ZEREMIAH 33 - Mara Bible RV (BSI)

Zerusale nohlaona vaw tlô heihna

¹ He he vaituhpa dôhpachhôh tlyhmia liata patâhpa a châ thlâh ha chy nota, Zeremiah hnohta Abeipa bie a ei nona ta a vaw tlôpa a châ.

² “Alei tao ta, pizie hneipa ta paysa ta a paduatuhpa Abeipa, a moh Zehôvâh ta hetana heta a tah:

³ Na aw la, châ chhy aw na ta, hmo rônahpa nata hmo nyupa na pahno beih leipazy ei cha chho aw.

⁴ Abeipa, Izarei Khazohpa ta, khihpi dôhna alei ama pathlupazy tawhta nata zaozi tawhta avaina tao nawpa ta, khihpi ozy nata Zudâh beizy ozy phiepa ta a yna kyh liata hetana heta a tah:

⁵ Kaldia mo a dyuh awpa ta a vy taraw ei ta, châhrasala ozy cha ei hiehâhna nata ei pathiiana ta ei thiepa rizy ta pabiepa tlao châ ei ta, ama moleina zydua vâta, he khihpi he ei hmia ei nyusai hapa kha a châ.

⁶ Chatahrasala hnatlâna nata patlâhna vaw tlôkhei aw na ta, patlâh aw ei na ta, thlalôhna kipa nata abohna ei pahmôsa aw ei.

⁷ Zudâh nata Izarei cha vânoh patosa heih aw ei na ta, hmiatua ta ei paduapa hawhna ei khata ei padua heih aw ei.

⁸ Ei chô liata ama moleina thaileichâna zydua tawhta pathaisa aw ei na ta, ei chô liata ama moleina thaileichâna zydua a ngiahthai aw ei na ta, einâ dyuhna zydua chhao ei kha ei ngiahthai aw ei.

⁹ Zudâh nata Izarei châta hmo phapa ei taopa thâtih a thei awpa khizaw phopi zydua hmiakô liata, he khihpi he ei châta thaphana, palyupalihna nata rônahna a châ aw. Khihpi châta hmo phapa to nata ativyna ei piepa vâta chipa ta amâ chalyu aw.

¹⁰ “Abeipa ta hetana heta a tah: ‘He he chyhsapa nata râhsa y leina roryhrana su a châ’ nama tahpa su, chyhsapa tlyma, a chhôh liata a pahrâpa tlyma, râhsa tlyma y leina Zudâh khihpizy nata Zerusale khiliahzy liana heta aozy thei heihpa a châ aw.

¹¹ Alyna nata thaphana aozy thei heihpa châ aw ta, myuhneituhpa nata myuh aozy chhao thei heihpa châ aw ta, Abeipa o lâta alyna biereina hmohlâpa a vaw cheihpazy ao chhao thei heihpa châ aw ta, “‘Pheisaihzy Abeipa hnohta alyna bie reih teh u, Abeipa cha pha ta, A kyhpachâna tlyzaw ta a ypa a châ!’ ama tah aw. Hmiatuapa daihti hawhna khata, râh cha vânoh ei patosa heih aw,” Abeipa ta a tah.

¹² “Pheisaihzy Abeipa ta hetana heta a tah: Chyhsapa nata râhsa y leina, he roryhrana su nata a khihpi zydua liana heta, mietaku vaituhpazy pahrâna suzy y heih aw ta, ama mietaku zawzy ama pabyusa heih aw.

¹³ Mietaku zawzy cha, tlâh râh khihpizy, Sephelâ bypi khihpizy, Neke chho râh khihpizy, Benzami râh, Zerusale chheipâh suzy nata Zudâh khihpizy liata ama moh a pakituhpazy ku ry liata ama sie heih aw,” Abeipa ta a tah.

Dâvi hnohta Abeipa tlyzaw biehrai

¹⁴ “Pachâ teh, Izarei pathlazy nata Zudâh pathlazy hnohta bie ei taihpa ei patlô nawpa nohzy a vaw tlô hai,” Abeipa ta a tah.

¹⁵ “Cha nohzy liata nata cha daihti liata, Dâvi châta Chiah siapa papyusa aw na ta, adona nata siana ta râh liata ryu a reih aw.

¹⁶ Cha nohzy liata, Zudâh cha pachhapa châ aw ta, Zerusale chhao â bohpa ta a y aw. A moh cha ‘Zehôvâh Sidkenu,’ a châ aw.

¹⁷ “Abeipa ta hetana heta a tah: Dâvi cha Izarei pathlazy beidyuchhai liata a tyuh awpa chyhsa a phahla beih aw vei.

¹⁸ Livai chizy chhao ei mohmô liata raopa hlânazy a hlâ awpa, niepa hlânazy a rao awpa nata atheihnazy a hlâ lymâ awpa theihthaipa a phahla aw veih ei.”

¹⁹ Abeipa bie Zeremiah hnohta vaw tlô ta:

²⁰ “Abeipa ta hetana heta a tah: Chhô nata zâ y awpa ta biehrai ei taopa paraopa ta, chhô nata zâ he ama daihti raopa chyu liata vaw tlô lei awpa ta nama tao thei khiahta cha,

²¹ nâ chakaotuhpa Dâvi hnohta ei biehrai chhao parao theipa châ aw ta, a beidyuchhai liata ryu a reih awpa sawchapaw hnei leipa aw ta, nâ chakaotuhpa Livai chi theihthaipazy hnohta ei biehrai chhao parao theipa a châ aw.

²² Avâ awhsizy rei tiah awpa châ leipa ta, tilaipi sadizy panua tiah awpa a châ leipa hawhta, nâ chakaotuhpa Dâvi chipathlazy nata ei chakaona rai a hriatuhpa Livai chi chipathlazy ei papôh aw.”

²³ Abeipa bie Zeremiah hnohta vaw tlô ta:

²⁴ “He chyhsazy ta, ‘Abeipa ta â tlyhpa phopi miano cha a thy ha ei,’ tahpa ta ama reipa pachâ beih va chi ma? Cha hawhna chata ei phopi cha mohnao ei ta, âmo mohmô liata la phopi tah tlâh chhao châ khao veih ei.

²⁵ Abeipa ta hetana heta a tah: Chhô nata zâ y awpa ta ama hnohta biehrai vaw tao leipa aw sah la, avâ nata alei yziezy he ei vaw rao leipa a châ khiahta cha,

²⁶ Zakaw chipathlazy nata nâ chakaotuhpa Dâvi chipathlazy cha thy aw ei na ta, a chipathlazy hry liata pakha cha, Abarahâ nata Aisika nata Zakaw chipathlazy chô liata ryureituhpa châta a tlyh aw va na. Chavâta vânoh patosa heih aw ei na ta, zawh ei ngiah heih aw ei.”