ZEREMIAH 38 - Mara Bible RV (BSI)

Zeremiah khaohtlô liata pathlapa a châ

¹ Mâtâ sawchapawpa Sephatiah, Pâsu sawchapawpa Kedaliah, Selemiah sawchapawpa Zukâ nata Mâkia sawchapawpa Pâsu zy ta Zeremiah ta zawpi zydua hnohta,

² “Abeipa ta hetana heta a tah: he khihpi liata a ypazy cha, zaozi nata chakâhna nata potlana ta thi awh ei ta, Kaldia mo lâ a puapazy deikua cha ama hroh aw. Chariah patupa hawhta hroh aw ta, a hrona chhâ cha a pabohsa aw.

³ Abeipa ta hetana heta a tah: Khihpi he Babylaw bei pheisaihzy ku liata hlâpa châ tlai aw ta, âmo ta ama la aw,” tahpa ta a reipa cha thei ei ta.

⁴ Beimachâzy ta abei hnohta, “Eima châ haw na, he chyhsa he thiepa châ mawh sy. Cha hawhpa biezy cha reipa ta, khihpi liata a ypa pheisaihzy nata zawpi zydua ku tha a pazeisa khai ha ei. He chyhsa heta phopi pha nawpa tlua leipa ta, ama rao nawpa tlao a tlua hri,” tah ei ta.

⁵ Bei Zedekia ta, “Moh teh u, Zeremiah cha nama ku liata a y. Nâmo chakhiapa ta cha abei heta tao theipa hnei va,” tah ta.

⁶ Chatanachata Zeremiah cha a chhi ei ta, vaituhpazy dôhpachhôh tlyhmia liata a ypa abei sawchapawpa Mâkia khaohtlô liata chaori ta pathliahpa ta pathla ei ta. Khaohtlô liana cha ti y leipa ta, chiatlao sai châ ta, Zeremiah cha chiatlao liana cha za tla ta.

Khaohtlô tawhta Zeremiah pachhana

⁷ Kusi chyhsa hrilyupa, abei o liata a ypa Ebemele ta khaohtlô liata Zeremiah ama pathlapa thâtih cha thei ta. Cha nota abei cha Benzami Thokhy Chhikao liata a tyuh thlâh ha ta.

⁸ Ebemele cha abei o tawhta pua ta, abei lâ vawh ta, a hnohta,

⁹ “Ei zibeipa abei y, he chyhsazy ta hrohsopa Zeremiah khaohtlô liata ama pathlapa he, hmo pha lei ngaitapa ama taopa a châ. Khihpi liata viahchhâ y khao tlôh leipa ta, chavâta Zeremiah cha nodipa ta cha liata a thi aw mâh tâh,” tah ta.

¹⁰ Abei ta Kusi chyhsa Ebemele cha biepie ta, “He tawhna heta chyhsa sythôh a chhi la, hrohsopa Zeremiah cha a thi hlâta khaohtlô tawhta kei thaoh ha muh vy,” tah ta.

¹¹ Ebemele ta chyhsazy a chhi ta, abei hmozy sopakhyna o liata chysia khôna thobyh liata chysia parohpazy nata poh paropazy la ei ta, khaohtlô liata a ypa Zeremiah lâ cha chaori ta pathliahpa ta za pathla ei ta.

¹² Kusi chyhsa Ebemele ta Zeremiah hnohta, “Chysia paropazy nata poh parohpazy he na bâhkalie liata chaorizy heta chahry pâ teh,” tah ta. Zeremiah ta cha hawhna chata tao ta.

¹³ Zeremiah cha khaohtlô tawhna chata chaorizy ta a daophi ei ta. Chatanachata Zeremiah cha vaituhpazy dôhpachhôh tlyhmia liata paysa ha ei ta.

Zeremiah ta Zedekia zikyu â râ chanei

¹⁴ Bei Zedekia ta hrohsopa Zere­miah cha paawsa ta, Abeipa Achhyna o lâ angiana miathôhna liata a tyh ta. Abei ta Zeremiah hnohta, “Hmo miakha cha hiahri aw na ta, khâpa hmah na phih khah y,” tah ta.

¹⁵ Zeremiah ta Zedekia hnohta, “Cha chho hra aw sah la, na thie pyly aw va chi ma? Ryh cha raokhei hra aw sah la, eina nathlie hlei aw chi ma?” tah ta.

¹⁶ Bei Zedekia ta Zeremiah cha arulâta bie a taih ta, a hnohta, “Eima hrona a taotuhpa Abeipa hrona reipa ta ei reih, cha thie leipa aw na ta, thie châ chhuahpa chyhsazy ku liana chhao he cha hlâ aw va na,” tah ta.

¹⁷ Chatawhcha Zeremiah ta Zedekia hnohta, “Pheisaihzy Khazohpa Abeipa, Izarei Khazohpa ta hetana heta a tah: Babylaw bei beimachâzy liata nâ hlâ khiahta cha, na hro pabohsa aw chi ta, khihpi he mei ta raopa châ leipa aw ta, nâ nata na chhôhkha nama hro awh.

¹⁸ Babylaw bei beimachâzy liata nâ hlâ leipa khiahta deikua cha, khihpi he Kaldia mo ku liata hlâpa châ aw ta, mei ta rao aw ei ta, ama ku tawhta pua cheita aw va chi,” tah ta.

¹⁹ Bei Zedekia ta Zeremiah hnohta, “Kaldia mo ta âmo a bai hapa Zu chyhsazy ku liata na hlâ aw ei ta, Zu chyhsazy ta nôchhie kawpa ta eina taola aw ei, tahpa ei chipa vâta a châ,” tah ta.

²⁰ Zeremiah ta, “Cha hlâ aw veih ei. Na hnohta ei reipa Abeipa ao he nathlie mah y. Na châta pha aw ta, na hrona pahlôhpa a châ aw.

²¹ Nâ hlâ leipa khiahta deikua cha, he he Abeipa eina pahmôsapa cha a châ:

²² Moh teh, Zudâh bei o liata chanô a ypa zydua­ cha Babylaw bei beimachâzy lâta a chhipa châ aw ei ta, chanôzy chata na hnohta, “‘Na viasa phapazy ta cha dôvei ei ta, Ama cha pahnie haw; Tahmâ cha na phei chiatlao liata a taw ha ta, Ama châ heihsai khai ha hih,’ ama cha tah aw.

²³ Na lapinô zydua nata na saw zydua cha Kaldia mo lâ a chhipa châ aw ei ta, nâma tlai chhao ama ku tawhta pua leipa aw chi ta, Babylaw bei ta cha patu aw ta, nâma vâta khihpi he mei ta raopa a châ aw,” tah ta.

²⁴ Zedekia ta Zeremiah hnohta, “Cha biezy cha ahy hmah pahnosa khah y, chatanachata thi aw va chi.

²⁵ Beimachâzy ta bie ei châ chhopa thâtih vaw thei ei sala, nâ lâ a vypa ta, na hnohta, ‘Abei hnohta bie na reipa nata abei ta na hnohta bie a reipa miah chho teh, khâpa hmah miah phih khah y, cha thie aw ma pi,’ ama cha tah khiahta cha,

²⁶ ama hnohta, ‘Zawnathâ o liata ei thi lei nawpa ta, cha lâ na paphao pakhua lei awpa ta, abei hnohta ahawna ei tao,’ na tah awh,” tah ta.

²⁷ Beimachâ zydua ta Zeremiah lâ vawh ei ta, hiahri ha tlai ei ta, abei ta bie a piepa hawhta âmo cha chho ta. Zeremiah nata abei bie a chhopa kha a theipa ama y leipa vâta, Zeremiah bie hiahri via awpa hnei khao leipa ei ta, a chalih ha ei ta.

²⁸ Chatanachata Zeremiah cha Zerusale lana noh a tlô hlâlei cha, vaituhpazy dôhpachhôh tlyhmia liata y thlâh ha ta.