ZEREMIAH 35 - Mara Bible RV (BSI)

Rekabi mo reingiana

¹ He he Zôsia sawchapawpa Zudâh bei Zehôki â bei nota, Abeipa tawhta Zeremiah hnohta bie a vaw tlôpa a châ.

² Abeipa ta Zeremiah hnohta, “Rekabi pathlazy lâ vawh la, âmo cha bie a kei chho la, Abeipa o liata chhôhpadâhpa miakha lâ a vaw chhipa ta, âmo cha kresawhti padosa mah y,” tah ta.

³ Chatanachata Hâbazinia sawchapawpa Zeremiah sawchapawpa Zazeniah nata a unawhpazy, a sawchapaw zydua nata Rekhâ pathla zydua cha kei dy ei na ta.

⁴ Abeipa o liata Khazohpa chyhsa Idaliah sawchapawpa Hâna sawzy chhôhpadâhpa lâ a vaw chhi ei na ta. Cha chhôhpadâhpa cha beimachâzy chhôhpadâhpa kiapâh liata y ta, Sâluh sawchapawpa ochhi vaituhpa Mâsei chhôhpadâhpa chô liata a ypa a châ.

⁵ Chatawhcha kresawhti ta a biepa biebuhzy nata nyuzy cha Rekhâ pathlazy hmiakô liata soh na ta, ama hnohta, “Kresawhti he doh teh u,” tah na ta.

⁶ Châhrasala âmo ta, “Kresawhti doh aw ma pi. Miah pathlatuhpa Rekhâ sawchapawpa Zônadâ ta, ‘Nâmo nata nama sawchapawzy cha chhâzaw ta kresawhti nama do awpa châ vei.

⁷ O namâ sa awpa châ leipa ta, chi chhao nama chei awpa châ hra leipa ta, kre sadôzy taopa ta nama hnei awpa châ vei. Nama pahrâna râh liata nama hro a pareih thei nawpa ta, nama hro chhôh zydua poh o liata nama y awpa a châ,’ tahpa ta bie miah pie ha ta.

⁸ Miah pathlatuhpa Rekhâ sawchapawpa Zônadâ ta eima hro chhôh zydua ta, keimo chhao, eima lapinôzy chhao, eima sawchapawzy nata eima sawchanôzy chhao, kresawhti doh lei awpa ta bie miah a piepa zydua eima zyh lymâ.

⁹ Pahrâ nawpa o sa lei awpa miah a tahpa chhao eima zyh. Kre sadô tlyma, lyu tlyma, chikao tlyma hnei ma pi.

¹⁰ Poh ozy liata tlao pahrâ pi ta, miah pathlatuhpa Zônadâ biepiepa zydua zyh pi ta eima tao lymâ.

¹¹ Châhrasala Babylaw bei Nebukaneza ta râh a kaw siehnao tita deikua cha, ‘A vy teh u, Kaldia pheisaihzy nata Aramia pheisaihzy riahchipa vâta Zerusale lâ sie ei suh u,’ tah pi ta. Chavâta Zerusale liata a pahrâpa eima châ,” tah ei ta.

¹² Chatawhcha Zeremiah hnohta Abeipa bie vaw tlô ta:

¹³ “Pheisaihzy Abeipa, Izarei Khazohpa ta hetana heta a tah: Sie la, Zudâh râhsawzy nata Zerusale khihsawzy hnohta kei reih la, ‘Ei pachunazy a pyhpa ta, ei biezy nathlie aw veih ei chi ma? Abeipa ta a tah,’ kei tah mah y.

¹⁴ Rekhâ sawchapawpa Zônadâ ta a pathlazy hnohta kresawhti doh lei awpa ta biepie ta, a pathlazy ta âmo pathlatuhpa biepiepa cha zyh ei ta, tanoh taihta khâpa hmahta doh veih ei. Kei deikua cha ei cha chho ngâ thlâh hapa chhao ei ta, na nathlie veih ei chi.

¹⁵ Nâ chakaotuhpa hrohsopa zydua nâmo lâ khâ vaw tuah ei na ta, nama hnohta, ‘Chyhsa to nama hrozie pha leipa tawhta vaw kua u la, nama hmotaopazy a phapa ta taopathi u la, khazoh hropazy pazi leipa u la, chakao khuh vy. Chatanachata nâmo nata châ pathlatuhpazy hnohta râh ei cha piepa liana heta nama pahrâ aw,’ tahpa ta khâ cha chho ei ta. Châhrasala nama nah pachôh leipa ei chi ta, na nathlie hra veih ei chi.

¹⁶ Rekhâ sawchapawpa Zônadâ pathlazy cha âmo pathlatuhpa biepiepa zyh ei ta, he phopi deikua he cha na nathlie veih ei.

¹⁷ Chavâta Abeipa, Khazohpa Atotaotheipa, Izarei Khazohpa ta hetana heta a tah: Pachâ teh, Zudâh nata Zerusale khihsawzy cha, ama hnohta bie reih na ta, nathlie leipa ei ta, aw ei na ta eina chyh-ei leipa vâ ei ta, ama chô liata chhiena patlôsa awpa ei phuahpa zydua kha, ama chô liata ei patlôsa aw,” tah ta.

¹⁸ Rekhâ pathlazy hnohta deikua cha Zeremiah ta, “Pheisaihzy Abeipa, Izarei Khazohpa ta hetana heta a tah: Châ pathlatuhpa Zônadâ biepiepa zyh ei chi ta, a pachuna bie zydua a ngiahpa ta, a biepiepa zydua nama tao lymâpa vâta,

¹⁹ Pheisaihzy Abeipa, Izarei Khazohpa ta hetana heta a tah: Rekhâ sawchapawpa Zônadâ cha, a pathlazy hry tawhta ei hmiakô liata a duah awpa chyhsa a phahla beih aw vei.”