ZEREMIAH 39 - Mara Bible RV (BSI)

Zerusale paona

¹ Zudâh bei Zedekia abeina kô chakina, thla hrawhna liata, Babylaw bei Nebukaneza nata a pheisaih zydua ta Zerusale za siehnao ei ta, khihpi cha dôh ei ta.

² Zedekia abeina kô hrawh hleikhana, thla palihna, cha thla noh chakina noh ta, khihpi thokhy cha su kha liata pacho thei ha ei ta.

³ Babylaw bei beimachâ zydua a vy ei ta, a liah thokhy chhikao liata a tyuh ei ta. Nekâsareze, Samkânebô, beimachâ hyutuh chaipa Sâseki nata pheisaih hyutuhpa Nekâsareze nata Babylaw bei beimachâ hropa zydua a hlao khai ei ta.

⁴ Zudâh bei Zedekia nata pheisaih zydua ta âmo cha ama hmô nahta, a râ ei ta. Thokhy â pathopa mianozy likawh liata a ypa chhikao lâ tawhta a zo ta khihpi cha puasaipa ta, Arabâ lâ pangai ei ta.

⁵ Châhrasala Kaldia pheisaihzy ta a chadai ei ta, Zerikô bypi liata Zedekia cha pha ha ei ta. Patu ei ta, Hâmathi râh Riblâ liata a ypa Babylaw bei Nebukaneza lâ a chhi ei ta. Cha liata Nebukaneza ta a thâtih pachia ta.

⁶ Babylaw bei ta Zedekia sawchapawzy cha, ama paw mohmô lia tlai ta Riblâ liata thie ta. Babylaw bei ta Zudâh beimachâ zydua­ chhao thie khai ta.

⁷ Zedekia cha a mozy thaoh ta, Babylaw lâ a chhi awpa ta bâliazy ta chahry ta.

⁸ Kaldia mo ta abei o nata khihsaw o zydua mei ta rao ei ta, Zerusale thokhyzy cha parao ei ta.

⁹ Pheisaih hyutuhpa Nebuzarâdâ ta khihpi liata chyhsa a nguapazy, ano lâ a râpazy nata chyhsa hropa zydua cha Babylaw lâ sei ta â chhi khai ha ei.

¹⁰ Pheisaih hyutuhpa Nebuzarâdâ ta khâpa hmah a hnei leipa chyhsa sipasapa thokhazy cha, Zudâh râh liata siesai ta, kre sadôzy nata lyuzy a pie ei.

Abeipa ta Zeremiah a pachha

¹¹ Babylaw bei Nebukaneza ta Zeremiah kyh liata pheisaih hyutuhpa Nebuzarâdâ hnohta,

¹² “Zeremiah cha kei la la, a phapa ta mohôh mah y. Pasasa leipa la, a cha chhopa hawhta a chô liata tao mah y,” tahpa ta biepie ta.

¹³ Chatanachata pheisaih hyutuhpa Nebuzarâdâ, beimachâ hyutuh chaipa Nebusabâ, bei ryhraokheituhpa Nekâsareze nata Babylaw beimachâ hropa zydua ta

¹⁴ chyhsa tuah ei ta, Zeremiah cha vaituhpazy dôhpachhôh tlyhmia tawhta a vaw chhi ei ta. Sâphâ sawchapawpa Ahikâ sawchapawpa Kedaliah cha, a o la Zeremiah a chhi awpa ta maophaohna pie ei ta. Chatanachata Zeremiah cha râhsawzy hry liata pahrâ ha ta.

Ebemele pachhapa a châ

¹⁵ Vaituhpazy dôhpachhôh tlyhmia liata patâhpa ta a y nona kha, Zeremiah hnohta Abeipa bie vaw tlô ta:

¹⁶ “Vawh la, Kusi chyhsa Ebemele hnohta, ‘Pheisaihzy Abeipa, Izarei Khazohpa ta hetana heta a tah: Pachâ teh, he khihpi kyh ei reipazy kha, phana lâ châ leipa ta, chhiena lâta vaw patlôsa aw na ta, cha noh liata nâma hmiakô liata tlai ta patlôsapa a châ aw.

¹⁷ Nâ deikua cha, cha noh liata cha pachha aw na ta, na chi kawpa chyhsazy ku liata hlâpa châ aw va chi, Abeipa ta a tah.

¹⁸ Cha pachha tlai aw na ta, zaozi ta pao leipa aw chi ta, kei eina ngâpa vâ chi ta, na hrona na paboh aw, Abeipa ta a tah,’ tahpa ta kei chho mah y,” tah ta.