw veih ei.

⁸ Abeipa hiehâhna ru ngaitapa cha, Keimo tawhta pakuasapa a châ leipa vâta, Latho poh a bu u la, Mâchhiesapa ta cha muh vy.”

⁹ “Cha noh liata, Abei palôh dua aw ta, Beimachâzy palôh chhao a dua aw. Theihthaipazy a pahlaw aw ei ta, Hrohsopazy noâhpa ta ama chamy aw,” Abeipa ta a tah.

¹⁰ Chatawhcha kei ta, “Hy Abeipa Zehôvâh, he phopi nata Zerusale he dua thata na dôvei haw! ‘Thlalôhpa ta nama y aw,’ tah chi ta, châhrasala ama rao liata zaozi ta mopâpa ama châ ha he zaw,” tah na ta.

¹¹ Cha tina cha, he phopi nata Zerusale hnohta hetana heta ama tah aw: “Râhchawhpa awphy tlâh lakizy tawhta thlih lalôhpa ta ei phopi sawchanô lâ vaw pathli ta, châhrasala zie awpa ta tlyma, pathai awpa ta tlyma châ vei.

¹² Thlih ru ngaitapa eina vaw pathli thlu aw. Châhrasala kei ta âmo cha ei pachia aw ei.

¹³ “Moh tua, meihdozy hawhta â khy huh; A talailihzy khisô lyu ta, A arâzy pahmôhpi hlâta ama chatlie via. Paraopa ta eima y ha hih, Eima hu a po kaw dia!

¹⁴ Hy Zerusale, pachhapa ta na y thei nawpa ta, Hmo pha leipa tawhta na palôh pasi ha mah y. Khachâ taih ma pachâna moleipa nâ vao aw?

¹⁵ “Dânâ tawhta ao ta bie vaw reih ta, Epharai Tlâhzy tawhta chhiena a vaw tlô awpa a phuah.

¹⁶ Phopizy zikyu a râ u la, Zerusale liata phuah teh u. Dôhtuhpazy râh hlapi tawhta vaw tlô ei ta, A pahôpahâhpa ta Zudâh khihpizy ama phyh chie.

¹⁷ Kei einâ dyuhpa vâta, Lyu vaituhpazy hawhta a chheipâh zydua ama chadô khai,” Abeipa ta a tah.

¹⁸ “Na hrozie nata na hmotaopazy ta He hmo he na chô liata a vaw patlôsapa a châ. He he na raona awpa châ ta, Na pathipalôh chhô pahlie aw ta, A pasa ngaita aw,” Abeipa ta a tah.

Zudâh roryhrana vâta palôh pasana

¹⁹ Ei pasa rimâ cha, ei pasa rimâ cha! Ei taikalô pâ ngâ kaw dia! Aw, ei palôh pasa rimâ cha! Ei châh-ao thata a chalyu ta, Y molo thai khao va na. Chiahmie pyu thei na ta, Adyuhna rahaopa pyu ei thei.

²⁰ Raokeina nata raokeina a patho ta, Râh pôhpalôhpa a rao haw. Ei poh ozy eikhapi ta paraopa châ ta, Ei pohraipazy buakha chhôh ta paraopa a châ.

²¹ Khati taih ma ngiana poh chaluahpa hmô aw na ta, Chiahmie pyu ei thei aw tly?

²² “Ei phopi cha hru ha ei ta, Na pahno veih ei; Saw nokhih leipazy châ ei ta, Novâhna hnei veih ei. Hmo pha leipa taona liata so kaw ei ta, Hmo phapa taonazie deikua pahno veih ei,” Abeipa ta a tah.

²³ Alei moh na ta, Pizie hnei leipa ta aruapa ta y thlâh ha ta; Avâzy chhao kaw moh na ta, Khaihna hnei veih ei.

²⁴ Tlâhpizy moh na ta, A chalyu ngâ kaw ei ta, Tlâhthlôh zydua ta amâ pasie pasâ ngâ lâ.

²⁵ Mohmia pasaih na ta, Chyhsapa y leipa ei ta, Avâ pavaw zydua chhao amâ zaw khai haw.

²⁶ Mohmia pasaih heih na ta, Lyu phapa cha râhchawhpa lâta a lie ha ta, A khihpi zydua chhao, Abeipa hmiakô liata, A hiehâhna ru ngaitapa hmiakô liata, Ama rao khai haw.

²⁷ Abeipa ta hetana heta a tah: “Râh pôhpalôhpa roryhrapa ta y aw ta, Chatahrasala chhâ pathlahna patlôsa aw va na.

²⁸ Cha vâna chata alei cha, Mâchhiesapa ta y aw ta, Chô lâ avâzy a zoh aw. Bie reih ha na ta, Ei chhuah haw; A ngiapachhi leipa na ta, Pathleih hra aw va na.”

²⁹ Arâ pheisaihzy nata likathaipazy pyu vâta, Khihpi to amâ râpai haw. Râhmâhpazy liata a ngia ei ta, Lôpanôzy ama kiah. Khihpi zydua siesai khai hapa châ ta, A chhôh liata a pahrâpa y khao veih ei.

³⁰ Hy nâ, roryhrapa khihpi, Khâpa hmo ma tao nâ chhuah? Poh saihlawpa a bupa ta, Ngôh atobinazy ta a tobi chi ta, Na mozy hlyu na hniapa kha, Khâpa hmo ma tao nâ chhuah? Hraoleipa ta nâ tobipa a châ. Na khopawzy ta cha mohnao pyly ei ta, Na hrona la amâ chhuah pyly.

³¹ Chanô sawzeihpa chana ao thei na ta, Saw tuapa a sa ngâpa pasataona ao ei thei. Zaio sawchanô ta hu chhâpa ta a kuzy pazawh ta, “Ei hu a po kaw dia! Lianycheihtuhpazy hmiakô liata ei panao haw,” Tahpa ta a chapa pyu ei thei.