ZEREMIAH 36 - Mara Bible RV (BSI)

Zehôki ta Zeremiah châbu mei ta a rao

¹ He he Zôsia sawchapawpa Zudâh bei Zehôki abeina kô palihna liata, Zeremiah hnohta Abeipa bie vaw tlôpa a châ.

² “Châbu la la, na hnohta bie ei rei pathaona Zôsia daihti tawhta tanoh taihta Zerusale nata Zudâh nata phopi zydua thâtih na hnohta ei reipa zydua kha, châbu liata roh khai mah y.

³ Chatanachata Zudâh pathlazy ta ama chô liata chhiena patlôsa ei chhuahpa zydua pahno aw ei ta, chyhsa to ama hrozie chhiepa tawhta amâ palie thei ngyu aw lah. Chatanachata ama paraona nata ama moleinazy cha ei ngiahthai aw ei,” tah ta.

⁴ Chatawhcha Zeremiah ta Neriah sawchapaw­pa Bâruka aw ta, Abeipa ta a hnohta bie a reipa zydua Bâruka chho ta, cha biezy cha Bâruka ta châbu liata roh ta.

⁵ Zeremiah ta Bâruka cha biepie ta, a hnohta, “Kei cha patâhpa ei châpa vâta, Abeipa o liata a ngia thei va na.

⁶ Chavâta nâ vawh la, Abeipa bie ei cha chhopa châbu liata na ropazy kha, kâhvileina noh liata Abeipa o liata zawpi zydua theina liata kei reih mah y. Ama khihpizy tawhta a vaw puapa Zudâh mo zydua theina liata chhao na rei awpa a châ.

⁷ Abeipa ta he phopi chô liata hiehâhna nata pathiiana a phuahpa kha pasa ngaita tlôh ta, chavâta zawngiah awpa ta amâ hawna cha Abeipa hmiakô liata vaw tlôpa ta, chyhsa to ama hrozie chhiepa tawhta amâ palie thei ngyu aw lah,” tah ta.

⁸ Neriah sawcha­pawpa Bâruka ta hrohsopa Zeremiah ta bie a piepa zydua cha tao ta, châbu liata Abeipa biezy cha Abeipa o liata reih ta.

⁹ Zôsia sawchapawzy Zudâh bei Zehôki abeina kô pangawhna, thla chakina liata, Zerusale khihsaw zydua nata Zudâh khihpizy tawhta Zerusale lâ â vypa chyhsa zydua ta Abeipa hmiakô liata kâhvileipa ta y awpa phuah ei ta.

¹⁰ Chatawhcha châbu liata ropa Zeremiah biezy cha, Abeipa o liata zawpi zydua thei awpa ta, Abeipa o angiana Chhikao Thiehpa chô lâta dôhpachhôh tlyhmia liata a ypa Sâphâ sawchapawpa chârohtuhpa Kemariah chhôhpadâhpa tawhta Bâruka ta reih ta.

¹¹ Sâphâ sawchapawpa Kemariah sawchapawpa Mikai cha, châbu liata Abeipa bie zydua cha a thei nahta,

¹² abei o lâ zu ta, chârohtuhpa chhôhpadâhpa liata a ngia ta, beimachâ zydua cha liata a vaw tyuh thlâh ha ei ta. Chazy cha chârohtuhpa Elisâmâ, Semiah saw­chapawpa Delia, Akabaw sawcha­pawpa Enâthâ, Sâphâ sawcha­pawpa Kemariah, Hânaniah sawchapawpa Zedekia nata beimachâ hropa zydua ama châ.

¹³ Bâruka ta zawpi theina liata a reipa châbu bie a theipa zydua cha âmo chho ta.

¹⁴ Chatawhcha beimachâ zydua ta Kusi sawcha­pawpa Selemiah sawchapawpa Nethaniah sawchapawpa Zehudi cha, Bâruka lâ tuah ei ta, a hnohta, “Zawpi theina liata na reipa châbu cha na ku ta vaw chaba la a vy teh,” tahpa ta kei pachhosa ei ta. Neriah sawchapawpa Bâruka cha a ku ta châbu cha chabapa ta âmo lâ a vy ta.

¹⁵ Beimachâzy ta a hnohta, “A tyuh la, eima nah theina lia tlai ta reih teh,” tah ei ta. Bâruka ta châbu cha ama nah theina liata reih ta.

¹⁶ Bie zydua cha ama thei nahta, chipa ta a moh chyu ei ta, Bâruka hnohta, “He bie zydua he abei eima chho awpa a byuh,” tah ei ta.

¹⁷ Bâruka cha hiahri ei ta, “He bie zydua he kheihta ma na roh tly? Zeremiah ta ano pakah tlai ta a cha chhopa biezy a châ ma? Ngiachhiepa ta miah chho teh,” tah ei ta.

¹⁸ Bâruka ta, “He bie zydua he a pakah ta na chho ta, châti ta châbu liata ei ropa a châ,” tahpa ta a chhy ta.

¹⁹ Beimachâzy ta Bâruka hnohta, “Sie la, Zeremiah nata a kei nyu u la, nama yna su ahy hmahta pahno khah ei sy,” tah ei ta.

²⁰ Chatawhcha dôhpachhôh tlyhmia liata abei yna lâ vawh ei ta, bie zydua cha abei kei chho ei ta. Châbu deikua cha chârohtuhpa Elisâmâ chhôhpadâhpa liata paso ei ta.

²¹ Châbu cha kei la awpa ta abei ta Zehudi tuah ta. Zehudi ta châbu cha chârohtuhpa Elisâmâ chhôhpadâhpa lâ kei la ta. Abei nata abei kiapâh ta a duahpa beimachâ zydua nah theina liata châbu cha reih ta.

²² Cha cha thla chakina liata châ ta. Abei cha chasipaw o liata chakoh mei kiapâh liata a vaw tyuh thlâh ha ta.

²³ Zehudi ta bo thôh bo palih a rei khai nahta, abei ta châbu chatypa cha chaizôh ta tai pachhôpa ta mei liata phôh lymâ ta, châbu zydua a kâ khai hana taihta chakoh mei liata a phôh lymâ.

²⁴ Châhrasala cha bie zydua a theipa abei tlyma, a chakaotuhpazy tlyma, ahy hmahta chi leipa ei ta, ama chysiazy hrie hra veih ei.

²⁵ Enâthâ nata Delia nata Kemariah zy ta châbu cha rao lei awpa ta abei hnohta amâ hawpa chhao ta, ama bie nathlie khoh vei.

²⁶ Chatawhcha abei ta abei sawchapawpa Zerame nata Azarie sawchapawpa Seriah nata Abade sawchapawpa Selemiah zy cha, chârohtuhpa Bâruka nata hrohsopa Zeremiah patu awpa ta biepie ta. Châhrasala Abeipa ta âmo cha a nyu ha ei.

²⁷ Bâruka ta Zeremiah pakah tawhta bie a puapa a rona châbu cha abei ta a rao khai nahta, Zeremiah hnohta Abeipa bie vaw tlô ta:

²⁸ “Châbu hropa la la, Zudâh bei Zehôki ta a rao hapa châbu hmiatuapa liata bie zydua kha roh heih mah y.

²⁹ Zudâh bei Zehôki kyh liata cha, hetana heta na tah aw, ‘Abeipa ta hetana heta a tah, “Khazia Babylaw bei a vy tlai aw ta, râh he pahleipadiapa ta, râh tawhtapa he chyhsapa nata râhsazy a chhawh pathlah khai aw ei, tahpa ta châbu liata na roh,” tah chi ta, châbu cha mei ta na vaw rao hapa kha a châ.

³⁰ Chavâta Zudâh bei Zehôki kyh liata Abeipa ta hetana heta a tah: Dâvi beidyuchhai liata a tyuh awpa chipathla hnei leipa aw ta, a ri chhao nohchhô noh sapa liata nata zâ dâhaw ry liata thypa a châ aw.

³¹ Ama paraona vâta, ano nata a chipathlazy nata a chakaotuhpazy ei hrie aw ei. Ama chô liata chhiena patlôsa awpa ta phuah na ta, châhrasala ama nathlie khoh leipa zydua kha, âmo nata Zerusale khihsawzy nata Zudâh râhsawzy chô liata ei vaw patlôsa aw.’”

³² Chatawhcha Zeremiah ta châbu hropa la ta, Neriah sawchapawpa chârohtuhpa Bâruka cha pie ta. Zudâh bei Zehôki ta mei ta a rao hapa châbu bie zydua kha, Zeremiah ta a pakah ta Bâruka chho ta, Bâruka ta roh heih ta. Cha biezy a lyupa bie hropa hluhpi chhao baichhapa a châ.