ZEREMIAH 37 - Mara Bible RV (BSI)

Zeremiah ta Zedekia zikyu â râ

¹ Babylaw bei Nebukaneza ta bei châ awpa ta a raopa Zôsia sawchapawpa Zedekia cha, Zehôki sawchapawpa Kôniah vyuhpa ta Zudâh râh liata a vaw bei ta.

² Châhrasala ano nata a chakaotuhpazy nata râhsawzy ta Abeipa bie hrohsopa Zeremiah pakah ta a reipazy cha nathlie leipa ei ta.

³ Bei Zedekia ta Selemiah sawchapawpa Zehukâ nata Mâsei sawchapawpa theihthaipa Zephania cha hrohsopa Zeremiah lâ tuah ta, a hnohta, “Ngiachhiepa ta Abeipa eima Khazohpa lâ thlah miah chhâpa mah y,” tahpa ta kei pachhosa ta.

⁴ Zeremiah cha patâhna o liata ama khô leipa vâta, zawpi hry liata a ngia heih pua heih tah thei thlâh ha chy ta.

⁵ Phiraoh pheisaihzy Izi râh tawhta kaw pua ha ei ta. Cha thâtih cha Zerusale a dôh haipa Kaldia mo ta ama thei nahta, Zerusale cha a sysai ei ta.

⁶ Chatawhcha hrohsopa Zeremiah hnohta Abeipa bie vaw tlô ta:

⁷ “Abeipa, Izarei Khazohpa ta hetana heta a tah: Keima nâ saohiah awpa ta châ vaw tuahtuhpa Zudâh bei hnohna chata hetana heta kei chho muh vy, ‘Pachâ teh, nâma cha bao awpa ta â khypa Phiraoh pheisaihzy cha, âmo râh, Izi râh lâ amâ lie aw.

⁸ Kaldia mo vaw kua aw ei ta, khihpi he amâ dyuh aw. Khihpi cha la aw ei ta, mei ta ama rao aw.

⁹ Abeipa ta hetana heta a tah, “Kaldia mo cha miah ama siesai pyly aw,” tahpa ta nâmosasyh a dôvei khuh vy. Sie aw veih ei.

¹⁰ Châ dyuhtuhpa Kaldia pheisaih zydua pahnie khai ha u la, hmahphaohpazy deita ama poh o chhôh liata ama ypa chhao ta, vaw thyu aw ei ta khihpi he mei ta ama rao pyly aw.’”

Zeremiah patâhpa a châ

¹¹ Phiraoh pheisaihzy ama chipa vâta Kaldia pheisaihzy ta Zerusale amâ sysai nahta,

¹² Zeremiah cha Benzami chi hry liata a ryuto râh a la awpa ta, Zerusale puasaipa ta Benzami râh lâ sie ta.

¹³ Benzami thokhy chhikao a tlô nahta, Hânaniah saw­chapawpa Selemiah sawchapawpa a moh Iriza ama tahpa vaituhpazy hyutuhpa vaw y ta. Ano chata Zeremiah hnohta, “Kaldia mo lâ nâ râ,” tahpa ta hrohsopa Zeremiah cha patu ta.

¹⁴ Zeremiah ta, “Haipa bie a châ, Kaldia mo lâ a râ va na,” tah ta. Châhrasala Iriza ta nathlie khoh leipa ta, Zeremiah cha patu ta, beimachâzy lâ a chhi ta.

¹⁵ Beimachâzy cha Zeremiah chô liata ama hiehâh ngaita ta, tu ei ta, chârohtuhpa Zawnathâ o liata patâh ei ta. Zawnathâ o cha patâhna o châta hmâpa a châ.

Zedekia ta Zeremiah â pakyh

¹⁶ Zeremiah cha alei ry lâta patâhna o liata a ngia ta, cha liata noh hluhpi a y tawhta,

¹⁷ Bei Zedekia ta ano cha paawsa ta. Abei ta a o liata arulâta bie hiahri ta, a hnohta, “Abeipa tawhta bie miakha chhâ a y ma?” tah ta. Zeremiah ta, “A y,” tah ta. Abei hnohta, “Babylaw bei ku liata hlâpa na châ aw,” tah ta.

¹⁸ Zeremiah ta Bei Zedekia hnohta, “Nâma chô liata tlyma, châ chakaotuhpazy chô liata tlyma, he zawpi chô liata tlyma, khâpa hmo ma parao na ta, eina patâh chi?

¹⁹ Na hnohta, ‘Nâ nata he râh he a dyuh awpa ta, Babylaw bei a vy aw vei,’ tahpa ta hrohsona bie châ chhopazy kha, khataih liata ama y khai haw?

²⁰ Hy ei zibeipa abei y, tahmâ na nathlie awpa ta ei châ haw. Ei hawna nawhpa he na hmiakô liata rie vaw tlô sala, chârohtuhpa Zawnathâ o lâ rie na paphao pakhua khah y. Chataleipatala cha liata ei thi pathlei aw na,” tah ta.

²¹ Chatanachata Bei Zedekia ta biepie ta, Zeremiah cha abei o vaituhpazy dôhpachhôh tlyhmia liata patâh ei ta. Khihpi liata viahchhâ a chhâ hlâlei cha, viahchhâ taotuhpazy lâpi liata ama taopa viahchhâ cha noh chareih ta tlâ kha lymâ pie ei ta. Cha hawhna chata Zeremiah cha vaituhpazy dôhpachhôh tlyhmia liana chata y thlâh ha ta.