ZEREMIAH 34 - Mara Bible RV (BSI)

Babylaw liata Zedekia a thi awpa kyh hrohsona bie

¹ He he Babylaw bei Nebukaneza nata a pheisaih zydua nata a ryureina ry liata a ypa khizaw khinarâh zydua nata phopi zydua ta Zerusale nata a khihpi zydua amâ dyuh hai nota, Abeipa tawhta Zeremiah hnohta bie a vaw tlôpa a châ.

² “Zehôvah, Izarei Khazohpa ta hetana heta a tah: Vawh la, Zudâh bei Zedekia hnohta hetana heta kei chho teh, ‘Abeipa ta hetana heta a tah: Pachâ teh, he khihpi he Babylaw bei ku liata hlâ aw na ta, ano ta mei ta a rao aw.

³ A ku tawhta pua leipa aw chi ta, patupa châ tlai aw chi ta, a ku liata hlâpa na châ aw. Na mo tlai ta Babylaw bei cha hmôpa ta, hmiachhy ta bie a chho aw chi ta, Babylaw râh lâ na sie aw.’

⁴ Chatahrasala Hy Zudâh bei Zedekia y, Abeipa bie he thei mah y! Nâma kyh liata Abeipa ta hetana heta a tah: Zaozi ta thi aw va chi.

⁵ Thlalôhpa ta na thi aw. Châ pathlatuhpa bei tuapazy châta ropahâhpa ama raopa hawhna khata, nâ chhao cha raopa hra aw ei ta, chaphôh cha tupa aw ei ta, ‘Hy zibeipa, cha rimâ cha!’ ama tah aw. Bie ei reih haw, Abeipa ta a tah.”

⁶ Hrohsopa Zeremiah ta cha bie zy­dua cha Zerusale liata Zudâh bei Zedekia hnohta reih ta.

⁷ Babylaw bei pheisaihzy ta Zerusale nata Zudâh khihpi ama la mâh leipa Lakhi nata Azekâ khihpizy amâ dyuh nota a reipa biezy a châ. Hezy he Zudâh khihpizy hry liata thokhy ta dôhpa khihpi la mâh leipa a y chhôhpazy ama châ.

Hebrai seizy kyh liata biehrai paraona

⁸ He bie he Bei Zedekia ta Zerusale liata a ypa zawpi zydua hnohta biehrai taopa ta, seizy khotalaina kyh a phuah khai tawhta, Zeremiah hnohta Abeipa bie a vaw tlôpa a châ.

⁹ Chyhsa to ta Hebrai seichapaw nata seichanô ama hneipazy cha khotalaina piepa ta ama papuasa khai awpa a châ. Ahy hmahta a unawhpa Zu chyhsa cha sei ta a hnei awpa châ vei, tahpa ta a phuah.

¹⁰ Chyhsa to ta ama seichapawzy nata ama seichanôzy cha khotalaina piepa ta ama papua khai awpa châ ta, chyhsazy ta âmo cha sei ta ama hnei heih awpa châ khao vei, tahpa biehrai a pyhtuhpa beimachâ zydua nata zawpi zydua ta biehrai cha zyh ei ta, ama seizy cha khotalaina piepa ta papuasa tlai ei ta.

¹¹ Châhrasala hnôhlâ ta a ngiapachhi ei ta, seichapaw nata seichanô ama papua hapazy cha la pakhua heih ei ta, ama biehneina ry liata sei ta ama tao ha heih.

¹² Chatawhcha Zeremiah hnohta Abeipa tawhta hetana heta Abeipa bie vaw tlô ta:

¹³ “Abeipa, Izarei Khazohpa ta hetana heta a tah: Châ pathlatuhpazy Izi râh seichâna o tawhta ei chhi papua nona ei khata, keima tlai ta ama hnohta biehrai taopa ta,

¹⁴ ‘Chyhsa to ta nama unawhpa Hebrai chyhsa nama hnohta zuapa, kô charu châ chakao hapa cha, kô sarina chhâna liata khotalaina piepa ta nama papuasa awpa a châ,’ tah na ta. Châhrasala châ pathlatuhpazy ta na nathlie leipa ei ta, kei lâta ama nah pachôh hra veih ei.

¹⁵ Nâmo deikua cha atliata liana khata ro ei chi ta, chyhsa to ta nama vaih châta khotalaina phuahpa ta, ei mohmô liata hmo dopa tao ei chi ta, ei moh a phaohpa o liata ei hmiakô liata biehrai nama tao.

¹⁶ Châhrasala a ngiapachhi ei chi ta, âmo khotlyna tlai ta khotalaina pie ei chi ta nama papuasa hapa nama seichapawzy nata nama seichanôzy la pakhua heihpa ta, nama biehneina ry liata seizy ta tao heih ei chi ta, ei moh nama papuapalei haw.

¹⁷ “Chavâta Abeipa ta hetana heta a tah: Nama unawhpa nata nama vaih châta khotalaina phuah awpa kyh liata, chyhsa to ta ei bie zyh veih ei chi. Nathlie teh u, nâmo châta khotalaina ei phuah. Cha khotalaina deikua cha, zaozi nata potlana nata chakâhna zy a tyh awpa khotalaina a châ aw. Khizaw khinarâh zydua ta rarôh y ama tah awpa ta ei cha tao aw ei, Abeipa ta a tah.

¹⁸ Ei biehrai paraopa ta, biehrai ta â hnawpa hawhta tao awpa ta ei hmiakô liata bie amâ taihpa a paraopazy cha, viahchaotaw bo no ta taipa hawhta ei tao aw ei. Âmosasyh ta chhie a sa khâhpa ta, viahchaotaw bo no ta taipa likawh liata ama siepahliepa a châ.

¹⁹ Âmosasyh ta chhie a sa khâhpa ta viahchaotaw patlawpa likawh liata a siepahliepa Zudâh beimachâzy, Zerusale beimachâzy, hrilyupazy, theihthaipazy nata râhsaw zydua cha viahchaotaw patlawpa hawhta ei patlaw aw ei.

²⁰ Ama chariahpazy nata ama hrona la a chhuahpazy ku liata hlâ aw ei na ta, ama rizy cha avâ pavawzy nata alei sazy châta ama lao a châ aw.

²¹ Zudâh bei Zedekia nata a beimachâzy cha ama chariahpazy nata ama hrona la a chhuahpazy ku liata hlâ aw ei na ta, nâmo châ sysai hapa Babylaw bei pheisaihzy ku liata ei hlâ aw ei.

²² Moh teh u, biepie aw na ta, Babylaw bei pheisaihzy cha, khihpi lâ he ei vaw chhi pakhua heih aw ei, Abeipa ta a tah. Chatanachata khihpi he a dyuh aw ei ta, la awh ei ta, mei ta ama rao aw. Zudâh khihpizy cha a pahrâtuhpa y leina khihpi roryhrapazy ta ei tao aw ei.”